بين الليل والحال هبت الذكرى

الثالث والأربعون

مُبارك عليكم الشّهر الفضيل💙💙💙
(استغفرالله)
-
بيت أم ذياب
-
وجدان:مابغيتي تجين
وليف:ياخي بيتي فيه راحه عجيبه
وجدان:واضح حتى وجهتس منور
وليف:من السعاده
وجدان:ليه لايكون حامل؟
وليف:وجدانن
وجدان:والله صدق وليف ، الحين بتنشب لي ام سعد تقول وين حفيدنا وين حفيدنا
وليف:عاد انا لساني صاير مترين
وجدان:لاحظتس من سافر نياف وأنتي بس تتهاوشين معاهم
وليف:ماهم وجه حشيمه ، بذات ذكرى ذي ، ودي أمحطها
وجدان:أمشي نحارشهم
قامت وجدان وقامت معاها وجدان وراحو للمجلس اللي فيه عائلة ام سعد وعائلة ام حامد
جلست وليف جنب وجدان وهي تسمع سوالف ذكرى
ام حامد:اخبارك ياوليف
وليف:بخير الحمدلله
ذكرى:واخبار ولد اخوي؟
وليف:ولد اخوتس مسافر لو ناسيه يعني ، تعرفين يعني مع كبرة العُمر الواحد يبدا ينسى
ذكرى:لاماعليك انا ما انسى ، بذات شي عن نياف ما انساه
وليف:خابرينتس ياذكرى مايحتاح ترمين كلام
نغم:وليف
وليف:لو سمحتي انتي اسكتي هذا كلام بيني وبين أمتس
ذكرى:ليه ماتتدخل،خايفه أنها تفضح زوجك؟
وليف:زوجي؟قصدتي ولد أخوتس؟هذا وانتي تسألين عنه قبل شوي
ذكرى:من تكونين
وليف:وليف ، حـرّم نياف أبن سعود آل ناصر ، حـرّم الدكتور ، أو بالأصح ، حـرّم المشكلجي ، أم غمّور ، معاك وليف بنت باسم آل راشد ، معاك أخت يوسف وفيصل ومعاذ ، بنت جواهر ، وليف
ضحكت وجدان بصدمه وقالت بهمس لوليف:قولي أنا شيخة الشيخات
وليف:لاذي يبي لها ذهب ماني لابسه ذهبي الحين
سكتت وجدان من سمعت صوت معاذ وهو يهاوش على فهد:فهد ياتيس حطه هنا هنا تعبت أهخ ياربي متى يرجع نياف ويفكني منك
فهد:أنطمممم غثيتنا
فيصل:إلا أخويي
فهد:والتبن فيك وفأخوك
معاذ:أعقبب وانا ولد باسم
فيصل:أحشره يامعاذ
ركض معاذ ورا فهد وصرخ فيصل برعب من تجمعوا فيصل ومعاذ
صرخ وهو يقول:تكفين يا أصايل فكيني
معاذ:على تبن يالتيس ، فالح بس تتكلم و وقت الجد تستفزع بأصايل
فهد:أخوكم نسيبنا بخليّ أبوي يكنسل الزواج وأخوكم بطلق بيان
معاذ ضرب رأس فهد وقال:لاا عادد
بّعد فيصل عن فهد من سمع صرخة جايه من داخل
فيصل:مواليف
معاذ:لاوالله أنها وصال
وركض معاذ لداخل وهو ينادي:وليففف
طلعت له وليف وقالت:ياولد الاوادم اهجد غثتينا
معاذ:وش صار ليه تصارخون؟
وليف:وصال كبت القهوه على ذكرى
ضحك معاذ بصدمه وقال:صدق؟
وليف:والله
ضحك معاذ ضحكه هيستيريه وكانت وليف تناظره وتضحك معاه
دخل فيصل عليهم وضحك معاهم ومسكت وليف بطنها بسبب الضحك وهي تقول:معاذ
ياحيوان خلاص
ناظرها معاذ وقال:يالله باقي شي واحد أنك تسوي اللي ببالي بهالعجوز ، يارب المره الجايه تنحرق يدها مو بس تنكب عليها القهوه
فيصل:ياوليف أعذريه تراه يحسبها حبيبته
