بين الليل والحال هبت الذكرى

الرابع والثلاثون

"أقصر بارت"
(استغفرالله)
مواليف:يابنات العيال ينتظرون
وجدان:ماراح اتحرك الا اذا لقيت اغراضي
ام يوسف:دوريهم وبينتظرك معاذ
وجدان:ايشش؟بتروحون وتتركوني هنا عند العمال؟
ام يوسف:يابنت الحلال بيدخل عندتس معاذ بس اخلصي علينا
وجدان:طيب طيب
مشو يتركونها تدور اغراضها من عبايه وجوال وشنطه
زفرت وهي تقول:وربي ياوصايف لااصفقتس
انتي وعقلتس المخيس
تكى على الباب يسمع كلامها وكملت:قال ايش قال مدري وين حطيتهم!وين بتحطينهم يعني ! حطيهم فوق راسي ياوصايف فوق راسي
ضحك بقوه يسمع حلطمتها ولفت على الباب وقالت:معاذوه؟متى ناوي تهجد؟
ميل راسه على الباب وقال:كملي تكفين
ماردت عليه وكمل:لقيتيهم؟
هزت راسها بالنفي وقال:امسكي شماغي لين تلقينهم العمال معبين القاعه
نطقت بإستهزاء:مسوي تغار؟
مد الشماغ لها وقال:مو بس اغار انا انسان  جوفه يحترق من الغيره بعد
اخذت الشماغ وقالت:اكرمني بسكوتك بالله
رفع حاجبه يناظرها وقال:مابي اسكت!
لفت تدور عبايتها وقالت:الا اسكت
مارد عليها ومشى يدور عبايتها وجوالها وقالت بصوت عالي:اذا لقيتها يامعاذ
قاطعها وهو يقول:لقييتهاااااا
مشت له وقالت:كيف؟انا صارلي ساعتين احوم حول هالمكان ولالقيتها
ابتسم بغرور وقال:والله سر المهنه
اخذت عبايتها وهمست:يارب مايكونون راحو يارب
لبست عبايتها ومشت تتركه بالقاعه وانقهرت من شافتهم راحو وتركوها معاه
معاذ من وراها:للأسف راحو ، وبتجين معاي
ركبت السياره ورا وفتح الباب يناظرها وقال:
سواق انا؟
نطقت بقهر:ايي سواق
ضحك على ردة فعلها وقال:انزلي صيري قدام
نزلت تصير قدام وفتح الباب لها وقفله ومشى يركب السياره
سكر الباب ولف عليها وقال:للأسف نسيت الورد
ناظرته ولاردت وكمل:عاد لو فيه مشتل فاتح مريته بس مافيه
لفت عليه وقالت:ماطلبت منك ورد ، اسكت
سكت يحرك للبيت
-
لف يناظرها وشافها سرحانه وهمس لها:
ناظري ورا
لفت تناظر ورا وشافت ورد "وردي" وناظرته وقالت:لمين ذا؟
ابتسم يناظر الطريق وقال:لوجدّان قلبي ، ومُنى رُوحي وقلبي ، وحبيبة عّروقي ، وصاحبة الثُغر النديّ ، و
قاطعته وهي تقول:شكرا
ابتسم يلمحها تاخذ الورد بحضنها
شتت نظره من لفت عليه وقالت:كيف قادر تكون كذا حنون؟
وقف السياره ولف عليها وقال:حنون عليتس انتي بس ، عطيني فرصه وشوفي حُبي وش بيسوي فيتس ، وجداني ادري انتس خايفه من كل شي حولتس الحين ، ادري انتس ماتثقين بأحد بسبب عايض ادري انتس ماتحسين بالأمان الا مع نياف وأمتس ، تبيني اصير نياف؟اصير نياف ولايهمتس ، أنا أنتظر اليوم اللي تصيرين فيه حلالي وأنتي
قاطعته وهي تقول:وأنا ما أثق بأحد ، المشكله مو فيك معاذ! المشكله فيني أنا ، أنا اللي الحياة بتكتب لها حلو الأيام لكن ! لكن مو الحين
هز راسه بالنفي وقال:وجداني ، عطيني فرصه بس فرصه
همست بهدوء:يصير خير
-
عند أبطالنا
-
وصلو "بيتهم"ونزل نياف يساعدها
مسكت يده تدخل معاه
أبتسم يناظرها بهدوء وقالت:لاتناظرني كذا
ضحك يناظرها وقال:تتوترين مني؟
