ချောင်ဟုန်ယဲ့က ချောချောမွေ့မွေ့ အကြံပြုလိုက်ပြီးနောက် ဆက်ပြောလာသည်။
"ကျွန်မက ကျင်းယွင်ကျောင်းနေတဲ့နေရာကို ရှာနိုင်တယ်၊ ပြီးရင် အိမ်မှာ ဘယ်သူမှ မရှိတဲ့အချိန် ရှင်က တံခါးဖြတ်ပြီးဝင်လိုက်။ အောင်မြင်ရင် ကျွန်မတို့ တစ်ဝက်စီ ခွဲယူကြမယ်"
"ညီမလေး ချောင်၊ မင်းက ပိုပြီးတော့ လိမ္မာပါးနပ်လာတာပဲ။ ဘာမှ အားစိုက်ထုတ်တာမရှိဘဲနဲ့ မင်းက အကျိုးအမြတ်တွေ ရနိုင်ဦးမယ်၊ မင်းရဲ့အဖေကိုပါ ညီတူမျှတူထဲ ပေါင်းထည့်လိုက်သေးတယ်"
ကောင်းရှင်းက ပြင်းပြင်းထန်ထန် လှောင်ပြောင်နေသောအသံဖြင့် ပြောလိုက်သည်။
ချောင်ဟုန်ယဲ့က နှုတ်ခမ်းတွန့်၍ ပြုံးလိုက်၏။
"ကျွန်မ အဖေ ဘယ်လိုလဲဆိုတာ ရှင်သိပါတယ်။ သူက ကျင်းယွင်ကျောင်းရဲ့ ပစ္စည်းတွေအားလုံးကို ရသွားရင်တောင်မှ ကျွန်မကို မြို့တော်က အကသင်တန်းတွေဆီပို့ဖို့ လိုအပ်တဲ့ ယွမ်သောင်းဂဏန်းကိုတောင်မှ ပေးဖို့ ဆန္ဒရှိမှာ မဟုတ်ဘူး"
ချောင်ဟုန်ယဲ့သည် သူမ၏ အဖေက သူမအား မက်လုံးတစ်ခုပေးရန် ပြောခဲ့ခြင်းသာဖြစ်ကြောင်း သူမ၏ နှလုံးသားထဲက ရှင်းရှင်းလင်းလင်း သိနေ၏။ သူသည် ပစ္စည်း လက်ထဲရောက်သည်နှင့် သူက သူမ မင်္ဂလာဆောင်လျှင် ထည့်ပေးရမည့် ခန်းဝင်ပစ္စည်းအတွက် ငွေစုနေကြောင်း ပြောမည်မှာ အသေအချာပင်။ ထို့နောက် သူသည် သူမ အဝတ်အစားဝယ်ရန်အတွက် အများဆုံး ယွမ်ရာဂဏန်းသာ ပေးလိမ့်မည်။
ထိုသည်နှင့် နှိုင်းယှဥ်ကြည့်ပါက အဘယ့်ကြောင့် ကောင်းရှင်းနှင့် မပူးပေါင်းရမည်နည်း။ သူမ၏ အဖေသည် ထိုကိစ္စကို လုပ်ရန်အတွက် လူတစ်ယောက်ကို ရှာတွေ့သောအခါ အရာအားလုံးသည် နောက်ကျလွန်းသွားပြီ ဖြစ်လိမ့်မည်။ အကယ်၍ သူသည် ဘာမှ ရှာမတွေ့ပါက သူမကို အပြစ်တင်လိမ့်မည် မဟုတ်ဘဲ ဒေါသများကို ကျင်းယွင်ကျောင်းအပေါ်၌သာ တစ်ဆင့် ပုံချလိမ့်မည်။
ကောင်းရှင်းသည် စီးကရက်တစ်လိပ်ကို ထုတ်၍ အနည်းငယ် ဖွာလိုက်သည်။ မီးခိုးငွေ့များကို မှုတ်ထုတ်၍ သူ၏ ရှေ့တွင်ရှိသော အရွယ်ကောင်း မိန်းမပျိုလေးကို အကဲခတ်လိုက်၏။ ထို့နောက် အကြောင်းပြချက်အချို့ကြောင့် သူသည် ကြောက်ရွံ့တုန်ယင်သွားသလို ခံစားလိုက်ရသည်။
Chapter 98
Start from the beginning