وليف:أشتقت لها؟
معاذ:شدخلتس
وليف:فيصلوه ، شعندك ساحب على مواليف؟
فيصل:هي اللي ساحبه عليّ ، كارهتني
وليف:وحّام لاتلومها
فيصل:وليف
وليف:وشو
فيصل:غمور مابتجي؟طولتو عليها
وليف:فيصل سد حلقك
فيصل:تراني صادق ، من يرجع نياف نبي غمور استعجلوا عليها
معاذ:تدري فيصل
فيصل:وشو
معاذ:اكبر غلط سوته مواليف ، انها تزوجتك ، وجهك مخيس ، واسلوبك مخيس ، وحركاتك مخيسه ، حتى شعرك مخيس ، ويقولون تشبه نياف ، والله ان نياف احسن منك
فيصل:خلصت؟انقلع انت وشوشتك ذي
معاذ:مو عاجبك شعري؟
وليف:انت وياه ، انقلعو تهاوشوا بمكان ثاني
قاطعتهم وصايف وهي تقول:ياعيال خلوها تجي نبيها
فيصل:امتس وحنا ماندري
وصايف:وجدان تبيها اخلصوا
معاذ لف على وليف وهمس:روحي بسرعه تكفين
ضحك فيصل بصدمه وقال:معاذذ
معاذ:والله ماامزح روحي وليف
وليف كانت تناظره بصدمه وقالت بهمس:
تحبها وتحبك
ناظرها معاذ بإستغراب وقالت وليف:فيصل اتركنا شوي
مشى فيصل يتركهم ولفت وليف على معاذ وقالت:كانت تبيك تعرف انها موجوده داخل ، وهذا واضح ، وانت تبيها تعرف انك موجود ، لانك ضحكت بصوت عالي وناديتني بصوت عالي ، تبيها تعرف أنك موجود وراها ومعاها وحوالينها ، وهي كذلك
معاذ بهدوء:لاتلومين قلبي اذا حبها ، وليف ، أنا كنت بلا شعور وأنتي تعرفيني ، جت هي غيرت كل حياتي ، غيرتني ، كنت أبي أجرحها وأحرجها قدامكم كلكم ، لأنها كانت تحرجني ، ولا تهتم ، مع أنها كانت طقطقه ، بس ماكنت أهتم أهم شي عندي أني أردها لها ، بس
تكتفت وليف تناظره وقالت:بس وشو كمل !!
أبتسم معاذ وقال:بس قلبي حبها ، وليف ، قاعد أتخيلها بثوب الفرح ، تدخل تملك قلبي تملكني
إبتسمت وليف تناظره وقالت:أنتظرها باقي أسبوعين وتخلص عدتّها
معاذ:أعدها يوم يوم عشان تخلص وأشوفها قدامي
وليف:يلا يلا برا
ضحك معاذ يطلع برا ورجعت وليف للمجلس وجلست جنب وجدان وهمست:
يسأل عنتس
سكنت ملامح وجدان تسمع وليف وكملت:
بس تدرين معاذ طلع يحبتس من قلبه
ناظرتها وجدان وهمست:بإختصار لأنه معاذ ومايلعب
قاطعتهم ذكرى وهي تقول:كم عمرتس ياورد
ورد بإبتسامه:٢٦ سنة
تكتفت وليف تناظرها بسخريه وقالت بيان:
العمر كله ، ماتزوجتي للحين صح؟
رفعت حاجبها ورد وقالت:حبيت واحد بس للأسف ، طلع متزوج
وصال:بتتزوجينه؟ترا بتصيرين خرابة بيوت وسراقة رجال
ضحكت وليف بهدوء تناظر ملامح ورد وقالت:والله ياورد وصال صادقه ، خذي لتس واحد عزابي أحسن
ورد ناظرت وجدان وقالت:فيه ولد خالته كبري أدعي ينفع
وجدان:تبين شي من ريحة الحبايب؟خذي سواقهم أحسن ، يمكن ولد خالته يحب
وقفت غزلان وقالت:يابنات تعالو نقعد
قاطعتها وليف وهي تقول:بغرفة نياف ، مرييحة مره
بدور:غرفة زوجتس أكيدد مريحة
