هنحط السيخ المحمي في صرصور قلبه - شريك الحياة

26- اسرقوا منهم حريتهم، وإمنعوهم من إنهم يتمتعوا بتنوعات الحياة:

لازم تتأكدوا إنكم أصبحتم عبيد لمجموعة اللوازم والضروريات والمفروضات والخطوات والحواجز والمصاعب اللي بتحطوها دي علشان تسرقوا حرية شركاء الحياة في التمتع بتنوعات الحياة. وكمان هتسرقوا منهم المرونة ، وهتسرقوا منهم فكرة تقبل أي شيء مختلف عنهم.

وأكبر دليل إنكم نجحتم في هذا إنكم هتلاقوا كل حاجة في البيت ليها نظام أو جدول ثابت وصارم مليان قواعد وتفاصيل، وكمان هتلاقوا في اهتمام كبير جدا برأي الناس عنكم.

في حد أعرفه وبأعتبره مثال ناجح جدا في مجال السيطرة على الحياة عمل جدول أسبوعي لنفسه ولشريك حياته، والجدول ده بيوضح إمتى بيصحوا، إمتى بيدخلوا الحمام، هيفطروا إيه، هيلبسوا إيه، هيتغدوا إيه، هيتعشوا إمتى، هيمارسوا الحب إمتى وإزاي، هيستحموا إمتى، هيتفرجوا على قنوات إيه في التليفزيون وإمتى، ...

وكمان الموضوع ممكن يزيد نجاحه أكتر، ففي بعض البيوت بيكون في قائمة باللوائح والطقوس والترتيبات عند الخروج، عند السفر، عند الأكل، عند الإستحمام، عند استقبال ضيوف، ...

طبعا أصحابنا اللي بالي بالكم بيهاجموا الكلام ده وبيقولوا إن مشكلة التعايش مع هذه الأنظمة المحكمة بيخلينا خايفين جدا من الحياة لإننا لا نثق في إنها هتمشي زي ما إحنا عايزين، وكمان بتخلينا نُحكم على كل شخص مختلف عننا بإنه فاشل وهمجي وعشوائي وغوغائي، وكمان إننا مش بنعرف نتعامل مع الناس اللي مش زيينا لإننا مش متقبلينهم من الأصل، وكمان بنكون عنيفين جدا في الدفاع عن أفكارنا ويا ويله ويا سواد ليله اللي يحاول ينتقدنا أو يعدل علينا. (الناس دي مش فاهمة جمال الأنظمة اللي بنحطها علشان نعيش على خط واحد ووتيرة واحدة).