هنحط السيخ المحمي في صرصور قلبه - شريك الحياة

22- خليك خنيق مع شريك الحياة حتى في أحلامه:

دي طريقة ممتازة علشان تخنقوا أنفاس شريك الحياة حتى في أحلامه، كل لما شريك الحياة يتكلم عن فكرة نفسه فيها أو يحكي عن حلم بيتمناه، على طول بينوا له إنه بيفكر غلط وإن انتوا تعرفوا حاجات أحسن من اللي هو بيحلم بيها، هو عايز يحلم على مزاجه كمان. كان في شخص بيتكلم مع شريك الحياة وبيقول نفسي في يوم من الأيام يكون عندي شقة على البحر. فقام شريك الحياة في لحظة بعرض 38 نقطة تبين مساوئ الشقق اللي على البحر مباشرة لدرجة إنه سد نفس شريك حياته عن الفكرة. هو ده الكلام المظبوط.

الناس اللي بالي بالك تلاقيهم يقولوا إن من حق كل واحد إنه يحلم ويعبر عن أحلامه، ولما توصلوا لمرحلة التنفيذ من حق الطرفين التحاور في الإيجابيات والسلبيات ، بس لو صاحب الحلم مُصِر عليه، فده من حقه. (عشنا وشفنا شريك حياة من حقه يحلم).