إبتسمت وليف ووقفت تطلع من المجلس ولحقوها البنات إلا ورد اللي جلست تناظر مكان وليف بغيض
دخلت وليف غرفة نياف وقالت:لاتخربون غرفته بالله ، ولا ترشون عطر ، ريحة عطره حلوه
وصايف:وانتي صادقه ريحة عطره حلوه ، لازم أسرقه منه
جلست وليف على الأرض وهي تقول:خذي عطر عز شتبين بعطر نياف
ناظرتها وصايف بهدوء وجلسو كل البنات ودخلت ورد الغرفه وجلست معاهم
ورد:وليف بسألك
وليف:اسألي
ورد:إنتي تزوجتي نياف عن حُب؟
وصال:سوري وليفي بجاوب عنتس ، أخذوا بعض عن حُب ، ولا بعد حُب طفولة
رفعت ورد حاجبها تناظر إبتسامة وليف المستفزه
رحيق:شرايك نلعب؟
غاده:وش اللعبه؟
رحيق:وليف ، جيبي إيباد نياف من الدرج
وقفت وليف تجيب الإيباد ومدته لرحيق
وإبتسمت رحيق تناظر خلفية إيباده وقالت بهمس لوليف:زوجتس مهووس
وليف:شعرفتس أنتي هذي صوره تحليليه لغمّور
بيان:حاملل؟
وليف:لا
وجدان:متأكده؟
وليف:شفيكم بنات ، لو حامل بقول لكم
مواليف:ناشبين لتس ياعمة نياف
وليف:زوجة نياف أنا مو عمته
هتاف:ماعلينا رحيقوه وش اللعبه
رحيق:أعترافات
بيان:نبدأ من عند غزلان
غزلان:طيب بسأل ، وجدان
عدلت وجدان جلستها بحماس وقالت غزلان:من أكثر شخص تحبينه ، حسستس بالأمان ، خلاتس تحبينه ، منهو؟
وجدان بهدوء:العاشق الولهان
عقدو البنات حواجبهم بإستغراب إلا وليف اللي إبتسمت هي و وصال و وصايف
وديان:توي أدري أنك تحبين
بدور:طيب يلاا بيان اسألي وحده من البنات
بيان:وصايف ، أختاري وحده بالجلسه ودتس تكونين نفس شخصيتها
وصايف:وجدان
إبتسمت وجدان وقالت وصايف:لأنها قويه ، شخصيتها قويه بشكل فضييع
حضنتها وجدان من كتوفها وقالت غزلان:يلا ورد دورتس
ورد:وليف ، لو مكسب عمرك شخص من بيكون؟
إبتسمت وليف من تذكرته هو ماتذكرت غيره خطر على بالها من سألتها ورد هالسؤال
هديل:يلا وليف جاوبي
وليف:نياف ، أبو غمّور
غاده:أذكري سبب
وليف:بدون سبب ، شخص ملكني وملك قلبي ، أكيدد بيكون مكسب عمري
وديان بإبتسامه:الله يديمكم لبعض
إبتسمت وليف ولفت على صوت جوالها من دق ووقفت تآخذه وتطلع من الغرفه ردت وهي تقول بهمس:نياف
إبتسم نياف يناظر المطار قدامه وقال:وليفي
إبتسمت وقالت:وصلتو المطار؟
نياف:اييه تونا نزلنا نبيّ ندخله
وليف:أنتبه على نفسك
أشر نياف لسلمان يسبقه وقال:إنتي اللي أنتبهي على نفستس ياوليفي ، أما أنا بحفظ الرحمن
وليف بهدوء:نياف لاتنسى
نياف:بعد شهر ترجع ماتطول هناك؟صح ذا اللي كنتي بتقولينه؟
وليف:أيوه
نياف:أبشري ، وسمّي ، ومن عيوني ، شي ثاني ياحبيبتي؟
تنهدت وليف وقالت:سلامتك
عقد نياف حواجبه بإستغراب من تغير نبرتها وقال:وليف ، فيتس شي؟
وليف:لا
نياف:متأكده؟
وليف بهمس:نياف لاتسافر
نياف بهدوء وهو يسحب شنطته يرجع لـ الأوبر:تعالي عندي
همست بربكة:وين !
