#للجميلات_حصراً

#للجميلات_حصراً ٢٣

السلام عليكم
متابعه حلوه اتمنالكم
🥰🥰🥰🥰🥰🥰

#للجميلات_حصراً ٢٣
#زينب_الموسوي

ندى
الحياة الزوجيه دولاب داير .. بلا توقف .. واني جره ماء مربوطه بيه .. مره تصعد للاعلى وتشوف الدنيا حلوه ... وتصب مياها وتسقي من حواليها ... ومره تهبط بنكسار للاسفل فارغه ومجبوره تصعد للاعلى من جديد

وهذا. وصف حياتي مع جهاد .. الي سود الصفحات الفتحتها
كل مره تنتهي بذل وغلط
من اسباب تافهه يسمعني كلمات تجرح تستزف كل مابيه من حب ومشاعر وعواطف ...
وبعد ساعات يطلب معاشره ...
اصبحت فارغه من الداخل مجوفه ..، لدرجة البي رغباته ...
وادعي السعاده والراحه وياه
وارد عليه بالشكر
مااعادت عندي قدره .. اقاوم اي فعل من عنده ... مسيره نفسي مثل ميريد ..
وامشي ايامي مره زعلانه ومره راضيه ..، مره ممثله اغراء .. ومرات اعتزل التمثيل باختلاق الاعذار بتعب الحمل ..، والدراسه ...
تطفر من عيني الدمعه من يسافر وتظل كلمات الاهانه ترن باذني واكذب على نفسي واقنعها. هذي هرمونات الحمل
يشدني مشهد حب بين اثنين يصادفوني بالشارع .. عيونهم بعيون بعض .. والمسافات ملغيه والكلام همس على شفاه مبتسمه ...
واسال نفسي سنتين ونص زواج ماعشت هالشغف ..،
ياخذني للفراش بعد الاهانه مباشره ... ويخلص احس باهانه اكبر
لكن الحياة الماشيه والزواج باقي .. وعلى وشك اجيب واصير ام ... وتكتمل الصوره المظلله
صورة السعاده الي تشبه جثه محنطه كلشي بيها يوحي بالحياه بس ينقصها الروح
نعرض للناس صور حياتنا الزائفه لبس واثاث وتسوق
وهدايا واعياد ميلاد ... ونسد الابواب والله وحده يعرف بحال الي خلفها ...
المهم الاهل مرتاحين من ناحيتنا زوجونا ... واحنا صابرين
ومتحملين ونتجفى شر الشماته
والناس .. واشتغل والم فلوس
وادرس حتى احصل شهاده

بليله قبل سفره شذر طلبت يعرف بشغلها وعدتها احجي وياها

واني احضر اكله للسفر
شفته ضايج عاده هوه قبل السفر هذا طبعه لان تعب عليه

وبود بادرت بالتخفيف عنه

: مبين عليك تعبان تحب ادلك رجليك

مدد رجليه للقنفه ورد بنبره شخص يدور على مشكله هالنبره صرت خبيره بيها

: ياريت والله

گعدت على ركبي بالارض وهوه على القنفه ...

ارتكز راسه على القنفه ونص التلفزيون بالريموت حتى يحجي ويايه

: افكر اتصل بعزيز واترك الشغل لان رجليه بعد متتحمل سياقه اكثر
تحسبا لغضبه حرصت ردودي تكون مقتضبه

: يكون افضل والله ...
: طيب فكري ويايه شلون نعيش

:متحتاج تفكير الفلوس الي عدنا نشوف شغله بسيطه نفتحها واني وشذر ناساعدك

استفهم عن ذكر شذر
: شمعنى شذر !؟

اقترب الوعد الحق وضروري يعرف
صوتي ضعف وايدي شلتها عن رجليه

: جهاد اريد اگلك شي عن شذر بس اوعدني متتعصب
ترك وضع التمدد واستعد للوقوف

: احجي شبيها مريضه
بلعت ريگي وافكر باقرب مهرب

:لا اسم الله .. بس ترى تخبز وتبيع
طفر من مكانه ... وايده لزمت راسي

شنو تخبز من شوكت

اتركني واني احجي
تركني وراح يلبس حذائه

:وين رايح جهاد

لسانه الي تعودت عليه يغلط ويهين هالمره صار يسب

: اروح اخبر على لهذا الكلب ابن الكلب الساقط ... الدايح
انعل ابوه الخلفه السگط ابن الساقطه اخ الكح ...

