2 Saal 1 mahina 8 din 22 ghante 16 minute baad agar aap apni Mohabbat ko dekho toh kaise lagta hai. Mano aisa jaise ruki hui saansein phir se chalne lagi ho, dil phir se dhadakne laga ho, ek khoyi hui zindagi phir se mil gayi ho, ya phir aise jaise mano ek hi jahan mein dobara jeene ka mauka mil gaya ho.
Naina Sameer ko bichde hue 2 saal se zyada ka waqt ho gaya tha. In 2 saalon mein inhone ek dusre ko dekha tak nhi tha, baat nhi ki thi, pyaar ko nhi jeeya tha. Par phir bhi yeh dono jee rhe the; ek hasi ke sath, woh hasi jo dil ke dard ko chupa nhi pa rhi thi. Inhe lagta tha ki ek hasi ke sahare yeh poori duniya se apna tootne ka dard chupa sakte hai par khud se kaise chupate.
Toote hue logo ki nishani pata hai,
Kabhi gaur karna yeh haste bahut hai.
Naina's VO
Woh daur hi shayad badalne ka tha, tabhi toh do saalon mein meri life mein bahut kuch badla. Main chup rehne lagi thi, dost toh pehle se hi nhi the, ab toh apne parivaar se bhi ek chuppi bandhe rakhne lagi thi. Lekin phir bhi roz baatein karti thi apni Diary ke sath, jisne mere us waqt mein mera sabse zyada sath nibhaya tha. Poora waqt chehre par muskuruhat leke ghumti thi, taki kisi ko galti se bhi mere ghaav na dikh jaye. In do saal mein ghar mein, parivaar mein bhi bahut kuch badla. Papa ki job chutti, ek naya business start hua jiski badaulat aaj mujh mein businesswoman ke har gun maujud hai jiski shuruat maine 17 saal ki umar se kar di thi. Kise pata tha anjaane mein likhi gyi diary ek din mujhe writer banne ke liye inspire karegi. Usi tarah Papa ka kaam mein hath btana mujhe ek din Business ke liye taiyar kar dega. Mera saara time sirf books ke aaspas hi nikalta tha. Padhaku toh main pehle se hi thi par tab shayad Kitaabi keeda hi ban chuki thi. Books aur mere attot sath ki wajah se hi toh ek din main College Professor bhi ban gayi. Ek sath main 3 responsibilities nibhane lagi thi. Teaching meri job thi, Business shayad meri jarurat aur Writing mera junoon. I think shi hi kaha gaya hai ki Books are our Best Companion. They don't hurt me, they don't argue me they don't leave me. I laugh with them, I cry with them, I live with them. Shayad yeh books na hoti toh Sameer ke bina itna lamba waqt kaatna aasaan na hota.
SAMEER....yeh naam sochte hi aaj bhi kuch alag sa mehsoos hone lagta hai. 2 saal beet gaye the par shayad hi aisa koi din guzra hoga jis mein maine use yaad na kiya ho. Usse durr hone ke bawjud bhi mere din ki har shuruat uske naam se hoti thi aur mere har raat ka anth bhi usse hi hota tha. Jahan meri life mein Diary, Books, Business ne jagah le li thi vhi uski life bhi badal rhi thi. Mujhse bhi zyada badal rhi thi. Aur bure tareeke se badal rhi thi. Maine baatein karna kum kar diya tha, Introvert ban chuki thi. Aur vhi doosri taraf Sameer toh har ek se aise ghul mil jata tha jaise unhe barso se janta ho, especially uska aur ladkiyon ka connection toh yuh jhat se ban jata tha. Mere toh dost pehle se hi nhi the, par uske toh aaye din dost badal rhe the. Aisa lagta tha poora School hi uska dost hai. Main jahan class mein har baar top kar rhi thi, vhi Sameer ke grades bigad rhe the. Main apne parivaar se kum bolne lagi thi, phir bhi humesha har ghadi unke sath thi. Dusri taraf Sameer unke pass hote hue bhi unse bahut durr ho chuka tha. Jab jab apne parivaar se bolta tha toh sirf ladne ke liye, khaskar apne Papa ke sath. Bahar woh na jane kitne naye dost, naye rishte bna rha tha, par apne ghar ke rishte uske haathon se ret ke jaise chut rhe the. Us waqt meri sabse zyada kareebi meri diary thi, meri sukh dulh ki sathi aur Sameer ke kareebi ab sirf Munna Pandit hi nhi the balki unke sath sath Sharaab Cigarette jaisi cheezein bhi ban chuki thi. Afterall 18 saal ka jo ho gaya tha, aazaadi toh milni hi thi. Kehne ko toh, main kamjor thi, phir bhi main apne aap ko har tarah se sambhale hui thi. Aur vhi bahar se strong dikhne wala Sameer andar hi andar toot rha tha, apne aap ko galat cheezon se jode rakhne ki nakamyab koshish kar rha tha. Meri duniyaa ghar aur Business tak simat ke reh gayi thi. Aur uski duniyaa, poori duniyaa mein sama gyi thi. Woh bhaag rha tha har ek se, apne ghar se, apne gharwalon se, khud se. Jahan use mauka milta tha woh chale ja rha tha, har din nayi jagah dhund rha tha jahan uska dard kum ho sake. Par woh janta nhi tha ki uske dard ki marham koi tourist destination ghoom ke use nhi milegi, woh shayad mere pass thi ya aise kahe ki shayad main hi thi, jo use uski zindagi ka sabse bada dard dene ki wajah bhi thi.
