هنحط السيخ المحمي في صرصور قلبه - شريك الحياة

4- خليك دايما شخص حساس جدا

لما شريك الحياة يعمل أي حاجة، إعملوا نفسكم "سُومة الحساس"، وبينوا له إنكم إتوجعتوا من كلامه أو من أسلوبه أو من الطاقة اللي طالعة منه. يعني لو مثلا اتكلمنا على موضوع النقد البنَّاء، مين ده اللي شايف إن له حق إنه ينتقدكم حتى لو بطريقة محترمة ومؤدبة، أنتم ضد النقد، وبالتالي ممنوع ينتقدكم برقة، ممنوع ينتقدكم بعنف، ممنوع ينتقدكم بسخرية، ممنوع ينتقدكم بالتلميح أو بالتجريح أو بالتشريح أو بالتلقيح، ممنوع ينتقدكم بطريقة مباشرة أو بطريقة غير مباشرة، ممنوع ينتقدكم لما تكونوا لوحدكم وممنوع ينتقدكم أدام الناس. الخلاصة إنه ممنوع ينتقدكم وخلاص. الطريقة دي جميلة جدا لإنها بتصيب شريك الحياة بعد فترة قصيرة جدا بمرض اسمه الخَرَس الزوجي، وده مرض لذيذ أوي لإنه بيمنع الحوار تماما في البيت، أصل كل لما هيكلمكم هتتعصبوا، أو هتزعلوا، أو هتتقمصوا، أو هيشوف أو هيسمع حاجات مش هتعجبه، علشان كده خليكم دايما حساسين أوي، وطبعا طبقوا المبدأ ده في كل حاجة في حياتكم علشان تبقى العيشة نكد.

طبعا سيبك من كلام الناس بتوع علم النفس والحاجات دي اللي هما بيصنفوا الناس لثلاثة أنواع: الإنسان الرقيق، الإنسان الحساس، والإنسان الحساس جدا. ولو هناخد موضوع تقبل النقد كمثال علشان نشرح فكرتهم البايخة، فهما بيقولوا إن الإنسان الرقيق هو اللي ممكن يتقبل كل طرق النقد بس مش هيقبل أي ألفاظ خارجة أو صوت عالي أو أي طرق غير محترمة. الإنسان الحساس هو زي الإنسان الرقيق بس بيزيد عليه أن في طريقة واحدة فقط من النقد لا يقبلها على الإطلاق لإنها بتوجعه علشان وهو صغير كان أهله دايما بينتقدوه بالطريقة دي. أما الإنسان الحساس جدا فهو الإنسان الذي لا يقبل أي طريقة للنقد مهما كانت رقيقة أو محترمة لإن كل الطرق بتوجعه علشان وهو صغير كان أهله مبهدلينه نقد وبكل الطرق. وبالتالي فالحساسية دي سببها مشاكل في مرحلة الطفولة، وإن الشخص كلما زادت حساسيته، كلما كان ده دليل على إن الإنسان ده عاش حياة صعبة جدا في صغره. (يعني في الأخر عايزين يطلعونا معقدين).