بين الليل والحال هبت الذكرى

السابع والثلاثون

(استغفرالله)
فيصل:يلا يا معاذ
معاذ:أصبر
فيصل:بروح ترا اخلصني نياف ينتظر هناك
الكل طلع الا انا وانت
معاذ:جيت جيت لاتغثني
مشى يركض للسياره وحرك فيصل على طول لمكان المسابقة
-
مكان المسابقه
-
ابو ذياب:وش فيك يانياف
نياف مارد عليه وهو يناظر الأرض
باسم:نياف يا نياف
وليف بهمس لباسم:أبوي خلوه متوتر وخايف
باسم:تبين نطلع؟وتقعدين معاه؟
هزت وليف راسها بالإيجاب وقال باسم:
يلا يابنات يلا ياعيال
ام يوسف:وين؟
باسم اشر لها على نياف ووليف وفهمت وقامو يطلعون
نزلت وليف نقابها و طرحتها وتوجهت له
رفعت وجهه وقالت:نياف
سكت يناظرها وكملت:ليه ساكت؟ليه ماتتكلم؟اليوم مسابقتك وانت ساكت المفروض تكون متحمس
ناظرها بهدوء وهمس:خايف
أبتسمت تنطمنه وقالت:مافيه شي يخوف ، أنت بتنزل تحت تحقق حلمك بتحقق شي تمنيته لسنين طويله ، أنا معاك أنا هنا وحولك ، الكل معاك من جدي وجدتي إلى رُوح وهايف الكل موقف معاك مافيه شي يستحق الخوف
أبتسم بضيق وهمس:بس هم مو معاي
"أرتخت ملامحها تفهم أنه يحتاج أمه وأبوه ويحتاجهم حوله ومعاه بيوم زي هذا"
مسكت يده وقالت بهدوء:أنا معاك مهما صار بضل معاك ، بمسك يدك ماراح أتركها
ثبت عينه بوسط عينها ونطق بهدوء:ضميني!
رفعت يدينها تحاوط عنقه تحضنه تطمنه وتخليه يرتاح بهاللحظه
وخرت عنه من سمعت صوت معاذ وهو يقول:يلا يانياف ينتظرونك
وقف وناظرها ومد يده لها وقالت:أنتظرني بلبس نقابي
سرعان مالبست نقابها ومسكت يده وطلعت معاه وقال فيصل وهو يحضنه:بإذن الله الأول ياسليل المهابه
ام ذياب:بعد عن ولدي لاتذبحه
ضحكو كلهم وقال ابو ذياب:قريت أذكارك؟
هز نياف راسه بالإيجاب وقال عبدالله:حتى لو خسرت يانياف حنا معاك
أبتسم نياف يحضن عبدالله وقال باسم:يلا ياخيّالنا يلا
نياف:دعواتكم
ومشى يتركهم ومشو هم للكراسي يجلسون جنب بعض من بنات وعيال وأهلهم
فيصل:أحساسي يقول أنه بيفوز
وليف:يسمع منك
لفت وليف على صوت وديان وراها:بدا السباق؟
وليف:لاتعالي الحين يبدا
ساره:الله وكيلكم وديان من الصباح مانامت تنتظر وقت السباق
وصال:متحمسه أكثر منا
ورد:فاله التوفيق
وصايف:يابنات بيبدون بعد دقيقتين
غزلان:يمه خايفه على نياف
ام وصايف:ليه؟
غزلان:مدري خايفه يطيح
ام وصايف:استودعته الله
رُوح:خاله غدير كم باقي؟
ام وصايف:الحين يبدون
هتاف:وليف بشويش على يدتس
وليف:هتاف خايفه عليه
رحيق:أستودعيه ربي
وليف:يابنات ماشفتوه كيف متوتر لدرجة أن يده ترجف
وجدان:تطمني ماراح يصير شي هذا نياف لو ناسيه
سكتو كلهم من سمعو صوت يُعلن بداية المسابقة
كان يهمس بأدعيه كثيره وأولها أنه يفوز
صرخ بعالي صوته:يلاا ياسحابييي يلااا
ركضت سحاب بسرعه فائقه
وصرخ نياف بحماس لأول مره يعيش هالشعور لف يشوف المتسابقين اللي وراه وضحك بإنتصار لأنه تعداهم وصار قدامهم
-
بالمدرجات
-
صرخ معاذ بحماس وصار يصفر
سلمان:يارب لاترده خايب يارب
يوسف:ياعيال وقف شفيه؟
فيصل:سحاب شفيها؟
صرخ محمد بصوت عالي من طاح نياف
وليف:نيافف
مسكتها غزلان وقالت:مافيه شي
لفت عليها وليف وقالت:كيف مافيه شي؟أكيد تعور أكيدد
باسم:بيقوم ياوليف بيوقف وتشوفين
معاذ:الطيحه قويه
ناظره يوسف وقال بهمس:لاتخوفهم عليه !