نياف:بالفندق ، باقي أربع ساعات على رحلتي تعالي
هزت رأسها بالنفي وقالت:لا ، مستحيل ، بيشكون
نياف:وليف ، أنا بكلم معاذ وأقوله يجيبتس
وليف:طيب ، أنتظرك ترد ليّ خبر
قفل منها نياف وأرسل لمعاذ يجيبها وأرسل لسلمان يرجع لـ الأوبر
سلمان:وش عندك ، لايكون كنسلت السفره
نياف:ماكنسلتها ، بس بتجيني أم غمّور
سلمان:ماشبعت منها؟كل هذا حُب؟شوي وتشفطها تراك
نياف:سلومم
ضحك سلمان وصد يناظر الطريق
-
بعد أسبوعين
-
بيت أم ذياب
-
تحديداً مجلس الرجال
-
تركي:يالله حيّها
سكتت وجدان تناظره وكمل تركي:وش اخبارتس ياحبيبة أبوتس؟
ماردت وجدان عليه وكمل:عايض كلمني وقال ليّ أنه بيرجعتس
رفعت حاجبها وجدان تناظره وأنهى كلامه وهو يقول:وأنا قلت له أني موافق ، باقي إنتي موافقه؟
ضحكة بسخريه وقالت:بترجعني لشخص كان مسجون؟طول الثلاث الشهور اللي فاتت؟أعذرني لكن ، أنت صاحي؟ تقول لي موافق؟ - صرخت فيه - تقول موافق؟بترجع تعيشني عيشه زباله؟
تقدم لها تركي ورفعت يدها توقفه وقالت:
أنت السبب في كل شي ، مو نياف ، أنت السبب - صرخت  تردد - أنت السبب
لفت تطلع من المجلس ومسكها تركي وصرخت فيه ترفع يدها تكسر درج الكاسات
وقالت:لاتلمسني لاتلمسني ، أنا أبوي مات بالنسبه لي ، أبوي مات من زوجنيّ واحد مايخاف ربي ، أنت تركي ، وأنا وجدان ، ماني بنتك ولا برجع أكون بنتك
دخلت أمها وقالت:مايصلّح ياوجدان أبوتس هذا
وجدان:توي أدري والله ، أبوي اللي باعنيّ كأني سلعة رخيصه عنده؟أبوي اللي مد يده عليّ عشاني رفضت أتزوج شخص ما أبيه؟
أبوي اللي رفض شخص أحبه عشان شخص مُجرم؟أبوي اللي كان يعرف أني أنضرب لكن ماجاء أخذني؟أنا من رجعت مع نياف ، أعتبرت أن أبوي ميت
-
طلعت من مجلس الرجال وهي تحاول تآخذ نفس ، رفعت يدها على صدرها تحس بحرارة تحرقه
لفت على صوته وهو يقول:وجداني !
أمتلت عيونها بالدموع تناظره همست تناظره:مو هِنا
هز رأسه يفهمها وأنطلق يدخل السطح
غمضت عيونها تنزل دموعها بتعب
وشدت على قبضت يدها تدخل البيت تتوجه للسطح
كان واقف ينتظرها بـ لهفة ،بـ شوق ، بـ حنين
فتحت الباب وناظرته واقف قدامها مُبتسم كـ عادته ركضت ترفع نفسها له وتحضنه
تحتاج حضنه أكثر من أيّ شي ثاني ، تحتاجه جنبها ، تحتاجه وتبغاه ، أشتاقت له وجداً
-
محمد عبده يقول :
‏"بغيت اقوى على بعدك
‏وراح الصبر ما مداني
‏اهز الشوق وان طاح
‏الوله بالحضن وضميته"
‏تحاول تتصبّر و تنسى و تنشغل بنفسك و حياتك يا انسان ما تدري ان الشوق اقوى منك و بياخذك لذاك الغايب وبيرميك في دنياه حتى وهو بعيد عنك ، بكل مرّه تحس انّك تخطيت تلقى صورته بوجهك و بتشوفه بوجيه اللي حولك و حتى بأحلامك لو فكرت ترتاح ،
‏طرى على بالي محمود درويش وهو يقول :
‏"فبعضي لديّ وبعضي لديك
‏وبعضي مشتاقٌ لبعضي فهلّا أتيت!!"
