في أزواج كتير فاكرين إن الرومانسية هي الحياة الجنسية، وده مش صحيح، أصل الجنس هو حالة مؤقتة بتخلص في دقايق بمجرد انتهاء الشهوة، وطبعا هو مهم جدا لإنه هو الوقود اللي بيشعلل نار الحب ويزود توهجه في الحياة الزوجية. أما الحب والرومانسية فدول بقى حاجة موجودة في كل وقت وفي كل مكان وممكن تستمر للأبد، علشان كده ممكن يكونوا أسلوب حياة، فمثلا، وده على سبيل المثال لا الحصر:
- السلام بطريقة جميلة على شريك الحياة وانتوا داخلين البيت أو وانتوا خارجين من البيت بيملى الحياة الزوجية بدفء غير عادي، وكلما ازدادت حرارة السلام كلما ازداد الدفء،
- ابتسم دايما في وجه شريك الحياة، فالابتسامة مُعدية ومفعولها سحري في إستمالة القلوب، ويا سلام على ابتسامة جميلة أول لما نصحى من النوم لبعضنا البعض،
- وسع مفرداتك العاطفية، وأكثر ونوَّع من كلمات الحب، وخلي صوتك مليان بالمشاعر،
- الإهتمام بالعطاء تماما كالإهتمام بالأخذ، يعني خليها علاقة متوازنة،
- الأحضان والطبطبة، مشاهدة التليفزيون في حضن بعض،
- الأحضان ثم الأحضان ثم الأحضان، أصل في ناس ما بيعرفوش يحضنوا وفي ناس ما بيعرفوش يتحضنوا، مع إن الأحضان ليها فوائد كتيرة أوي في البيوت،
- لما تتمشوا إمسكوا إيدين بعض، مش كل واحد ماشي لوحده،
- إفتح باب العربية لزوجتك قبل ما تركب أنت السيارة،
- الصلاة مع بعض في جماعة، والتقرب إلى الله مع بعض،
- إظهار التقدير للطرف الآخر كل ما يعمل حاجة حلوة حتى ولو بدون قصد،
- روحوا أماكن جديدة ومختلفة ومش لازم تكون غالية،
- لما شريك الحياة يحكي لك حاجة كذا مرة، حسسوه إنكم مش زهقانين، ومش لازم تكبسوهم وتقولوا "انت قلتها ميت مرة قبل كده"، اسمعوا وابتسموا،
- في كل أسبوع خلُّوا في ليلة سحرية، اخرجوا إتعشوا برة في أي مكان ولو بسيط، أو اعملوا أكلة جميلة في البيت، ولعوا الشموع وانتوا بتاكلوا، إلبسوا ملابس جميلة، قولوا لبعض أجمل وأرق كلمات الحب والغزل، دي بتكون أحلى فرصة للإعتذار عن أي سوء تفاهم حصل من أي حد فيكم، اتكلموا عن المستقبل المشرق اللي بتحلموا بيه مع بعض، خلوها ليلة جميلة ممتعة،
- اهتموا برقة ونعومة قلوبكم زي ما بتهتموا برقة ونعومة بشرتكم، أصل مش عيب إنكم تهتموا برقة ونعومة بشرتكم، بس العيب إنكم تهتموا بالبشرة وتسيبوا قلوبكم قاسية ومأشِفة،
- نادوا على بعض بأسماء دلع، وبلاش تنادوا بعض بكلمة "بابا" و"ماما"، ده بيبوظ طاقة المشاعر في البيت، أصل هو مش أبوكي وانتي مش أمه،
- إخترعوا مسابقات مع بعض، مثلا مين يكتب قصيدة شعر للتاني، مين يختم المصحف الأول، مين يطبخ أحلى أكلة، مين يعمل مفاجأة غير متوقعة للتاني، .....
- بتبقى جميلة أوي لما يبقى في لمسات رقيقة رايحة جاية ما بين الطرفين، يعني وهما خارجين هو يقول لها شكلك زي القمر وهي تقول له وانت لبسك هياكل منك حتة، ولو في عزومة هو يحطلها أكل في طبقها، فتقوم هي تحطله الحلويات في طبقه، ولما يكونوا بيشتروا حاجات من السوق، هي جابت له حاجة ساقعة يقوم هو بعد شوية يجيب لها أيس كريم، هو بيعامل أهلها كويس وهي بتعامل أهله كويس، يجيب لها حاجة كان نفسها فيها في عيد ميلادها، تقوم هي تجيب له حاجة بيحبها بدون مناسبة، ............
على فكرة، الأفكار والأمثلة على الحياة بحب وبرومانسية مالهاش حدود ولا نهاية، وباب الإبتكار فيها مفتوح على الآخر.
YOU ARE READING
هنحط السيخ المحمي في صرصور قلبه - شريك الحياة
Romanceمقدمة دموية مدمِّرة رقيقة من القلب يالَّا نقتل الرومانسية والحُب في بيوتنا الكتاب ده عامل زي دليل الكشافة بتاع سوسو ولولو وتوتو في مجلة ميكي اللي بيلاقوا فيه حلول لكل حاجة، بإختصار الكتاب ده مش ممكن تستغنوا عنه في حياتكم الزوجية أبدا، أصلكوا هتلاقوا...
