هنحط السيخ المحمي في صرصور قلبه - شريك الحياة

21- لا تهتموا بتفاصل شريك الحياة الخاصة أو العامة أو الهامة:

النقطة دي برضه هي المقياس بالنسبة لكل شخص ترقى وأصبح مخلوق Self Centered . هتلاقوا نفسكم ما تعرفش إيه الحاجات اللي شريك الحياة بيحبها أو إيه هي هواياته ( الرحلات – الكتابة - متابعة النجوم والكواكب – أكلات معينة – الرسم – الرياضة – الغناء - .... )، فلما تلاقوا نفسكم مش عارفين حاجة عن تفاصيله، اعرفوا إنك نجحتم في طرد شريك الحياة من سجل أولوياتكم، ودايما اتهموه إن هو شخص غامض ومش واضح زيكم فعلشان كده إنتم مش عارفين تعرفوه من جوة. والكدبة دي بتخش على أي حد.

هتلاقوا بقى الناس إياهم ينصحوكم بإنكم لازم تتابعوا شريك الحياة بإهتمام وبحب علشان تعرفوا هو بيحب إيه، وإن ده له مفعول السحر، وحاول تعرف إيه الألوان اللي بيحبها، الشيكولاتة اللي بيحبها، الأكلة اللي بيحبها، الموسيقى اللي بيحبها، العطور اللي بيحبها، الكُتب اللي بيحبها. وكمان هيطلبوا منكم إنكم تبدأوا تشاركوه في بعض هذه الهوايات أو الأشياء اللي بيحبها، وعلى فكرة ، انت مش لازم تحب الحاجة اللي الطرف الأخر بيحبها ، المهم يكون عندك تقبل للحاجة دي واستعداد إنك تقضي بعض وقتك فيها ، ولو في حاجة مش حاببها ، بلاش تحقر منها أو تستهزأ بيها ، ودور على حاجات تانية من اهتمامات الطرف التاني علشان تشاركه فيها. طبعا مش هتشاركه فيها كلها ، بس بتكون حاجة جميلة لما بيكون في أراضي صلبة بتعرفوا تقفوا عليها مع بعض. (أرض صلبة إيه وأرض مسفلتة إيه اللي بيتكلموا عنها الناس دول).