دي طريقة جميلة أوي وقوية جدا علشان تقتلوا كل حاجة حلوة عند شريك الحياة. الموضوع ببساطة إن لما شريك الحياة يعمل لكم أي حاجة حلوة، اشكروه مرة أو مرتين بالكتير وخلاص على كده. أصل لو فضلتوا تشكروه هيحس إنه كويس ويمكن يبقى مغرور. فبالطريقة دي مش هيحس إنه بيعمل أي حاجة كويسة، وكمان دي هتكون فرصة ليكم إنكم تشتكوا إنه إتغير وما بقاش يحبكم زي الأول.
حبايبنا الحلوين بتوع الصحة النفسية بيقولوا إننا لازم نبطل سياسة الحق المُكتسب دي علشان بنفقد بسببها كل الحاجات الإيجابية اللي شريك الحياة بيعملها لنا، وبيقولوا إننا علشان الحب يفضل في البيت لازم يكون في تغذية من الطرفين لإن أي مشاعر أو توهج من طرف واحد هينطفي بعد فترة بسيطة لو ما فيش وقود يغذيه من الطرف الأخر، يعني تقول تِسلم إيديك بعد أكلة حلوة، تقول تِسلم أفكارك بعد خروجة جميلة، تقول تِسلم الصُحبة الجميلة بعد رحلة ممتعة، تقول يِسلم ذوقك مع أي هدية، والتعليقات البسيطة دي هي الوقود لشعللة الحب والإبقاء على الحاجات الحلوة. (هيدخلونا دلوقتي كمان في أنواع الوقود، وده يا ترى سولار ولا بنزين).
YOU ARE READING
هنحط السيخ المحمي في صرصور قلبه - شريك الحياة
Romanceمقدمة دموية مدمِّرة رقيقة من القلب يالَّا نقتل الرومانسية والحُب في بيوتنا الكتاب ده عامل زي دليل الكشافة بتاع سوسو ولولو وتوتو في مجلة ميكي اللي بيلاقوا فيه حلول لكل حاجة، بإختصار الكتاب ده مش ممكن تستغنوا عنه في حياتكم الزوجية أبدا، أصلكوا هتلاقوا...