ဝေကျွမ်းရွှယ်ကျား (ဘာသာပြန်)

အခန်း(၈၂)

伪装学渣
Wei Zhuang Xue Zha

UNICODE

ဘာလောင်းမှာလဲ

ရှဲ့ယွီသည် ဟယ့်ကျောင်းထံ ဘတ်စကက်ဘောအားလက်နောက်ပြန်ပစ်ပေးလိုက်ပြီးနောက် နှစ်ဦးသားနေရာချင်းလဲလိုက်ကြသည်။

ဟယ့်ကျောင်းသည် ဘောလုံးအားပုတ်ကာပုတ်ကာသယ်သွားရင်း ဘတ်စကက်ဘောကွင်းအပြင်ဘက်ကလူတစ်စုထံ ဖျတ်ခနဲအကြည့်ရောက်မိ၏။ ရာသီဥတုကပူတာကြောင့်လည်း လော်ဝိန်ချန်မှာ အားကစားအင်္ကျီလက်ပြတ်ကိုသာဝတ်လို့ထား၍ လက်မောင်းကြွက်သားတွေကထင်းခနဲ။

ဟယ့်ကျောင်း လှမ်းလှမ်းကြည့်နေမိ၏။

"သူတို့?"

ရှဲ့ယွီသည် အပေါ်ဝတ်အင်္ကျီကဇစ်အားအောက်သို့ဆွဲချရင်း ဟယ့်ကျောင်း၏အာရုံကတခြားရောက်နေလျက်ဖြင့် ဘောလုံးပုတ်နေဟန်အားကြည့်နေမိသည်။ 'သူတို့'နေနေ ဘာနေနေအရေးစိုက်ဖို့စိတ်မဝင်စားလေရာ မျက်မှောင်ကြုတ်လျက်ပြောလိုက်ပါသည်။

"သေချာအာရုံစိုက်။"

"မဟုတ်ဘူး ၊ သူတို့တွေ ကျောင်းသူနှစ်ယောက်ကိုဝိုင်းထားပြီး ဘာလုပ်နေကြတာလဲ. . .  . . ."

ဟယ့်ကျောင်းစကားပင် ပြောမဆုံးသေး ထိုကျောင်းသူနှစ်ဦးမှာ လက်ချင်းတွဲထားကြရင်း ဝမ့်သာဘေးမှနေတိုးလို့ထွက်သွားကြ၏။

ကျောင်းသူနှစ်ဦးမှာ ပြေးတာမှတန်းလို့ ကျောင်းအားကစားပွဲ မီတာ(၁၀၀)ပြေးသည့်နှုန်းဖြင့် ပုံစံတွေကလန့်ပြေးပုံရကာ အသက်လုနေရသကဲ့သို့ပင်စာသင်ဆောင်ထဲပြေးဝင်သွားကြသည်။

. . . . . .

ဟယ့်ကျောင်းမှာ ထိုဖြစ်ရပ်ကိုနားမလည်ဘဲရှိရင်း အကြောင်းအရင်းအားလည်းမတွေးတောမိ။

လော်ဝိန်ချန်တို့ကိုယ်တိုင်လည်း သိပ်ပြီးနားမလည်ဖြစ်သွားရသည်။

ဝမ့်သာမှာ နေရာတင်ရပ်လျက် ခေါင်းကိုကုတ်မိ၏။

"ဘာလို့ပြေးတာတုန်း?"

လျှိုချွိင်ဟောက်က ပြန်လို့တွေးကြည့်မိသည်။

"ငါတို့ခုနကပြောတဲ့လေသံကလည်း အဆင်ပြေပါတယ် ၊ နွေးထွေးပြီး ယဉ်လည်းယဉ်ကျေးတဲ့ဟာ သူတို့ကိုခက်ခက်ထန်ထန်ကြီးလည်းမပြောလိုက်ပါဘူး။"