In sab ke baad bhi mera pyaar uske liye kabhi kum nhi hua tha. Aur shayad uska bhi.
In Sameer's House
Munna- Yaar aaj pehle Board ka exam hai. Meri toh batti hi gul hui hai.
Pandit- Shi keh rha hai kuch nhi aata hai. Ab toh dil bhi itna zoro se ucchal rha hai mano ab bahar aa jayega. Aur zara apne bhai ko toh dekh kaise aaram farma rha hai.
Sameer- Tum log toh faltu mein hi itna soch rhe ho. Sochna hai toh yeh socho ki yeh 12th ke board exams ke baad hume aazaadi milegi. Is school se, padhai se sab cheezon se. Aur waise bhi paper hi toh hai pass hone layak kuch na kuch toh likh hi aayege, aur cheating ka sahara toh hai hi.
Munna- Ohh bhai tujhe toh sab ladkiyaan cheating kara degi woh bhi khushi khushi. Par humara kya?
Sameer- Agar mere liye ladkiyaan hai toh tum logon ke liye main hu na. Chal ab chalte hai, exam centre bhi toh dhundna hai abhi.
Otherside in Naina's House
Naina- Hey bhagwan please aaj bacha lena. Pehli baar board exam dene ja rhi hoon. Sambhal lena. Please please please bhagwan ji. Waise toh maine 3 baar revision kar li hai par phir bhi aap mere sath rehna.
In Exam Hall
Mundit- Marr gaye.
Sameer- Ab kya ho gaya.
Mundit- Bhai tera aur humara exam room alag alag hai.
Ab humara kya hoga.
Sameer wahan se jata hai aur kuch der baad aata hai Munna Pandit ke pass.
Mundit- Kahan bhai?
Sameer- Tumhari hi setting karke aaya hoon main. Woh ladki dekh rhe ho woh tumhari help kar degi exam mein. Ab darna bandh karo.
Mundit- Wah bhai tu aur tera charm toh kamaal hai. Aur ladkiyon par toh kuch zyada hi asar karta hai.
Sab apne apne exam room mein chale jaate hai. Teacher ne Question Paper distribute kar diya hota hai
Sameer(to himself)- Kya paper aaya hai. Mera toh 1 ghante mein hi khatam ho jayega. Ab poore 2 ghante bor hona padega is kamre mein.
Tabhi ek ladki aati hai.
Girl- May I Come in Mam.
Teacher- Aa jao. Tumhe pata hai na tum paanch minute late ho.
Girl- Sorry Mam.
Tabhi Sameer us ladki ki taraf dekhta hai. Aur bas dekhta hi reh jata hai.
Sameer- Naina!
Naina first bench par baith jati hai. Usne Sameer ko nhi dekha hota hai. Vhi Sameer uske sath wali row mein last bench par baitha hota hai.
