هنحط السيخ المحمي في صرصور قلبه - شريك الحياة

7- القاموس اللفظي

النقطة دي برضه مرتبطة بالنقطة اللي فاتت "اللي في قلبي على لساني". بلاش تعقدوا الدنيا، يعني ما تخلوش حاجة في نِفسكم، الكلمة اللي تقولوها قولوها بمنتهى الأريحية ومن غير أي تأنيب ضمير أو خجل.

وسيبك من الناس اللي بتقول إننا لازم نختار كلامنا، ولازم نبطل الكلام الدبش مع شريك الحياة، وكمان بيقولوا إن كلامنا لازم يكون مليان ألفاظ جميلة وألفاظ مشجعة وألفاظ تطرب الآذان وتسعد القلب، فتلاقيهم لما حد يعمل أكلة حلوة يقولوا "تسلم إيدك"، ولما حد يعمل لهم حاجة يقولوا "شكرا"، ولما يطلبوا حاجة من حد يقولوا "من فضلك / ممكن"، وكلام كتير من العينة دي زي: وحشتني، أفكارك حلوة، العيشة حلوة معاك، ربنا يخليك ليا، ذوقك حلو، بحبك، شكرا على وقوفك جنبي، ضحكتك بتنور الدنيا، حمد الله على السلامة، وشك منور، شكلك جميل، كل لما بعرفك بشوف جمالك، انت بتضيف حياة للحياة، ..... (مش عارف ده هيوصلنا لإيه غير إنه رغي ولت وعجن وتشغيل الدماغ على الفاضي).