Good Riddance (DS #2)

Chapter 37

Inubos niya na ang spaghetti at saka tumayo para kumuha ulit sa buffet table niyon.

"Chrisee! Lalapitan namin si Mr. Valleroso. Sama ka?"

Nilingon niya ang mga ka-officemate na dalawang taon niya nang kasama pero she didn't bother to memorize and even know their names. Basta, ito 'yung mga tsismosa at sabik sa mga guwapo.

"Kayo na lang, kumakain pa 'ko," she declined, politely. Inayos niya ang suot na salamin sa mata. "Baka makausap ko rin naman si Mr. Valleroso mamaya since kasama ako sa private meeting nila ni Sir Bari."

"Nako, ang suwerte mo, ha? Ikaw ang ginawang assistant para kay Mr. Valleroso! Si Sir Bari pa nag-appoint!" Pabirong inirapan siya ng nagsabi niyon. "Favorite ka yata ni Lord?"

"Baka kasi mas komportable sina Sir Bari sa may asawa na, dahil baka kapag kayong mga dalaga, ma-harass niyo sila?" she said with humor, but a little bit of sarcasm.

"Grabe ka naman!" Pabiro pa siyang hinampas sa braso at nagtawanan ang mga ito.

Ibinalik niya na ang atensyon sa spaghetti.

"Joke time lang naman. Malandi lang kami kapag nakatalikod, pero behave naman kami kapag nakaharap ang mga boss. Unless, sila ang unang lalandi. Hindi ako tatanggi!"

Tawanan ulit. Blair silently rolled her eyes.

"Uy, tanong natin si Mr. Valleroso tungkol sa suot niyang singsing. Confirm natin kung may asawa na."

"Sandali, dadalhan ko ng juice si Sir. Na-corner na siya kanina pa. Baka uhaw na."

"Hala, ako rin! Sandali, magdadala ako ng sandwich. Baka gutom na rin si Mr. Valleroso!"

Pinanood ni Blair kung paano magkumahog ang mga ito palapit kay Jack. Dala ng isa ang isang baso ng orange juice at ang isa ay sandwich.

She saw how Jack acknowledged them.

"Mr. Valleroso, inom po muna kayong juice baka nauuhaw na po kayo."

"Mr. Valleroso, sabayan niyo na po ng sandwich. Eto po..."

Mabait nitong tinanggap ang mga iyon. "Thank you. I appreciate these. Nakakain na ba kayo?"

"Sir, pagkakita pa lang namin sa 'yo, nabusog na kami," biro nung nag-aaya sa kanya kanina.

Nagkatawanan. Jack chuckled, too.

"Mr. Valleroso, ano po palang gusto niyong itawag namin sa inyo? 'Sir Jasiel' or 'Sir Jacquin'?"

"Whatever you find comfortable to call me. I can adjust."

"Paano, Sir, kapag gusto namin kayong tawagin na 'baby'?"

Tawanan ulit. Napailing-iling na lang si Jack pero nakangiti habang iniinom ang juice.

Napansin ni Blair na wala na ang Kuya Bari niya sa kuwarto. Kaya pala ang lakas ng loob ng mga babaeng iyon na magbiro ng ganoon.

"Ang ganda naman ng singsing niyo, Sir! Bagong kasal po kayo?" panghuhuli ni officemate tsismosa number one.

Napatingin si Jack sa singsing nito. Pagkuwa'y tumingin ito ng diretso sa kanya!

Napalingon pa si Blair dahil baka may iba itong tinitignan at nasaktong nasa line of vision lang siya. Pero pagbaling niya ulit dito ay nanatiling nakatitig si Jack sa kanya. Napayuko siya sa spaghetti.

"Sir?"

"I was married since 2009."

Singhapan. "Ang tagal na po pala, Sir!"