هنحط السيخ المحمي في صرصور قلبه - شريك الحياة

32- الإنتقاد واللوم الدائم:

في ناس عندها الموضوع ده موهبة من وهما صغيرين، يعني عينيهم بتجيب أي حاجة غلط "من وجهة نظرهم"، وعلى طول يبينوا عدم رضاهم لشريك الحياة عن الغلط ده أيًا كان نوعه أو أثره، وحتى ولو كان حاجة شخصية ما تخصهمش. واللوم ده من أنجح الطرق وأسرعها علشان تسدوا نفس شريك الحياة عن الحياة كلها، دايما حسسوه إنه غلط، يعني: اللون ده مش حلو عليك/ انت ليه قلت كده / الدولاب بتاعك مش متوضب / الحمام بيبقى مبلول بعد ما بتستحمى / انت بتمشي حافي ليه / انت ليه بتلبس (أو بتقلع) هدومك بالطريقة دي / الملح زيادة / الملح ناقص / الأكل سخن / الأكل بارد / انت ليه مشيت في الطريق ده / ليه بتقرأ الكتاب ده / ليه بتتكلم مع الشخص ده / الهدية دي مش حلوة / ليه بتطبخ كده / ليه بتسوق العربية كده / ليه بتشرب كده / .....، لازم تنكدوا على شريك الحياة عيشته علشان دايما يبقى مشغول بإصلاح نفسه وينشغل عنكم تماما.

الناس الرايقة بقى بيقولوا إنه علشان نحقق الحياة الحميمية، لازم نخلي مستوى اللوم والعتاب منخفض جدا، وبيقولوا إن الناس زمان كانوا بيقولوا "كثرة اللوم والعتاب تورث البغضاء"، وإنكم لازم تدورا على الحاجة الحلوة في أي حاجة بتحصل، وبلاش تبقوا عاملين زي الذباب اللي بيقف بس على الحاجات الوحشة، بالعكس خليكم زي النحل اللي بيقف على الزهور الجميلة وبيطلع منها أجمل ما فيها. ( دول كمان بيشبهونا بالحشرات).