-
بكت بحضنه ، على كتفه
رفع يده يمسح على ظهرها وهمس:رديتيّ رُوحي ، اليوم أقدر أقول ، يامرحبا باللي مر حبها وأحياني يا وحدةٍ ماكنها إلا ضلع من ضلوعي و ‏يامرحبا ياللي وجودك ما كنه
‏الا المطر لا ابطى علينا وسير
بّعدت عنه ومسحت دموعها وقالت:
وحشتني
رفع يده يحاوط وجهها وقال:وحشتيني أكثر ، ثلاث شهور كأنها ثلاثين سنه
مسكت يده اللي على وجهها وهمست:معاذ
رفع عيونه لعيونها وهمست من جديد:أحُبّكْ
إبتسم يناظرها وأنحنى يُقَبّل خدها
-
الله يرزقكم شعور لذّة الانتصار مثل محمد عبده يوم قال :
‏"حنّا اجتمعنا وشمل العاشقين التمّ
‏ خضنا حروب الهوى فزنا و ردينا"
‏والله اللي يحبّك بيحارب عشانك وبيضحي وبيجيك كله ، عشانك بيدخل المعارك بقلب قوي يحرُسه الحب ويطوّقه "انت" وكأنك الدرع الواقي لروحه..
‏لتصبح انتصاره اللي انتهى بك..
‏قاوم وحارب وحاول مهما كانت الظروف ومهما تعددت الاسباب قاتِل بترممك لذّة النهايات وكيف لو النهاية كانت شخصك
-
يقول عباس ابراهيم :
‏"اللي جذبني لحبّك يالحلو نظره
‏منها عرفت المحبّة والزمن جاني"
‏وهذا والله يخليني اتساءل ، كيف ممكن من نظره يا انسان تطيح على وجهك وتسلّم روحك وقلبك لشخص؟
‏يُقال في لغة الحب بأن نظرة العينين إن صدقت أخرست اللسان ، وفعلًا والله النظرة اقوى انواع التواصل وممكن تعبّر عن اللي بقلبك بدون ما تحكي او تنطق و لا حرف ..
‏تذكّرت مقولة لابن سهل الأندلسي يقول فيها :
‏" ما استُكمِلت لي فيكَ أولُّ نظرةٍ
‏ حتى علِمتُ بأنّ حُبّكَ فاضِحي"
‏و "عسى النظرة تردّ الروح" بس .....