سلمان:ياعياللل ركضتتت سحاببب ونياف عليهاااا
ذياب:الحمدلله يارب الحمدلله
-
رفع نياف يده بحماس يصرخ يطمنهم أن مافيه شي
صرخ بصوت عالي:سحاببييي يلا يا سحابييي
أسرعت سحاب تركض بسرعه وتتعدا المتسابقين
-
صرخت وجدان بحماس من شافت فوز نياف بعيونها
مسك فيصل شماغه ورماه وهو يقول:حيّ عينك ياولد سعودددددد
سعود:هو صدق فاز؟
هتان:اييه ايييه
صرخ سعود بحماس يرمي شماغه ويحضن هتان
لفت وليف على وصايف وقالت:فاز
هزت وصايف راسها بالإيجاب وحضنتها وليف وهي تضحك بصدمه
لف عبدالله لأبو ذياب وقال:عمي تعبان؟
هز ابو ذياب راسه بالنفي
لفت ذكرى على وليف وقالت:مدري ليه فرحانين بفوزه
ناظرتها وليف بحده ولاردت
هديل:يابنات يحمس نبي ننزل له تحت
غزلان:بيعطونه جائزته وننزل له
لفت وصايف على مواليف وقالت:شفيتس دايخه؟
هزت مواليف راسها بالإيجاب وقالت وصايف:وصال عطيني الجوكلت اللي بالشنطه
طلعت وصال الجوكلت وعطته وصايف وقالت مواليف:مافيه شي يخوف
وصايف:مالت هذا وجهي اذا خفت عليتس ثاني مره
وديان:غاده
لفت عليها غاده وقالت وديان:أنا برجع
غاده:وين؟أرجعي معاي ترا بنروح مع أبوي
وديان:أمي مابتوافق
غاده:أنا اقولها
وديان:مايحتاج
غاده:وديان تكفين
وديان:بقول لها وادعي انه تقتنع
-
بعد المسابقه
-
نزلو كلهم لـ نياف وأبتسم يشوفوهم قدامه وحوله ومعاه
ركض معاذ يحضن نياف وقال:مبروك ياللي فيك ماخابت ظنون
أبتسم نياف يحاوط اكتاف معاذ وقالت ام ذياب:يامعاذ ابي اسلم على ولدي
وخر معاذ عن نياف وتقدم نياف يبوس راس ام ذياب ويحضنها وكذلك ام سعد
لف لأبو ذياب وقال ابو ذياب:تعال تعال
ضحك نياف يحضن ابو ذياب ويبوس راسه
وبعدها لف لفيصل وصرخ فيصل بأعلى صوته يحضن نياف بقوه
ضحكو كلهم على ردة فعل فيصل
غزلان:فيصل !! بسلم على نياف وخر
فيصل:مو وقت سلام ذا وقتت أحتفال
ضرب نياف كتف فيصل وتقدم يسلم على خالاته وباسم وعبدالله وتركي
غزلان بهمس لنياف:ماتبي تسلم عليها؟
نياف بنفس الهمس:مو هنا ياغزلان سلامها غير ويسلب عقلي مني !
طارت عيون غزلان لأنها ماقدرت تصفي نيتها أبداً
ابو ذياب:خلونا نرجع البيت عشان تجهزون لملكة يوسف وبيان ووصايف وعز وحفلة فوز النوفي
نياف:ماتقصر يا أبوي ، بس
ابو ذياب:لا بس ولا غيره رح انت ووليف لبيتكم وتجهزوا وتعالو لنا وانت بعد يافيصل
لف يناظر وليف وقال:اجل يلا ياوليف
فيصل:يلا ميمي
رُوح:لاتقول لها ميمي !
