- شوفوا الحاجة الحلوة جوة أي حاجة بتحصل،
- حاولوا تعملوا تمرين تأمل Meditation كل يوم،
- إصلحوا بين الناس لو تقدروا، علشان ده له أثر غير مباشر على إصلاح الحياة مع شريك الحياة،
- اقرأوا كتب في مجالات متنوعة،
- صلوا مع بعض بخشوع،
- خصصوا وقت كل يوم للمشي باستمتاع، ويا ريت ترسموا إبتسامة جميلة على الشفايف،
- إتعرفوا على هوايتكم اللي ربنا خلقها فيكم وميزكم بيها عن غيركم،
- لازم تحلموا ببكرة، ويكون عندكم يقين إن بكرة أحلى بكتيرمن النهاردة،
- إستمتعوا بالأكل اللي بتاكلوه وبالشرب اللي بتشربوه وبالهوا اللي بتتنفسوه،
- الحياة بتبقى قصيرة وضيقة علينا لما بنضيعها في الكراهية، بس بتبقى ممتدة ورحبة لما بنملاها بالحب،
- اعرفوا إن سعادتكم هي مسئوليتكم الشخصية، مش مسئولية حد تاني،
- تهادوا تحابوا، وبالذات من غير مناسبة،
- سافروا رحلات سفاري، وراقبوا النجوم والكواكب، وشوفوا أعماق البحار وأعالي الجبال،
- لازم تجربوا تغطسوا ولو مرة واحدة في حياتكم، ولو مش قادرين، عليكم بالسنوركلينج،
- اتعرفوا على تاريخ بلدكم، واعملوا سياحة داخلية،
- إفطروا من عربية فول، واتغدوا في محل كشري، واتعشوا شاورمة سوري، وربنا يستر،
- إمشوا حافيين علشان دايما تفرغوا الطاقة السلبية اللي في جسمكم،
- سامحوا الجميع بلا إستثناء، وابدأوا بمسامحة أنفسكم ومسامحة شريك الحياة،
- إلعبوا الرياضة اللي بتحبوها،
- إعرفوا نفسكم من جوة،
- ما تهتموش برأي الناس فيكم، دي مجرد وجهة نظر محدودة لشخص مختلف عنكم،
- خلي عندكم مرونة في كل حاجة في حياتكم، وصاحبوا الناس المرنة المتفائلة،
- اكتبوا في ورقة كل أحلامكم، وعلقوها في حتة تشوفوها دايما،
- خلوا كلامكم كله إيجابية وتفاؤل،
- كونوا من الناس اللي لما بيدخلوا مكان تلاقي ابتسامات كتيرة اترسمت على الوشوش،
- اتفرجوا باستمتاع على أي منظر جميل حواليكم علشان تحسوا بجمال خلق الله،
- خلوا الحواس مرهفة علشان تستقبلوا معطيات أكتر من الكون، فتفهموا الحياة أكتر،
- كل واحد يحاول يعرف إذا كان "بصري" أو "سمعي" أو"حِسي/حركي"، هتفرق معاكم أوي،
- ادرسوا علوم أنماط البشر علشان تزداد الرحمة في قلوبكم تجاه خلق الله،
- الحياة معناها التغيير والتنوع المستمر، والنمط الثابت المحدد هو شهادة وفاة لشخص يتنفس،
- المرونة هي قدرتكم على أن تتعاملوا بأنماط مختلفة من غير ما تتمسكوا بنمط معين أوي أو تسيبوا نمط معين تماما،
- اتعلموا تتحكموا في كل مشاعركم وردود أفعالكم، فالمشاعر شيء يمكن التحكم فيه، وكل ما وعيكم بنفسكم وبجمالكم وبقوتكم هيزيد، هتلاقوا نفسكم أكثر ثباتًا وثقة، ويبقى عندكم ثبات إنفعالي،
- اتعلموا إن مافيش حاجة اسمها موقف صعب، بس في حاجة اسمها أنا ما كنتش مرن كفاية علشان كده إتوجعت، أصل الوجع بييجي لما ما يكونش في مرونة كافية،
- مهما كان شعوركم، إستيقظوا, وانطلقوا،
- عليكم بصلة الأرحام، وهي علاقة متبادلة، فمش مهم مين يبدأ،
- كونوا متفائلين دايماً وسعداء، ده أصله قرار،
- دلعوا نفسكم ، ودلعوا شريك الحياة،
- حبوا كل حاجة في نفسكم، وطلعوا أجمل نسخة منكم، وساعدوا الناس يطلعوا أجمل ما فيهم،
- دايما الإختبارات بتيجي في الحاجات اللي بنتعلق بيها، علشان كده قللوا تعلقاتكم بالدنيا وخليكم خُفاف زي العصفورة، ولا تتعلقوا إلا بالله،
- إبعدوا عن التليفزيون وعن وسائل التواصل الإجتماعي بقدر الإمكان، دي كلها حاجات بتسحب طاقاتكم الإيجابية وبتملاكم طاقة سلبية من غير ما تحسوا،
- بلاش تجلدوا نفسكم لما تغلطوا، إتعلموا من الغلط، وفكروا هتعملوا إيه مختلف المرة الجاية، وده من أنواع الذكاء العاطفي،
- تقبلوا النقد بهدوء وفكروا فيه بحيادية،
- إوعوا تقارنوا نفسكم بأي حد في أي مجال في الحياة، أصل كل واحد منكم خلق فريد من مخلوقات الله، ما فيش حد زيه قبل كده، ومش هيكون في حد زيه بعد كده،
- اشغلوا وقتكم بكل شيء مفيد، وخلوا بالكم من الفراغ لإنه لص محترف عايز يسرق عمركم،
- استمتعوا بكل التناقضات اللي في شخصياتكم، يعني استمتعوا إنكم بتعرفوا تاكلوا بالشوكة والسكينة واستمتعوا إنكم بتعرفوا تاكلوا الحمام والمانجا بإيديكم وبرجليكم كمان، استمتعوا بكل الجمال اللي ربنا خلقه جواكم وبيطلع في الوقت الصح بتاعه،
- اهتموا بمظهركم الخارجي وخلوا أهم صفة هي النظافة والبساطة،
- خليكم دايما على طبيعتكم وفطرتكم الجميلة،
- خلوا عندكم ثقة إن الحاجات اللي بتعملوها بتصنع الفرق،
- اهتموا بنفسكم واهتموا بالآخرين، وده هيخلي بينكم وبينهم ثقة متبادلة،
- ادرسوا الذكاء العاطفي والذكاءات المتعددة، بجد هتفرق أوي في حياتكم،
- طلعوا أجمل ما فيكم لشريك الحياة علشان تكونوا مثال حي لأولادكم، علشان انتم مش متخيلين مدى تأثر حياة أولادكم في المستقبل بالحاجات اللي بيشوفوها منكم مع بعض، وده هيكون موضوعنا في الكتيب القادم بإذن الله.
أنت تقرأ
هنحط السيخ المحمي في صرصور قلبه - شريك الحياة
Romanceمقدمة دموية مدمِّرة رقيقة من القلب يالَّا نقتل الرومانسية والحُب في بيوتنا الكتاب ده عامل زي دليل الكشافة بتاع سوسو ولولو وتوتو في مجلة ميكي اللي بيلاقوا فيه حلول لكل حاجة، بإختصار الكتاب ده مش ممكن تستغنوا عنه في حياتكم الزوجية أبدا، أصلكوا هتلاقوا...