: جهاد دتسب ابويه وامي واخ الگ يعني مرتك اخاف متدري

باصرار تام على المسبه والاذلال ..
: وانعل ابوج لاامج الف مره اخاف مراضيه

گصتي عرگت وكتمت القهر
ورديت بگلب مكسور

: على راحتك واشكرك

استوقفت قبل لا يطلع نبهته

:قبل لتخبر على نجيب .. اعرف ترى مرته مرافگه سود وحراميه
وذولي ماعدهم مانع يكتلون اختك ويكتلوك
البنيه دتشتغل بشرف وبيتها .. والنسوان تتوسل بيها على الخبز
وماشاء الله عليها مدبره حالها
وحال جهالها

شمر فردة الحذاء عليه جتي برجلي واسرع للباب وهو يتوعد

: اختي تتبهذل هيج من وراه اخوج النذل ... بسيطه

طلع من الشقه ... مجنون وهدوه .. شحطت السياره سمعتها واني بالشقه
ركضت اتصلت ب شذر

تاخرت بالرد كطعته واتصلت مره ثانيه وثالثه جاوبت تلهث
: وين جنتي متگليلي

: اخبز والعب ويه الجهال ومعلين التلفزيون

: اسمعيني شذر جهاد عرف بشغلج وتخبل وطلع يدور على نجيب

شهگت وصاحت بالاطفال كافي اسكتوا وردت عليه

: نجيب وين يلگاه هسه بالشغل

: اخاف يجي عليج لاتدليه على شغله .. وضمي الطحين وسدي الفرن .. من يشوف شقتج حاره زياده يتخبل

: اوكي روحي انتي

بقيت بقلق عليه .. هوه مريض وحالته متتحمل عركه وضرب
اتصلت بتلفون نجيب( السلر )

جاوبني بلا ترحيب راسا
: شرايده

: نجيب جهاد جاي عليك وصاير عصبي واخاف تتضاربون

ضحك باستهزاء

: واني خفت من هذا المشوه الي گوه يوگف على رجليه
لج خلي يولي اتركيه هوه هاي خلقه تعاشريها .. هوه واخته وجه الفگر

الكلام ماصدمني بگد ما اكدلي ان نجيب مات والي ديحجي ويايه شخص غريب

: نجيب شبيك شجاك وين نجيب اخويه النشمي .. شغيرك
وحتى امي متسال عنها .. عن سهير عن نجوى ومعين كل ذولي مو بعينك ورغد صارت قبلة صلاتك ... اذكر الله وخافه
الطريق الماشي بيه الي يوگع بعد ميگوم ...

: روحي لاتصدعين راسي ولاتخافين اذا اجى رجلج مراح ااذيه راشدي كافي عليه
ضحك بهستيريا وسد التلفون

ايست عندي اخو بهالدنيا

وتبقى هناك جروح مختبئه
بداخلنا ... بسبب كلمه
ان تحدثنا عنها ابكتنا ...
وان كتمناها اوجعتنا ....

.........................
جهاد

طلعت ادور على نجيب اعرف يشتغل بفندق بالتنظيف

وصلت للفندق هوه واگف برى الفندق ينتظرني الظاهر الاخبار وصلته
هجمت عليه بضربه على وجهه .. بعدها لزم ايدي ولواها
للخلف ..

: لك جهاد مااريد اضربك انت مناقص اعاقات ... روح منا لاتضحك العالم عليك .. اختك بشقتها لااعرفها ولاتعرفني
ومااريدها هيه المجلبه بيه تعرف اذا طلگتها اخذ الاطفال وبعد متشوفهم
: ضربته برجلي على رجله ..
ترك ايدي
: لك منو يحكم للاطفال لمدمن ساقط مثلك
صاح وهوه يدفعني للارض

: منو گلك اريد حكم. اخذهم وبعد متعرف طريقهم وين ..

