هنحط السيخ المحمي في صرصور قلبه - شريك الحياة

31- مات الكلام:

أحب دايما أفكركم بأسهل طريقة لخسران قلب شريك الحياة: بلاش حد منكم يكون هيِّن أو ليِّن أو سهل مع شريك الحياة، يعني بلاش ياخدوا عليكم أوي لدرجة إنه يقدر يقول رأيه فيكم أو في تصرف بتعملوه أو في أي حاجة تخصكم. أنتم بالنسبة لشريك الحياة خط أحمر لا يمكن يتعداه. وعلشان توصل لده لازم يكون عندك بعض التكتيكات الخاصة زي مثلا: كل لما يتكلم معاك اتعصب ووقفه عند حده، اعمل فيها غبي ومش فاهم لحد ما تقطع نفسه، اعمل نفسك مش مهتم لحد ما يزهق، استهزأ بكلامه فمش هيتكلم في الموضوع ده تاني، افتكر له مشكلات قديمة علشان ينسى الموضوع اللي كان بيتكلم فيه، ........

طبعا الناس اللي بالي بالكم ليهم رأي تاني في الموضوع ده، بيقولوا إن الشخص اللي بيكون صعب الكلام والحوار معاه هو شخص عنيد وغير مرِن بالمرة، وإن هذا الشخص جاهل بآداب الحديث والحوار بين شريكي الحياة، وإن لما شريك حياتك يكون متضايق منك في حاجة، افتح له الباب علشان يتكلم ويقول اللي مضايقه، بس لازم يكون بطريقة مقبولة ومافيهاش تجريح، وبلاش تكون من الناس اللي عندهم مشكلة في سماع النقد عن نفسهم، لإنك بكده بتمنعه من حقه في أن يحاول يقول اللي جواه، وده هيؤدي إلى إحتقان وغضب مكتوم، وشريك حياتك هيتحول إلى قنبلة موقوتة ممكن تنفجر في أي وقت. (الناس دي بتلوث أفكارنا وفطرتنا بالحاجات الغريبة اللي بيطلعوا بيها دي. يعني إيه آداب الحديث والحوار).