هنحط السيخ المحمي في صرصور قلبه - شريك الحياة

9- أسماء الدلع

يعني إيه تنادوا شريك الحياة باسم دلع، أحسن يفتكر نفسه حاجة أو يبتدي ياخد عليكم. نادوه باسمه عادي خالص، بس في نفس الوقت لازم هو يناديكم بإسم دلع: هو هينشف عليكم ولا إيه.

بس طبعا برة البيت ممكن تنادوا أي حد، رجالة أو ستات بأسامي الدلع، أصل انتوا لازم توجدوا علاقة طيبة مع الناس الخارجيين، أما شريك الحياة فيكفيه فخرًا إنكم قبلتم إنه يكون جزء من حياتكم.

المصيبة إن في ناس بيقولوا إن أولى الناس بالدلع وبأسامي الدلع هو شريك الحياة، ده في ناس ممكن ينسوا اسم شريك حياتهم الحقيقي من كترة ما بيدلعه، وبيقولوا إن ده بيزود الحنان بين شريكي الحياه وإن ده بيحسسهم براحة نفسية في البيت لإن أسامي الدلع بتكسر حواجز نفسية كتيرة بين شركاء الحياة، وتلاقيه يسألك سؤال خبيث: يا ترى بتدلع شريك حياتك ، ولا سايبه ينتظر الدلع من جهات خارجية. (إوعوا الكلام ده يهزكم أو يخدعكم، هو شكله مغري وشكله صح، بس ولا يهمكم، الثبات على المبدأ حتى لو كان غلط).