كلامه بتهديد وشكله متغير كليا
ملامح اجرام وشر
وگف قريب مني وصوته مبحوح ويگح

امشي منا جهاد اختك هيه الي تنطيني فلوس حتى مااطلگها
مثل ما امك انطتني فلوس سياره حتى اخذها ...

الكلمات مثل دبابيس نغرزت بگلبي
واني اسمع السبب المجهول الي كنت ادور عليه ..، كلماته شلتني
ومااگدرت اتحرك .. دخل هوه للفندق وبقيت اني .. على الارض .. اشتعل بنار الي گاله
صعدت السياره لشذر ..
اسوق واحس المسافه تزيد متخلص ... وصلت تركت السياره تشتغل ونزلت ادك الباب عليها ... فتحت الباب وجهه مخطوف ... اول مشافتني
عصبي ومنهار بلا مااحجي رمت نفسها حضنتني حيل .. وهيه تبجي
: احلفك بالدم والحليب الي بينا
لاتقهر نفسك ولاتشيل همي
لا نجيب ولا اني ولا دنيا كلها تستاهل تقهرك ... جهاد اني من صغري مالي غيرك ... اهدا يابعد اختك .. الشغل مو عيب
وشغلي بيتي ماطيح حجابي ... ولا وگفت بسرى اتوسل للمساعدات
تنفست حسرتها وقهرها

: شذر اني جبتج اهنا حتى تعيشين حياة احسن وتتعالجين
مو تنذلين لهذا الكلب

بعدت راسها عن كتفي وعيونها تفيض دمع

: وداعتك مامذلوله بالعكس عندي افلوس واعرف بنات محترمات .. وامريكيات يتوسلن
بيه على الخبز

وخرت عن طريقي وفتحت الباب كله

: فوت ارتاح. خلي انطيك خبز حار
طفيت السياره وفتت .. كعدت واطفالها جوي يمي ...شفت ملابسهم مرتبه
وشقتها نظيفه والشبابيك مفتوحه

جابت خبز حار وجبن وجاي قدمته وگعدت يمي

: تعشى ويايه

: هذا عشاج ليش محتاجه فلوس

ضحكت وطلعت الفلوس من جيبها

: انت محتاج فلوس
ضحكت مره ثانيه
: تعرفني صوندا مااكل من يومي
واطفالي جبتلهم بيتزا

مديت ايدي اكل وياها
وترددت اسالها عن زواجها اخاف اقهرها .. لكن اريد اعرف حقيقة الگاله نجيب سالتها

: شلون تزوجتي نجيب صدوك امي
كملت جملتي وهيه تبعد عيونها عني

: انطته ست اوراق والامهات سونها صفقه
: شلون يعني

: امي شرطت متوافق على زواجك من ندى الا نجيب يوافق عليه واتذكر حجيهن
الطماطه من تنباع وياها بيتنجان
سامع باتفاقية النفط مقابل الغذاء مثلها بالضبط

ضحكنا اثنينا .. وظلت تحجي ويايه وتمتص غضبي شويه شويه

: اطلكج منه وخلي يولي

: لا خويه .. هيج مستوره ومتجفيه شر العالم الي تالف
وبنتي من تكبر ماتسمع كلمة امج مطلقه والي يجي يخطبها كل شويه يگلها امج ليش اطلگت

:عاقله وفاهمه ياشذر والله حرامات بهالنذل هذا
ليش متنطيه ابنه وتخلصين

فزت من كلامي وفتحت اديها اخذت ديار بحضنها

: انطيه ديار اخو بنتي وحزام الظهر .. هذا هوه الخيمه اليه ولبنتي
گمت بستها براسها .. السنين غيرتها .. واهدتها عقل اكثر من وزنها

وقبل لا اطلع ذكرتني بندى

: جهاد ندى مالها دخل .. وتحبك
وتختلف عن نجيب .. لاتعاقبها على شي مالها ذنب بيه

: لو تدرين شسويت قبل لااطلع من الشقه
: شسويت عزى
: سبيت امها وابوها وغلطت عليها بكلمة كلش سخيفه ... ولو ابوها يستاهل المسبه .. لو مامتخلي عن اطفاله مصار بيهم الي صار نجيب دايح وسهير تركض ورى الاغنياء ومعين مينعرف شيسوي بالنجف

: وندى صابره على سفرك وحافظه غيبتك
روح واعتذر منها ..