هزت راسها بالنفي وقال:لاتتوترين مني ، تراني نياف اللي تعرفينه و
قاطعته تقول:وتحبينه
ابتسم يناظرها ومشت تدخل الغرفه ولحقها هو
نزل شماغه وبشته على كنبة الغرفه
ومشى ينزل ساعته ويحطها على الرف ولف عليها قبل يطلع:تبين شي؟
هزت راسها بالنفي ومشى يطلع برا الغرفه يتركها تاخذ راحتها
جلست على السرير تناظر دبلتها رفعت عيونها تناظر شماغه وبشته على الكنبه
وقفت تناظر شكلها بالمرايه وبعدها مشت تاخذ شاور وطلعت وهي تنشف شعرها ومشت تجلس على الكرسي واخذت العطر تتعطر فيه وشغلت بخور ومشت تطلع لنياف
أبتسم يشوفها قدامه وقال:أنا كيف كنت متحمل حياتي بدون وليف؟
أبتسمت تجلس جنبه وقالت:وبتكمل حياتك مع وليف
لف عليها وقالت:تدري شصار؟
سكت يحط يده على خده يناظرها وقالت:
تخيل أن وجدان من الحماس قامت ترقص مع الميكب أرتست
أبتسم يتأملها يسمع سوالفها وكملت هي:
وجده مبسوطه فيك مره يانياف أول مره أشوفها كذا
ناظر الأكل اللي على الطاوله وقال:جوعانه؟
مدت يدها تمد له العصير وقالت:بسبقك ميته جوع
ضحك بعلو صوته وقال:لو خلصتيها ياوليف لتس ماتتمنينه
رفعت حاجبها تناظره وقالت:انت تعرف وش اتمنى
أبتسم يناظرها تاكل وقال:والله لا يحصل اللي تبينه بس خلصيها
-
صرخت بعلو صوتها من خلصت أكلها كله وقالت:خلصته خلصتهه
رفع لها علبة العصير وقال:باقي ذي
كشرت وقالت:نياف تكفى شبعت
رفع كتوفه وقال:اشربيها كلها ياوليف كلها
مدت يدها تاخذ العصير تشربه كله وقالت:
هاه خلصته ولاماخلصته؟
أبتسم ينطق:خلصتيه
رجعت شعرها بغرور وقالت:قلت لي ما أتمنى ، أتمنى أنك تجمع معاذ ووجدان وتخلص وجدان من هالعذاب تقدر؟
قرب منها يمسك بيده خصلة من شعرها وقال:أقدر وأنا زوج وليف أقدر
رفعت يدها تحاوط وجهه وقالت:حبيب قلبي إنت
-
بيت أبو ذياب
-
غزلان:وجع ياوصايف قلت لتس الموقف ومسكتيها علي
وصايف صرخت بحماس وقالت:مع سعود غزلان؟مو مصدقه ابددد
غزلان:انطمي بس
وصايف:بس تراه مزيون ، يشبه أمه
غزلان رفعت شعرها وقالت:هو حلو ، بس انا عائلة ام سعد كلها مااثق فيهم
وصايف:انتي بتتزوجينه ولا بتتزوجين اهله؟
غزلان:مدري وصايف
لفو على الباب من انفتح وشافو ام وصايف
وصايف:وش صاير
ام وصايف:عنود خطبتس
غزلان:لمينن؟
ام وصايف:ل عز وتقول اذا البنت موافقه نبي عقد قرانهم مع يوسف وبيان قبل يسافر نياف
وصايف سكتت تناظر امها وكملت:عاد استخيري ياوصايف
وطلعت تسكر الباب وراها
غزلان بحماس:عز ياوصايف عز
وصايف:ما ابغاه
غزلان:ليه؟
وصايف:غزلان ماابيهم كلهم بعد سواتهم بوجدان مستحيل اطب بيتهم
سكتت غزلان وكملت وصايف:وغير سواتهم بوجدان ، نجي لأفعالهم بنياف ، اليوم زواجه وجدته مارقصت بعرسه ولاجت تسلم عليه تجاهلته كأنه ولا شي ، حفيدها ذا حفيدها ، وعمته ماغير تجرح فيه وتقول له اليتيم ، تحسب ان اليتيم ماله مشاعر واحساس ،
ولو نجي لزوجة عمه هي احسنهم حتى انها اليوم شالت العرس شيل تقولين انها ام العريس او اخته
غزلان بهدوء:بس انتي بتتزوجين عز ولد عنود مو ولدهم هم!