Sameer(to himself)- Yeh yahan kya kar rahi hai. Ofcourse Paper dene hi aayi hogi. Waise kitna badal gayi hai yeh 2 saalon mein par abhi bhi utni hi masoom lagti hai. Par main yeh sab kyu soch rha hoon, itna mushkil se toh ise bhula paya hoon. Ab dobara ise apne dil se khelna ka mauka nhi dunga. Aur waise bhi ab main isse koi pyaar nhi karta hu jo iske hone ya na hone se mujhe kuch farak padhe.
Sameer lagataar Naina ko hi dekh rha hota hai. Aakhir usse Pyaar jo nhi karta. Tabhi woh dekhta hai ki Naina apne Pen se koi ladaai lad rhi hai.
Naina(to herself)- Ab is Pen ko kya ho gaya, chal kyu nhi rha. Ek toh already khatam ho gay hai. Ab yeh doosra bhi nhi chal rha. Ab main kya karu. Paper kaise complete karu.
Sameer(to himself)- Lagta hai iske pen ki ink khatam ho gayi hai. Tabhi aisi bholi si shakal banye rakhi hai. Main yeh sab kyu soch rha hoon. Par kuch toh karne hoga iske Pen ka. Agar pen khatam ho gaya hai toh yeh kisi se maang kyu nhi leti. Ziddi hai abhi bhi.
Tabhi Naina dekhti hai ki uske bench ke pass ek pen hota hai.
Sameer(to himself)- Shukar hai pahunch gaya us tak. Ab woh kar payegi apna paper. Waise aaj bhi kitna ghabra jati hai choti choti cheezon se pehle ke tarah hi. Main uske baare mein phir se soch rha hoon. Bas..aur nhi sochuga.
Exam khatam hone ke baad sab room se nikal rhe hote hai. Samerr ko Munna Pandit milte hai aur woh unse baatein karte karte seedhiyan utar rha hota hai.
Naina(to herself)- Sameer.. yeh bhi yahin tha. Kitne time baad dekh rhi hoon. Bilkul waisa hi hai aaj bhi. Aur iski hasi aaj bhi waisi hi hai.
Seedhiyaan utarte waqt Sameer ka pair phislane wala hota haix jise Naina dekh leti hai.
Naina- Sameer
Apna naam sunkar uska balance nhi bigadta.
Mundit- Bhai Sambhal kar. Abhi gir jata.
Sameer- Mujhe aisa laga jaise kisi ne mera naam pukara.
Woh piche mudke dekhta hai par use koi nhi dikhta. Naina ek pillar ke puche chup jati hai.
Naina(to herself)- Mujhe ek baar usse milna chahiye tha. Ek baar usse baat karti hoon.
Naina bhaag kar uske peeche jati hai. Tabhi use Sameer dikhta hai kisi ladki ke sath baatein karta hua. Jaise woh aage badhti hai toh dekhti hai ki woh aur koi nhi balki Sunaina hoti hai aur woh wahan se chali jati hai.
Naina(to herself)- Sunaina..Main phir se in dono ke beech aane wali thi.
Naina Exam Center se chali jati hai.
Sunaina- Hey Sameer! Kaisa rha tumhara exam.
Sameer- Tumse matlab. Tumhe maine kitni baar kaha hai ki mujhe yeh sab nhi pasand. So please mujhse durr hi rho. Tumhe samajh nhi aata kya.
Mundit- Ab dekh kya rhi hai. Ja yahan se. Suna nhi Sameer ne kya kaha.
Sunaina ke jaane ke baad Munna Pandit Sameer se Sunaian ke baare mein puchte hai.
Munna- Bhai waise toh tu har ladki se bade acche se baat karta hai, par yeh Sunaina se aise kyu.
Sameer- Yaar jo jis layak hai na usse waise hi baat karni chahiye. Chal chod yeh sab.
Pandit- Chal bhai ise chod dete hai par pehle yeh bta tera paper itna acha ho gaya ki tere chehre ki hasi hi nhi ja rhi.
Sameer- Woh toh Naina...
Mundit- Naina?
Sameer- Nhi yaar main toh keh rha tha Nai na aisa kuch nhi hai..chal chalte hai ab. Ek paper khatam hone ki khushi mein main tumhe party deta hu aaj.
Pandit- Bhai mere toh Samose likh le.
Sameer- Chal ab.