نزلت السلم وصعدت سيارتي
مااريد اوصل للشقه
الكلمه ماحسيت بيها من گلتها
لكن هسه احسها كلش صعبه
يمكن اذا افتح باب الشقه الگاها ميته من القهر
وصلت الشقه .. وبقيت بالسياره اسوي حاس باس
اصعد لو ابقى استقر رائي اصعد
فتحت الباب .. بالصاله كومه المناديل الماسحه بيها الدمع

ومالي عين اصالحها .. واسمع محاضراتها الحبوب والاغتصاب

گعدت بالصاله افكر .. لو بيدي ارجع الكلمه الگلتها

.. وحقارة نجيب متروح من بالي

هيج امريكا بسرعه غيرته ...
مو امريكا هوه من البدايه بذرة النذاله موجوده جواه
والحياة اهنا رعتها اكثر

وقتت المنبه للسفر الفجر .. ورحت انام
بلا مااحجي وياها

والصبح من دگ المنبه گعدت ويايه .. سوت الريوك بلا متباوعني .. وطلعت حافظات الاكل والاواني للطبخ .. والمعلبات خلتها على الميز امامي ورجعت نامت
جزعت من كلمه اسف الي بين يوم والثاني تسمعها مني ...
ابقى ساكت افضل
طلعت للسفر .. نتوجه للشركه
ناخذ التراك محمل بضائع .. ويخبرونا بالعنوان الي انزل بيه الحمل ونحمل بضاعه ثانيه ...
في التراك بالخلف يوجد مكان للنوم لان المسافه تتقسم
على اثنين واحد يسوق في الوقت الي الثاني يرتاح ..
واحيانا واحد يسلي الثاني بالسوالف .. ويانا اكلنا نگدر نسخنه بالمايكرويف الموجود داخل التراك او بمحطات الاستراحه ..
وعزيز انسان يهتم بالاكل ويعتبره ذوق وفن في الطبخ والتقديم واحيانا يختار كلمات
لطيفه لو صف الاكل .. من يفتح
الحافظه او الجدريه
وصلنا باستراحه ناكل ...
گعدنا باستراحه .. على مساطب وامامنا ميز
فتح جدريه ستيل حمره .. بيها دولمه
صوفر من شاف المنظر ... وخلاها امامي وعلقد

: تذوق الفن ...مال هسه اخذ صوره لهذا المنظر. واكبرها واعلگها ابيتنا مو احسن من صورة المونليزا
شوف المنظر .. يابويه

اني افكر بالكلمه الي كلتها وهذا خلگه فارغ

: صدك انت تحجي .. شبيك مماكل قبل هيه دولمه

بعد الجدر عني وبامتعاض
: صدك ماعندك ذوق
طلع خبز وگلب الجدريه حتى ياكل

وبشهيه تامه وبلا انقطاع اكل واني متعجب حاله

: عزيز تدري شنو المتعجب عليه هو كل هذا الاكل ومتسمن
انت والاكل مياذيك

غص بالاكل واختنك وهو يحجي

: احسدني احسدني .. تدري ليش مااسمن
: ليش ؟
: لان انه احب الاكل اعتبره عشق والي احبه مستحيل ياذيني

مع الاسى والندم بداخلي على ليلة البارحه ضحكت على اقباله على الاكل

اكل هوه بشهيه .. واني يادوب اسد الجوع .. عزيز صار يفهمني من نظره وبقى يلح بالسؤال

: شبيك اشو ضايج. اكيد متعارك ويه زوجتك وبلا سبب مثل كل مره
خبيت راسي بين اديه وجاوبته

: لا هالمره ويه اخوها .. الحقير
ودي اذبحه ... يااخي والله جريمه اسكت على الي يسويه بشذر

رفع ايده من الاكل وايدني بكلامي

: والله حجيت الحق .. شجاب شذر زينة العقل والاحترام على هذا القذر .. اصلا انت شلون چنت صديقه
: مجان هيجي رغم يعرف نسوان بس شهم وعنده غيره واخواته تعب عليهن ودللهن

