حكايات منار

حكاية "حنين "

فى اوضة زياد
حنين :ايه يا زيزو كنت عايز تتكلم معايا فى ايه
زياد :انا رغدة وحشتنى اوى يا حنين اوى عايز اسمع صوتها عايز اشوفها وحشنى وجودها فى حياتى عارف انها انانية ومبيهمهاش غير نفسها وانها مبتحبنيش حتى بس انا بحبها بحبها ووحشانى بتصرف قدام صحابى انى نسيتها وانها مش فارقة معايا بس الحقيقة انها بتوحشنى وعارف انها متستاهلش وانى لازم مفكرش فيها اعمل ايه طيب علشان تطلع من دماغى وتطلع من قلبى دى عملت كل اللى يخلينى اكرهها بس انا مكرهتهاش سيبتها وعارف انى مستحيل ارجعلها بس مكرهتهاش يا حنين ولسه بتوحشنى بتوحشنى اوى
حنين :حتى لو كرهتها هيفضل فى ذكريات حلوة بينكم بتفتكرها هى جزء من ذكرياتك جزء من ماضيك طبيعى تحن للماضى ده بس مينفعش تخليه حاضر
زياد :عارف اعمل ايه طيب
حنين :لما تفكر فيها وتوحشك افتكر عيوبها يا زياد افتكر كل حاجة وحشة عملتها معاك متسيبش عقلك يفتكر الذكريات الحلوة بس فحنينك ليها يزيد انشغل بحياتك بشغلك وبينا وبصحابك وقتها رغدة هتاخد حجمها الطبيعى جواك ماضى مجرد ماضى ميستحقش ولا ينفع يبقى حاضر متجلدش نفسك لما تفكر فيها بس فى نفس الوقت متسيبش نفسك للتفكير اشغل عقلك بعيوبها واشغل عقلك كمان بحاجة تانية اتفرج على ماتش العب جيم بلايستيشن مع الواد عمر اخرج مع اصحابك اعمل اى حاجة تشغلك عنها وعن التفكير فيها
زياد :تمام هحاول والحاجات دى هتخلينى انساها
حنين :هتنساها بس انت ادى لنفسك فرصة انك تنساها ومتفضلش تقول لنفسك مش عارف اكرهها بحبها وبتوحشنى عقلك بيقتنع باللى انت بتقوله فدايما قول هنساها كأنها مكنتش فى حياتى فى يوم ساعد نفسك انك تنساها وحاول تنساها بجد وانت هتنساها يا زياد
زياد :صح هنساها هى متستاهلش افتكرها

فى اوضة حنين
تقريبا النهاردة اليوم العالمى للحنين والاشتياق صاحبتى بتحن لنفسها واخويا بيحن للبنت اللى بيحبها وانا بحنلك كل كلمة بقولهالهم بتفكرنى بيك وبتزود حنينى ليك زى ما ندى بتحن لنفسها زمان بس مينفعش ترجعلها لانها كانت غلط انا كمان بحنلك بس مينفعش ارجعلك لان رجوعى ليك هيبقى غلط
زى ما زياد مش عارف يكره رغدة اللى متستاهلش حبه انا كمان مش عارفة اكرهك انا حتى مبحاولش اكره نفسى فيك انا مش عايزة اكرهك حسا انك متستاهلش الكره بس ما انا مستاهلش اللى عملته فيا استفدت ايه انت عاجبك اللى وصلناله
انا قاعدة ابص لصورتك الوحيدة اللى معايا على موبايلى وممسحتهاش بكلمها واشتكلها ببصلها وانا اوقات احس انى عايزة اضربك بونية اطرملك سنانك وابوظلك ابتسامتك اللى بحبها دى واوقات احس انى عايزاك تطلع من الصورة تقعد قدامى واعيط لحد ما اتفلق من العياط وانت تبوس راسى وتعتذرلى وتوعدنى انك مش هتعمل فيا كده تانى وننسى اللى فات كأنه مكانش
عملت فيا كده ليه يا هيثم ليه خلتنى غصب عنى بسبب عمايلك اسيبك وانا روحى فيك عملت كده ليه فى نفسك ليه تخسر قلب بيحبك وبيتمنالك الرضا ومكنش طالب منك غير انك تقدر حبه كان كتير عليا انك تقدرنى وتقدر حبى..ييييى وادى رقم غريب بيرن ومش سايبنى حتى اكلم صورتك..كنسلت عليه..امسحها طيب مانا خسرت الاصل هتفيدنى بايه الصورة..ده بيرن تانى كنسلت يكش يروح يشوف غيرى يعاكسها..تفتكر لو مسحتها هنسى ملامحك هنسا شكلك اللى حافظاه اكتر من شكلى..ربنا يسامحك على اللى عملته فيا ده ويسامح البارد اللى مش مبطل رن ده انا هرد اهزقه