فيصل:وش اقول اجل ؟
رُوح:قول مواليف
بدور:يمه ياطول اللسان والغيره
رُوح:ميمي أبغى أروح معاكم
فيصل:أكيد لا
رُوح:نيياف شوف فيصل
ضحك نياف يناظر فيصل وقالت ام فهد:
مافيه يارُوح أغراضتس كلها عندنا
رُوح:أبغى أروح مع ميمي
مواليف:مره ثانيه يا رُوح
رُوح:ميميي
غزلان:يا ذا البزر ، خلاص طيب مايبغونك تروحين معاهم أمشي قدامي
ام ذياب:خلاص ياغزلان
غزلان:رُوح أمشي للسياره الحين
ركضت رُوح تمسك يد سلمان وقال سلمان:
مانيب نياف ترا !
لفت رُوح لنياف وقال نياف:سلومم
ضحك سلمان يمشي مع رُوح للسياره ومشو كلهم بعدها
-
بيت وليف ونياف
-
دخلت البيت وكان وراها
نزلت عبايتها والشوز ولفت عليه وقالت:
تعورت من الطيحه؟
هز راسه بالنفي وقالت:نياف ! ترا ماني غزلان عشان تسلك لي ، تعورت وهذا واضح على ملامح وجهك
تقدم وحاوط خصّرها وقال:ماتعورت ، بعدين كذا تباركين لي؟
سكتت تناظره وكمل:قولي مبروك ياحبيبي ، التجاهل هذا ما أحبه !
دفعته وقالت:وانت كذا تتجاهلني قدامهم كلهم؟ كأني مب موجوده؟تتصرف كأني مب موجوده ولا كأني زوجتك؟أذكرك لو ناسي زواجنا قبل كم يوم
غمض عيونه بآلم وهمس:مو كذا ياوليف !
لفت تعطيه ظهرها وآخذت عبايتها وطلعت فوق لغرفتهم
دخل الغرفه يشوفها جالسه تسوي شعرها ومشى يتجاهلها يطلع له ثوب وشماغ
لفت عليه و شافته يفصخ التيشيرت
عضت شفتها تمنع دموعها من شافت آثار ظهره بسبب طيحته من الخيل
وقفت تمشي له لكنه لف لها وهمست:
ماقلت لي !
همس بنفس همسها:مايعوروني
رفعت يدينها على وجهه وقالت:بس أنا عورتك !
سكت يناظرها وكملت:دفيتك وأنت متعور ، آسفه
قرب يهمس لها:أعتذري لي بـ أفعالك !
رفعت نفسها تحاوط عنقه وتقبّله تعتذر له بالطريقه اللي يحبها هو ....
-
بيت مواليف الفيصل
-
مواليف:حمار انت؟ماتفهم؟اتركني بحالي
فيصل:تستهبلين؟وربي لو انك جنيه ماقلتي كذا اهجدي
مواليف:شتقصد؟تقصد اني مثل الجني؟اعترف صرت تكرهني؟شايف لك شوفه بمكتبك؟
سكت بصدمه يناظرها وقالت وهي تبكي:
اصلا انت متغير ماصرت تجلس معاي ولاصرت تهتم فيني وصرت تتجاهلني وتصارخ علي وانا ماحب الصراخ وانت تعرف
بس مستمر تصارخ علي ! اكرهك فيصل اكرهك ، ما اطيق شوفت
قاطعها من سحبها له يقبّلها يسرق أنفاسها منها ، يثبت لها أن مافيه أحد غيرها بقلبه هو
رفعت يدها على صدره توخره وهمس هو بهدوء:أنا أفدي تراب تمشينه يابنت عبدالله وتقولين شايف لك شوفه؟وش أبي بالنجوم وأنا معاي قمرها؟تقولين متغير عليتس؟متى طلبتي شي ولاجبته؟متى زعلتي ولاراضيتس؟
قولي لي !