وصايف:حتى لو ما ابغاه
سكتو من دخلت رُوح الغرفه ومشت لوصايف تجلس جنبها
وصايف:وش فيه رُوح؟
رُوح:موده وهايف هاوشوني
وصايف:ليه؟
رُوح:قالو أن ام نياف ميته ! وقلت لهم جده مناير أمه ، وهاوشوني وقالت موده أن أم نياف تحت التراب ومحد يحب نياف حتى وليف ماتحبه
وصايف:وينهم الحين؟
رُوح:بالحوش ورا
وقفت وصايف تمشي للحوش الخلفي
شافتهم يلعبون وتقدمت لهم:هيي انت وياها
موده:خير
وصايف:اسمعي ام لسانين ، تتكلمين ثاني مره عن نياف او عن اي احد داخل هالبيت لااطردتس انتي واهلتس من البيت اللي انتم فيه فاهمه؟
موده:على حد علمي انه مو بيتك بيت نياف
وصايف:بيتي او بيت نياف ماتفرق
موده:طيب؟خلصتي؟روحي الحقي ورا الخروف اللي يحبك
سكتت وصايف ووقفت موده تمشي هي وهايف يطلعون من البيت
جلست وصايف على الأرض تفكر بكلام موده ووقفت على صوت ام ذياب وهي تقول:
بتوافقين على ولد سعد
وصايف:لا طبعاً
ام ذياب:ليه لا؟
وصايف:مااحبه؟
ام ذياب:ماتحبينه؟وكنتي جالسه معاه بمكان خلوه؟
سكتت وصايف بصدمه وكملت ام ذياب:
بتوافقين عليه ياوصايف ولا بطلع افضحتس عند امتس وابوتس واخليهم يزوجونتس غصب عنتس
وصايف:بس جده انا كنت اساعده ماكنت
قاطعتها ام ذياب وهي تقول:تساعدينه او ماتساعدينه بتوافقين عليه غصب عنتس تفهمين؟
ومشت ام ذياب تتركها وراها
-
الساعه ٣ العصر
بيت أبطالنا
-
صحت وليف على صوت دق الباب
ناظرت نياف نايم وقالت:نياف
فتح عيونه يناظرها وقالت:قوم الباب يدق
نياف بصدمه:ايش؟منهو اللي على الباب
رفعت وليف كتوفها وقالت:وش مدريني انا
قام نياف يتوجه للباب
فتح الباب وناظرهم وقال:وشو
ام سعد:جينا نتطمن عليك
ذكرى:وشو مابتدخلنا بيتك
نياف:بس ياعمه
قاطعته ذكرى من دخلت البيت وقالت: عشتو ياولد سعود حتى بيتك ماتبينا ندخله؟
نياف بهدوء:انا ماقلت ماابيكم تدخلونه بس توي عريس
ام سعد:واذا عريس؟جدتك وعمتك جايين يشوفونك
تنهد نياف وقال:حياكم اجلسو
ومشى يدخل غرفته هو ووليف
ناظرته وقالت:مين؟
جلس على السرير وقال:جده مها وعمه ذكرى
وليف بصدمه:ايشش
وقف نياف يتوجه لغرفة الملابس وقال:
ياانهم رفعو ضغطي
سكتت وليف وقامت تبدل ملابسها وتطلع لهم
جلس نياف وهو يقول:يالله انك تحييهم
ذكرى:هذا اللي قبل شوي بغى يطردنا؟
سكت نياف وقالت ام سعد: ياوليف
لفت عليها وليف وقالت:هلا ياخاله
ام سعد:حفيدنا ماهوب جاي؟
نياف ناظر ام سعد بصدمه وقالت وليف:تو الوقت
ذكرى:نبي نشوف عيال نياف قبل لانموت
لفت وليف على نياف وقالت بهمس:تعال معاي شوي
وقفت وليف واتجهت للغرفه
ذكرى:عشتوا لايكون زعلت
وقف نياف وقال:دقايق واجي
ولحق وليف للغرفه
شافته من دخل الغرفه وقالت:انا مو مضطره اتحملهم اكثر من كذا ، صرفهم وقول لهم اي شي اهم شي يطلعون من هنا ، وعمتك ذي تقط كلام ومو راضيه تسكت؟
وجدتك
قاطعها وهو يقول:وليف اهدي مايصلح تتكلمين كذا
وليف:لاوالله؟نياف انت مستوعب انهم جو بيتنا بأول يوم زواج لنا؟بدال ماتروح تطردهم
قاطعها وهو يقول:كيف اطردهم؟اهلي ذول اهلي
رفعت حاجبها تناظره وقالت:تصرف انا مالي دخل ، وللمعلومية قول لهم ينظفون وراهم لاني برجع انام
سكت يناظر تصرفاتها ومشى يطلع من الغرفه
شاف مكانهم فاضي وضحك بسخريه من فهم نيتهم ، مشى يشيل الاغراض وطاحت زمزمية القهوه وصرخ بقهر وعصبيه
................................
بارت بيعجبكم
الكاتبه:منيره آل عبدالعزيز💙.