-
كل ورد الحبّ في قلبي نبت
‏ و أزهرت روحٍ يعطرها شذاكِ
‏ سامرتني نجمة الليل و سرت
‏ و أشرقت شمس الاماني في لقاكِ
ياكل الأماني والشعور
-
شد على يدها وقال:أقدر اسأل الحين؟
هزت رأسها بالإيجاب وقال:وش أخبارتس؟
عساتس مرتاحه هِنا؟علمينيّ كل شي
إبتسمت تناظره وقالت:كنت مو بخير ، وتويّ أصير بخير ، وكنت مو مرتاحه ، وتويّ أصير مرتاحه
رفع يده لشعرها وقال:نفس الشي ياوجدان العاشق الولهان
إبتسمت بهدوء وقال:تدرين ، صدق طلال مدّاح يوم قال ، أصدق الأقوال مصدرها العيون ، وماتبينه من عيوني بس قولي وش تبين
ناظرها وقال:أضحكي بشوف غمازتس
إبتسمت لـ الحد اللي بانت فيه غمازتينها وقال:طحت بغرام الضحكه و الغمازتين
شدت على يده وقالت:بطلبك طلب
إبتسم وهو يناظرها وقال:آمري وتدللي ياعيوني وأطلبيّ مابغيتي منيّ
إبتسمت بهدوء وقالت:أبيك
ناظرها بصدمه وقالت:أبيك ، تقول للبنات والعيال أننا بنجلس برا كلنا نفس جمعتنا الدايمه ، بس هالمره بدون نياف ، وبعد قول لجده وخالاتي وأمي يجون معانا
أشر على خشمه وقال:على خشمي ، شي ثاني
هزت رأسها بالنفي وإبتسم بهدوء ومشى بيطلع لكنها حضنته من ورا وقال بضحكه:
كل ذا شوق؟لو أني داري كان جلست عندتس من الليل لين النهار
-
بيت أم ذياب
بعد صلاة العشاء
-
ام وصايف:وش عندك يامعاذ مخلينا نجيّ
معاذ وهو يصب قهوه:أبد والله ، أشتقت لجمعتنا وقلت أرسل لكم نتجمع
ام ذياب:زين ماسويت
ام فهد:هالمره معاذ اللي جمعنا مو نياف
ام يوسف:الله يرجعه بالسلامه ويجمعنا من جديد
يوسف:يامعاذ أرسلت لسعود والعيال يجون ويجيبون خواتهم؟
سعود من ورا يوسف:جيناك
يوسف:الطيب عند ذكره أقلط
هتان:بدون ماتقول بنجلس
جلس عز وقال:معاذوه وش عندك على العمامه والثوب؟
معاذ:بطلع البدوي اللي بداخلي اليوم
وصال بمزح:وشو لايكون بترقص قزوعي؟
معاذ:ايبالله برقص قزوعي
وصال:أمزح لاتصدق
معاذ:مصدقتني إنتي؟تراني كذاب
فهد:خالي ذياب وينه
معاذ:قال بيجي بعد شوي
فيصل:تدرون ودي نسوي عشاء
معاذ:لمن؟
فيصل:لنا يعني كلنا
يوسف:فيصل ، طلبتك أسكت
فيصل:أسمعوني طيب
معاذ:أنطق يابعد طوايفي كلها أنطق
إبتسم فيصل وقال:نبي نغني تكفون
سعود:وش تبينا نغني
فيصل:مفتون قلبي
وصايف:بصور أصبروا
يوسف:ركزو على معاذ وعمامته بالله
معاذ:ليه لايق عليّ يعني؟
فيصل:لابس الاغنيه تصلح لك
ام وصايف:يلا غنوا ياعيال
صفقو العيال كلهم بحماس وكانو البنات يصورون " وكان جوالها هي بس مركز عليه "
رددوا بصوت واحد وعالي:مفتون قلبي في هوى الغزلان يا عبيد مسكين طراد الهوى واكبر بلواه يشوقني ترف الحشا في لفتة الجيد لي مر صوبي بالعمالهْ ثقل أخطاه أقول يازول المها ياباشة الغيد أرفق بحال المبتلى أنت سبب داه أقفى وخلاني وحيد أقطع البيد لحول أشبيدي تعدتني مطاياه طفل سنا خده كسر عيني من بعيد سبحان رب صوره يوضي من أغطاه يمشي يدق كنه يساير صوت تغريد ينساب مثلاة النهر من زين ممشاه