سكتت تناظره وسكت يناظرها أو بالأصح يتأملها
-
بيت أبو ذياب
-
بيان:شكلي حلو؟
بدور:ياحظ يوسف
لفت وصال على وصايف وقالت:اللي يشوف وصايف يقول مغصوبه على الزواج
وصايف:اسكتي وصال
وجدان:ليه تسكت تراها صادقه كأنتس مغصوبه على الزواج
غزلان:متضايقه ياوصايف؟
وصايف:الصدق ايوه ، يعني تخيلو قبل شهر بالضبط مثل ذا اليوم كنا نتجهز للعيد والحين؟وليف ماغير مع نياف ! ومواليف مع فيصل وتعبانه من الحمل ! مالاحظتو؟
غاده:ياربي متى نفتك من نياف وفيصل
غزلان:بسم الله عليهم
بيان:بس الصدق ، نياف كأنه بزر ماغير متجود بهالوليف ياولد اتركها
وجدان:تدرون ! حاسه أن فيه شي بيجينا وربي يابنات لدرجة أني قاعده مع الكل وأنا خايفه
وصال:شي مثل أيش؟
وجدان:مدري بس موب مرتاحه للأيام الجايه
وصايف:تصدقون حتى انا يعني تعب جدي والدم اللي يطلع من خشمه مب طبيعي ولايبينا نعلم نياف
غزلان:لاتخوفوني
وصال:قاعدين نقول الصدق ، ليه مايبينا نقول لنياف؟وليه ماصار يروح لمواعيده؟
وجدان:صدقوني بيصير شي وقريب بعد
بيان:بنات خلاص عاد
وصال:اسكتي بالله ، صدق الحين انا بعرف ليه مايبينا نقول لنياف؟
وجدان:لان نياف بيغصبه يروح للمستشفى والعيال ماهمهم جدي
غزلان:لاوالله؟ العيال اكثر ناس يهتمون بأبوي حتى أكثر منا حنا يالبنات
سكتو من سمعو صوت وليف ومواليف
غزلان:لاتقولون لهم شي
دخلت وليف الغرفه وشافتهم متجمعين وقالت:عشتوا بدوني؟
وجدان:انتي اللي سحبتي علينا
وليف:اصبري عندي هرج
نزلت عبايتها وجلست بين البنات وقالت:
تخيلو شصار
مواليف:انتظري يالسلقه
ضحكو البنات على شكل مواليف وجلست مواليف وكملت وليف:مو صح نياف طاح من الخيل؟وفاز السوالف اللي تعرفونها
غزلان:طيب؟
وليف:يوم رجعنا البيت صرت أهاوشه
وصايف:ليه ان شاء الله؟
وليف:قلت له ليه تتجاهلني كذا قدامهم كلهم؟كأني مب موجوده؟
وجدان:يمال الوجع طيب؟
غزلان:وجع وجدانوه ، بعدين وليفوه ترا قلت له ليه ماتسلم عليها قالي سلامها بالبيت وغير ، يعني ماتجاهلتس
وليف:وانا وش مدريني؟
هديل:وش مدريتس؟مسويه فيها أنا المهمه؟
مواليف:هديلل
سكتت هديل وقالت وليف:جايه أبغاكم تعطوني حل عشان أراضيه مو ترمون علي كلام!
وجدان:هالمره أنا مع نياف مو معاتس أبدا
لفت وليف على غزلان وقالت:وانتي؟
غزلان:مالي دخل سوالف متزوجين
وليف:شوفو أنا راضيته بس مارضى بشكل كامل
وصال:كيف راضيتيه؟
سكتت وليف وقالت غاده:ايوه كيف؟
بدور:تخيلو تكون معطيته بوسه عشان يرضى؟
وصال:أهخ أنهياريي
وصايف:وجع وصاللل
ضحكو البنات وقالت وليف:مالكم دخل بزارين آخر زمن
-
بعد العشاء
-
غزلان بتعب:ماصدقت يروحونننن تعبت
وجدان:بيان منحشره بالغرفه مستحيه
وصايف:ما الومها عروسه
هديل:حتى انتي عروسه؟
وصايف:أنا من النوع الثاني مالي خلق للحياء
وليف:غزلان تعالي
راحت غزلان مع وليف وقالت وجدان:
خشم جدي اليوم صار ينزف بقوه بالغصب وقفت الدم
بدور:اهخ ياربي مدري شفيه كذا
هديل:الوضع يخوف يابنات مب متطمنه ابدا
وصال:تخيلو يموت
ضربتها وصايف وقالت:بسم الله عليه
غاده:خلونا نجي للصدق ، لو مات وش بيصير فينا؟
وجدان:وبعدين يعني؟ماتسكتون؟انطمووو
هديل:اسكتو صدق بسم الله على جدي حبيبي
...............................
بارت تعويض عن مقلب أمس👌🏻
الكاتبه:منيره آل عبدالعزيز💙.