هنحط السيخ المحمي في صرصور قلبه - شريك الحياة

18- ماركة ودع أهلك

لما يكون شريك الحياة برة البيت في شغل أو في مشوار، انسوه خالص وكأنه مش موجود في حياتكم، أصل الحب والرمانسية والكلام ده كله وهم.

والمصيبة إنكم تلاقوا بعض الناس لما شريك حياته يبقى برة البيت تلاقيه كل شوية يشعلل عواطفه ومشاعره حتى ولو بكلمة واحدة أو بكلمات بسيطة في مكالمة سريعة أو في رسالة على الموبايل "بحبك" "وحشتني" "وحشتيني" "جمالك مالي عينيا"، والمصيبة بتكون أكبر لما تلاقي التاني بيرد عليه.

والناس اللي بالي بالكم عندهم أفكار غريبة أوي، يقولوا اكتبوا على ورقة كلمات حب رقيقة لشريك الحياة نابعة من القلب زي: صباح الخير ، أنت روحي ، بموت فيك .... ، وإلى غيرها من الكلمات التي تفعل العجائب في قلوب وأحاسيس الرجال والنساء ، وحطوا الورقة دي في مكان يكون مفاجأة بالنسبة لشريك الحياة، يعني مثلا تحت المخدة، على مراية الحمام، في جيب من جيوبه ، أو على كرسي العربية اللي بيقعد عليه. (دي عالم فاضية وما وراهاش حاجة مهمة يعملوها).