ام فهد:وقفوا ياعيال وغنوا يانار شبيّ من ضلوعي حطبكي
معاذ:وشو ذي ياخاله ، مانعرفها
يوسف:وش بتغني
معاذ:عطشان
فيصل:عطوه مويه
معاذ:اسمها عطشان
سعود:عرفتها عرفتها
معاذ:غنّ معاي وأسحب عليهم
إبتسم سعود وقال:يلا
رددوا هو ومعاذ بصوت واحد: عطشان يا برق السما بموت من طول الغياب بموت من كثر الظما وأنا على متن السحاب خطاك في عيوني صواب حبك بقلبي منتحي مكتوب ومقدر كتاب نقش بحجر ما ينمحي أصفق جناحي في هواك مشتاق لك ميت عليك القلب من حرقه غلاك وده بلا موعد يجيك أصفق جناحي في هواك هواك مشتاق لك ميت عليك القلب من حرقه غلاك وده بلا موعد يجيك عطشان يا برق السما بموت من طول الغياب بموت من كثر الظما وأنا على متن السحاب ، ماجيت في الموعد وراك
وش صار مدري وش حصل كان السبب ذولا وذاك أبعتبر عذرك وصل معذور من عقب التعب مسكون قلبي بالعذاب مالي على الدنيا عتب ولاعلى الغالي عتاب
-
نطقت ام ذياب بهدوء:أبعتبر عذرك وصل معذور من عقب التعب يانياف
تلاشت إبتسامة الجميع من نطقت ام ذياب بهالجمله وقالت ام يوسف:يايمه قلنا لتس بيرجع ماهوب صغير عشان نخاف عليه
مضاوي:اييه ماهوب صغير بس ولدي راح وراه ، ولدكم سربوت بس ولدي
قاطعتها وجدان وهي تقول:مضاوي ، أسكتي ، توتس تدرين ان سلوم ولدتس؟وإنتي ضاربته قبل لايسافر؟والله ما إنتي صاحيه
" كان يتأملها ولايّمل كانت تُعتبر له لوحة مُجسده على أرض الواقع ، كان يسمع كلامها موسيقى "
تنهد بحُب وناظروه كلهم بضحكه وتنهد من جديد وقال:ايوالله ياويل قلبي من الحُب
ام وصايف:تحب؟
تنهد معاذ من جديد وقال:ياخاله أنا هييمااان
وصال:تكفى معاذ ، نبيّ شعر
معاذ:يا أعظم من بقى يلمح في وجهي نوري الوقّاد تعال أسرقني من سُخف الحياة وعالمٍ فاضي
رفع جواله من جته رساله منها مكتوب فيها:
وطن عمري ، عيونك ديرتي
إبتسم ووضحت غمازته وقال فيصل:عشتت يامعاذ عشتتت
وقف معاذ وقال:فيصل تعال معاي
وقف فيصل معاه وقرب منه وقال:ريحة عطرك حلوه وشهي؟
معاذ:جاني هديه
يوسف:من بنت ولا ولد؟
معاذ:ولد
فيصل:وش تبيّ أخلص
سحبه معاذ لداخل وقال:تبيني أذبحك؟ترا عادي عندي
فيصل:وش سويت
معاذ:وش ماسويت قاعد تجيب العيد
فيصل:معاذوه
قاطعها معاذ من سحب عصى ولحق فيصل
صرخ فيصل برعب وطلع لبرا وهو يصارخ
ام يوسف:وش فيييه
فيصل:يالمجنون خلاصص
معاذ:والله يافيصل لاتندم على سوالفك ذيّ
يوسف:بوجهي يامعاذ
معاذ:مالك وجه عندي
ضحكت بيان تناظر يوسف ووقف يوسف يلحق معاذ ولف عليه معاذ وقال:والله لاتتصفق مع أخوك الوصخ
جلس يوسف برعب وقال:كنسلت خلاص
وقفت غزلان ومشت توقف قدام معاذ وقالت:عشان خاطري أتركه
فيصل:يالبيه ياغزلان
نزل معاذ العصاة وقال:بس عشانتس غزلان
فيصل:والله يامعاذ لو نياف هنا يذبحك ، يغار على غزلان غييره مو طبيعيه
معاذ:فيصل !
