مقدمة دموية مدمِّرة رقيقة من القلب يالَّا نقتل الرومانسية والحُب في بيوتنا الكتاب ده عامل زي دليل الكشافة بتاع سوسو ولولو وتوتو في مجلة ميكي اللي بيلاقوا فيه حلول لكل حاجة، بإختصار الكتاب ده مش ممكن تستغنوا عنه في حياتكم الزوجية أبدا، أصلكوا هتلاقوا فيه الطرق اللي تقتلوا بيها الحب والرومانسية والهيام والغرام في بيوتكم بسهولة وبسرعة وبطرق مضمونة ومُؤكدة ومُجربة، هتلاقوا البهريز والخلاصة والزتونة بتاعت خبرات كتيرة جدًا قمت بجمعها من بيوت بايظة كتيرة أوي وبأقدمها لكم كهدية مميزة في هذا الكتاب المعجزة. الكتاب ده مش بيتكلم كلام عام، لأ، Absolutely ،ده بيحط لكم نقط محددة وخطوات واضحة ومباشرة علشان تعرفوا تنفذوا الخطة، وواحدة واحدة هتوصلوا في يوم من الإيام لهدفكم الكبير، وهو قتل الحب في قلبك شريك الحياة وانتم ضميركم مستريح، وكمان هتقدروا تشتكوا للناس وتقولوا لهم بكل جراءة وبراءة "شريك حياتي ما بقاش يحبني"، والناس هتطبطب عليكم وهيتعاطفوا معاكم، وممكن كمان الدمعة تِفِر من عينيهم. الكتاب ده معجزة لإنه ينفع للجنسين، يعني ينفع الرجالة والستات، وكلمة شريك الحياة في هذا الكتاب بتعني (زوج/زوجة). بالتوفيق لكم جميعا. من قلب إيهاب عبد الواحد
55 parts