Sameer's VO
Board Exams yeh aisa word hai jise sunte hi ek darr apni jagah bna leta hai. Khaskar mujh jaise ke liye toh yeh kisi Villain se kum nhi tha. Par tab kise pata tha ki yeh Board Exam meri zindagi ke sabse khaas lamhe mein shamil ho jayega. Isi board exam ki wajah se mujhe 2 saal baad woh dikhi, jise dekhne ke liye har roz meri aankhein taras rhi thi. Jahan har ladki mujhe dekhna chahti thi, vhi main sirf use dekhna chahta tha meri so called nafrat ke baad bhi. Woh mere samne thi, hum ek hi kamre mein, ek hi chhat ke neeche the, mere zyada kareeb nhi thi, par mujhse durr bhi nhi thi. Hasta toh main roz tha par us din use dekhne ke baad 2 saal baad mera dil bhi hass rha tha jo shayad Munna Pandit se bhi nhi chupa tha. Kahan main usse nafrat aur shikayat karna chah rha tha, aur kahan main uske liye duaa maang rha tha, uski har haalat mein madad karna chah rha tha. Par kehte hai na Shikayat aur Duaa mein jab ek hi shaks ho, toh samajh lo ishq karne ki adaa aa gyi hai. Aur meri toh Shikayat bhi Naina se thi, aur duaa bhi Naina ke liye hi thi. Aur...aur mera ishq bhi meri Naina hi thi. Thi kya humesha rahegi.
Us din itne saal baad dekhke main sab bhul gaya tha apna gussa bhi, yaad thi toh bas woh. Uski masoomiyat, uski bholi surat aur uska ziddi hona. Uske baare mein sochna nhi chahta tha par phir bhi Paper se zyada woh mujhe yaad thi. Acha hua mujhe sirf 1 ghante ka paper hi aata tha. Tabhi toh baki ka time main Naina ko aaram se dekhne mein laga paya. Aur yahan tak ki ghar aane ke baad bhi poori raat bas vhi dikh rhi thi, jagte hue bhi aur sone ke baad sapno mein bhi. Lekin saath mein ek khayal bhi aa rha tha, shayad kudrat ko hi manjoor nhi tha itne waqt tak humara phir se milna, warna itne chote se shehar mein, itne saalon baad kisi se dobara na mile..mumkin nhi tha.
In Night at Naina's Room
Diary aaj toh neend hi nhi aa rhi mujhe. Tumhe pata hai aaj maine Sameer ko dekha 2 Saal 1 mahina 8 din 22 ghante 16 minute baad. Sirf kuch pal hi shi par uski muskurahat dekhke aaj bahut dino baad dil ko ek khushi mili.
Sach kahu toh aisa laga jaise bahut dino baad jee rhi hu. Par phir use Sunaina ke sath dekhke dil ko ph9r se dard bhi bahut hua. Humesha aisa hi hota hai mere sath ek khushi ke sath ek dard bhi jarur aata hai. Acha hua use koi dard nhi hua, agar seedhiyon se gir jata toh pata nhi kitni chot aati.
Tumhe pata hai Diary, Aaj use dekhne ke baad phir se vhi dhakdhak shuru ho gayi hai jo hamesha se use dekhkar hoti thi. Ab pata nhi kaise sambhlegi yeh. Par sambhalna toh hoga hi inhe kyuki woh mera nhi hai.
Kahin kahaniyon ko maine dil mein chupaya tha,
Jehan mein bahut shor tha par khud ko khamosh karaya tha,
Reh gayi chahatein bandh hokar in panno meim kahin,
Aur phir se bichad hi gaya woh shaks jise kabhi rooh mein toh kabhi dil mein basaya tha.
Us din dono nhi so pa rhe the. Aakhir itne dino baad apni mohabbat ko jo dekh paye the. Aur Shayad ek umeed bhi thi ki agle kisi paper mein phir unhe apne pyaar ka didaar ho jaye. Par aisa ho na saka.
Lekin ek mulaqaat ne apna kamaal toh kar hi diya tha. Tabhi toh ek choti si jhalak Naina ko sukoon de gayi thi aur Sameer ka lamba sa Naina ko ghurna shayad uske gusse ko thoda kum kar gaya tha. Ek mulaqaat aur do bekaraar dil, Ishq ki hawaa ko parwaan dene ke liye kaafi the.
।।तेरे लिए।।