هنحط السيخ المحمي في صرصور قلبه - شريك الحياة

6- اللي في قلبي على لساني

لازم كل واحد منكم يكون انسان صريح وواضح وصادق مع نفسه علشان يفضل قلبه أبيض، وبلاش يكون خبيث وسوسة، علشان كده كل اللي في قلبكم لازم يطلع على لسانكم من غير تفكير أو فلترة أو تحلية أو تنقية أو تصفية أو تورية، يعني قولوا اللي انتوا عايزينه، قولوا اللي حاسين بيه، مش مهم إذا كنتم هتجرحوا شريك الحياة أو هتهزوا ثقته بنفسه أو هتهتكوا عرضه أو هتشعللوا معاه حرب أو هتقتلوا قلبه.

في ناس غريبة بتقول إن المبدأ ده غلط وغير آدمي، وإن في حاجة اسمها ذكاء إجتماعي وذكاء لفظي، وإن الواحد لازم يفكر في الكلام اللي هيقوله لشريك الحياة قبل ما يقوله، وإن ده هو اللي بيبين آدمية الإنسان وسعة صدره وقدرته على الصبر، وكمان بيقولوا كلمة غريبة أوي، بيقولوا إن الكلمة اللي بتطلع ما بترجعش تاني، وإن اللسان ممكن يعور ويكسر. (مش عارف بيجيبوا الكلام الغريب ده منين).