هنحط السيخ المحمي في صرصور قلبه - شريك الحياة

1- إهتموا بإعطاء شريك الحياة الأشياء التي لن يستطيع أحد سواكم أن يعطيها لهم:

في نوعية من الأزواج كل واحد منهم فاكر إن دوره في الحياة إنه يجيب فلوس، ويكون السواق، وشوية وظائف تانية كده وبس، ودي كلها حاجات ممكن أي حد يقوم بيها مقابل راتب.

وفي نوعية من الزوجات كل واحدة منهم فاكرة إن دورها في الحياة إنها تغسل وتنضف وتطبخ، وشوية وظائف تانية كده وبس، ودي كلها حاجات ممكن أي حد يقوم بيها مقابل راتب.

والإتنين مش واخدين بالهم إن أهم وظيفة في الحياة الزوجية هي تغذية بيت الزوجية بالحب والرومانسية والهيام والغرام والدفء والدلع والتفاهم والحوار والطبطبة والإحتواء والتقبُّل والقُبُلات والهمسات واللمسات والضحكات والإبتسامات والهدايا والعطايا والمشاعر والنظرات والحنان، والحاجات دي ما فيش حد يقدر يغذي بيها البيت إلا الزوجين وبس.

وكمان في معلومة مهمة أوي لازم تعرفوها. الدراسات أثبتت إن الأزواج السعداء مش أغنى ولا أذكى ولا أكثر ثقافة ولا أكثر فهما لعلوم النفس ومهارات التفاوض من الأزواج التعساء. الحكاية كلها إن الأزواج السعداء عندهم ذكاء عاطفي عالي، وده اللي بيخليهم يعرفوا يسيطروا على المشاعر السلبية ويمنعوها من السيطرة على علاقتهم وهما بيختلفوا أو حتى بيتخانقوا، فبتفضل المشاعر الإيجابية هي اللي على الوش، فبيكون عندهم الحافز للإستمرار مع بعض.