سكت فيصل ومشو يجلسون وقال ذياب وهو متوجه لهم:على الصراخ اللي قبل شوي أحسب نياف جاء
وليف:أصلاً بيجي قريب
لفو عليها كل الموجودين وقالت ام ذياب:
ليه هو مكلمتس
وليف:لا ، بس أحساسي يقول كذا
رفع سعود جواله وقال:يابنات يلا
محمد:تو الناس ماجلستو
سعود:والله بنروح ننام وبنحرك
فهد:ليه ناوين ترجعون؟
سعود:لا بنروح عمره بس عز اللي بيقعد هنا
يوسف:درب السلامه إذا وصلتو طمنا
سعود:أبشر
ومشو يطلعون وبس عز اللي جلس ببيت ام ذياب
-
فهد:جتني لكم فكره
معاذ:وشهي
فهد:نسافر كلنا من بنات وعيال
يوسف:وين نسافر؟
فهد:تبيّ خيارات يعني؟
يوسف:اييي
فهد:كل واحد فينا يقترح مدينة ونختار
معاذ:لندن
وليف:برضو لندن
وصايف:النمسا
بيان:ايطاليا
وصال:لندن
مواليف:أنا مع وليف لندن أحسن حاجه
فيصل:مع زوجتي ، لندن
بدور:النمسا
محمد:بالي
هديل:الدوحة
غاده:ميلانو
فهد:باقي عز و وجدان وغزلان
عز:هولندا
وجدان:القصيم
ناظروها كلهم يكتمون ضحكهم وقالت:
لاتفوتكم أجواء القصيم ، تهبلل
معاذ:يقصدون مدينه خارج ربوع بلادنا
وجدان:مدينة الأحلام ، باريس
فهد:أنا أقول لندن
يوسف:آخر شي وش؟
غزلان:لندن
معاذ:يسعدد دينتس يا أحلى خاله بالعالم
يوسف:نحجز يعني؟
معاذ:دقيقه ، مانبي بزارين
وصال:وش تقصد؟
معاذ:إنتي كبيره أقصد رُوح
مواليف:لا رُوح بتروح معانا ، ما أقدر أخليها لحالها تطفش
فيصل:ناخذها ليه لا
بدور:محفولين مكفولين؟
يوسف:أبددد التذاكر عليّ ، والفندق بعد
وليف:طيب يا حضرة المهندس نبيّ نعرف أجواء لندن
فتح يوسف جواله وقال:فيه بروده شوي يعني خذو شي يدفيكم
معاذ:أنتظر بدخل على التذاكر
لف فيصل على ام ذياب وامه وقال:ماتجون معانا؟
ام ذياب:لا
ام يوسف:لا بنجلس هنا
يوسف:فيه تذاكر
معاذ:أيّ يوم؟
يوسف:بعد يومين
غزلان:مايمدينا
معاذ:أحجزهم
يوسف:أرسلوا بيناتكم وجهزوا بكره وخلصوا كل شي
معاذ:خلونا نسوي قروب
فيصل:دقيقة أصبروا
يوسف:وشو
فيصل:نبيّ نقسم كل شي من الحين
معاذ:سهله ، بكره نروح نجهز ، واليوم اللي بعده نرتب الشنط واليوم اللي بعده نروح للمطار ، ونتوجه للندن ، وبنكون حاجزين سيارة كبيره تكفينا كلنا والفندق بنحجزه والباقيّ أتركوه عليّ
غزلان:سويت القروب بس دخلوا عز
"أرسلوا كلهم بيناتهم على رقم يوسف وحجز يوسف التذاكر"
يوسف:تجهزوا ورانا سفرة
فيصل:دقيقه
يوسف:أدري بتقول المقاعد ، أنت ومواليف ، وهديل و وليف ، وعز ووصايف ، وغدو ومحمد ، ووصال وبدور ، وغزلان ورُوح ، وأنا وبيان ، وفهد لحاله
معاذ:وأنا؟
أستوعب يوسف وقال:مع وجدان
سكنت ملامحها وملامحه وقالت ام وصايف:
بدّل مقعدك مع مقعد وجدان وأجلس أنت جنب أخوك
يوسف:مايمدينا نبدل ياخاله إلا بالطياره
معاذ:حصل خير خلاص
لفت تناظره وإبتسم يناظرها
........................................
"تجهزوا ورانا سفرة"
تخيلوا أنهم بيسافرون بدون نياف وسلوم😔
الكاتبه:منيره آل عبدالعزيز💙.