هنحط السيخ المحمي في صرصور قلبه - شريك الحياة

12- قلة الذوق

يمكن الموضوع ده مش هنتكلم فيه كتير لإنه بالفعل منتشر جدا في أغلب البيوت، قلة الذوق مفعولها قوي جدا سواء مع العصبية أو من غيرها، طبعا العصبية بتخلي مفعولها أقوي وشكلها أحلى، بس على فكرة هي لوحدها كفاية. وقلة الذوق مش معناها شتيمة، بلاش تفهموني غلط أصل الشتيمة دي قلة أدب. قلة الذوق ليها معاني كتير أوي.

واحد من معانيها إن كلامكم يكون دبش وغير آدمي، يعني عادي إنكم تقولوا جمل مركبة لذيذة زي: في ستين داهية، إيه الأرف ده، تصرف زبالة، يخرب بيتك، جتك نيلة، إلى أخره من الجمل المركبة الرقيقة دي.

وكمان قلة الذوق ممكن تكون في التصرفات، فمثلا لما الموبايل يرن، تلاقي شريك الحياة بيشاور للأخر بدون كلام إشارة معناها "هات لي الموبايل" أو تلاقيه بيطرقع له صوابعه وبيشاور على الموبايل، أو مثلا تلاقيه يقول "حد يجيب لي الموبايل" (مع العلم إن مافيش حد في البيت غيرهم)، لما الأكل يتحط على السفرة ابدأوا كلوا على طول من غير ما تنتظروا شريك الحياة علشان انتوا جعانين، وأول لما تخلصوا أكل قوموا على طول وسيبوا شريك الحياة لوحده، وبالطرق الناشفة دي أكيد هتقتلوا أي حب أو رومانسية في مهدها.

قلة الذوق ليها بُعد تاني أعمق من مده شوية وهو مد الإيد بهزار، يعني كل شوية تضربوا شريك الحياة بالقلم على وشه أو على قفاه بهزار، ولازم تضحكوا بعدها، تبقوا قاعدين تروحوا حادفين مخدة في وشه، وبرضه لازم تضحكوا بعدها، تبقوا معديين من جنبه تروحوا زاقيين الورق اللي أدامه على الأرض، وبرضه لازم تضحكوا بعدها جامد من كتر اللذاذة وخفة الدم. الحركات دي مهمة جدا وبتخلي الطرفين يفقدوا احترامهم لبعض تماما وبمنتهى السرعة. وكمان مع أول خناقة بجد، مد الإيد بيبقى سهل أوي من الطرفين، وهو ده المطلوب علشاب العلاقة تبقى مشعللة.

ولما توصلوا لمرحلة متقدمة في قلة الذوق وتبقى هي دي طبيعتكم، هتلاقوا نفسكم بتعملوا حاجات لذيذة جدا تلقائيا بتقتل أي حب، يعني هتلاقوا نفسكم عادي جدا لما شريك الحياة يكون نايم بتتكلموا بصوت عالي، أو كل شوية تفتحوا الباب وتقفلوه بعنف، أو مثلا ترشوا روائح أو بارفان في الأوضة اللي شريك الحياة نايم فيها، وبالتالي تقلقوا منامه وراحته، وأعرف ناس بيصحوا شريك الحياة لما بيكون نايم علشان يتخانقوا معاه، ودول طبعا مثال ناجح ومتفوق جدا في قلة الذوق.

وإياكم والإعتذار، انتوا ما عملتوش حاجة غلط علشان تعتذروا، دي مجرد قلة ذوق عادي جدا، والمفروض شريك الحياة يستحمل.

وسيبكم بقى من اللي بيتكلموا عن حسن المعاملة بين الزوجين وإننا لازم نحترم بعض ونبقى حنينين على بعض، وهتلاقي الواحد منهم مثلا بيقول "حبيبتي، ممكن تجيبيلي الموبايل"، أو مثلا "لو سمحت وانت راجع ممكن تشتري عيش"، أو مثلا "بحس إني بأخف أسرع لما الدوا بيكون من إيديك"، وكمان تلاقيهم بيوصفوا شريك الحياة اللي بيمد إيده على الأخر سواء بهزار أو بجد إنه كان طفل بيتهان كتير وبينضرب كتير أو وهو صغير بسبب أو بدون سبب، وبيطلع الكبت أو العقدة النفسية اللي عنده على شريك الحياة. (الناس دي مش عارفين حلاوة الهزار السخيف الرذل بتاع مد الإيد، هما لو جربوه هيحبوه أوي).