هنحط السيخ المحمي في صرصور قلبه - شريك الحياة

20- اغطس جوة مشاكلك وانسى الدنيا كلها

إتعودوا دايما تهتموا بنفسكم وبس، ومع التعود على هذا السلوك الأناني هتتحولوا لمخلوق ما بيفكرش غير في نفسه وبس، وبيعتبر إن الكون كله بيدور حواليه، والمخلوق ده اسمه العلمي Self Centered . ولما تبقوا كده هتلاقوا نفسكم دايما بتتبلعوا في مشاكلكم أو في شغلكم أو في أي حاجة بتعملوها لدرجة إنكم هتنسوا إن لكم شريك حياة عايش معاكم أصلا. ودي برضه من الطرق المؤكدة الفعالة لفقدان حب شريك الحياة لإنكم بتحسسوه إنكم مش طايقينه وإنه عبء عليكم وإنه مالهوش مكان في حياتكم.

في ناس بقى بيحاولوا يرسموا دور العقل والحكمة فتلاقيهم يقولوا إننا كلنا ساعات بنتبلع في مشاغل معينة، بس مهما اتبلعنا مش لازم يكون على حساب شريك الحياة، يعني كل يوم لازم تقعدوا مع بعض شوية ، ومش لازم يكون قبل النوم على طول وانتم نعسانين ، اقعدوا مع بعض نص ساعة من غير موبايلات أو أي شيء يشغلكم عن بعض ، واتكلموا في مواضيع خفيفة ، أو حتى ممكن تقعدوا ساكتين .

والسبب في كده إن الحب في العلاقة الزوجية هو حب مكتسب مش حب فطري، وبالتالي لازم على طول نغذي الحب ده بالإهتمام والرعاية والتواصل علشان يستمر في التوهج. (طبعا ده كلام ناس فاضية وعايزة تحب وتتحب).