: ولك فد مقهور منه ... ودي افلش راسه هالجلب الواطي

شفته شايل من نجيب اكثر مني

: شبيك مقهور منه هالگد
هز ايده على كلامي

: اي گلي شبيك ناسي انه كفلت رغد العصابجيه والله استحي من يجي اسمها بحديث گدامي

: كافي عزيز قهرتني بالزايد

: زين شذر ليش متتطلگ منه وتخلص
حرام بنيه بشرفها واحترامها تبقى على ذمته

: سالتها هالسؤال .. تگول اسمي متزوجه ومستوره اني وبنتي منريد حجي العالم

: الله هاي النسوان الي تتخلى على الراس مو رغد ام كفشه الصفره

وصار يتذكر مواقف مع اهله ويتحسر

:شگد حجيت ويه اهلي يخطبولي بنيه عراقيه .. سووها سوده مصخمه وخلوا الف سبب
حتى ميخطبون .. شيوصلها الك
والناس تخاف تنطي بناتها
خلوها حسره بگلبي العراقيه خاف اتزوج وبعد مااحول فلوس

ضحكت على حجيه
: اگلك الدولمه اثرت على عقلك شنو .. شجاب اختي على الحسره الي بگلبك

فزع وهو يلم اواني الاكل واستدرك راسا

: لا تفهمني غلط شذر اختي
بس انه من اشوف وحده مثلها بت ناس وماعدها حظ انقهر
واتذكر حظي الي ذبني بجودي

: ليش شبيها جودي خوش بنيه والتزمت وياك

تحسر وهوه يباوع للسمى

: الطريقه الي جبرتني بيها على الزواج حازه بنفسي .. خلتني بين ابني يتربى بنص عائله امريكيه وبين زواجي من وحده
وانه امشي وياها تسلم على اصدقائها السابقين
ولك انه ماسك جمره غضب بايدي وساكت ومتحمل مااگدر اشكي لان صارت مرتي عيب احجي وصعب اسكت

: هذي حياتها بالماضي ومتگدر تحاسبها عليها

غمض عينه حيل كانما ميريد يعيش هالواقع

: المشكله لو عراقيه وعرفنا بماضيها نفضحها ونصير زلم
بس الامريكيه نسكت

: طبعا لان بناتنا نربيهم على اساس ان كل وحده جوهره ثمينه
الخدش بيها يبين
فتح باب التراك وهو يصعد رد
بأسف

: هاي انت گلتها جوهره ثمينه
هذا الي اتحسر عليه

كملنا سوالفنا بالطريق .. وسمعت بيها شكواه من زواجه ..،الي ممقتنع بيه ..
واستغربت المكالمات الي اسمعها بينهم توحي انهم سعداء
وصلنا لشيكاغو ونزلنا الحمل
عزيز خبرني .. بوعده لشذر يشتريلها تنور كهربائي
ودخلنا المدينه .. لهذا الغرض
شيكاغو مدينه امريكيه تسكنها جاليه عربيه كبيره .. وفي شارع مخصص للمحلات والمطاعم العربيه ..،
جتي ابالي ندى واخر كلمة سمعتها مني .. اذا اني متاذي من الكلمه هيه شلون تحملتها

دخلنا محل نشتري التنور الي اصر هوه يدفع فلوسه ...
سالته عن محلات ذهب وين تصير
هوه هم ميعرف ... فسالنا صاحب المحل وانطانه كارد لمحل قريب .. طلعنا نتمشى للمحل
عرف من اصراري على هديه ثمينه ان خطائي كبير

: هالمره لازم مسوي مكسوره جبيره
: فعلا جبيره .. ومليت من كلمة اسف واعتذر
حتى هيه صارت تقاطعني قبل لااكملها تگلي عادي مصار شي

: معناها تحتاج طريقه جديده للاعتذار
: راح اشتريلها ذهب هالمره

ضحك عليه واحنا نعبر الشارع

: اگلك واذا تعودت على الذهب شتشري بعدين

: والله ماادري .. اني لو بس اسيطر على نفسي

: مدام راح تصير بيها ذهب وتدفع منا وجاي تسيطر على نفسك
دخلنا المحل ... بيه كل انواع الذهب .. الهندي والعربي والامريكي
ونصحنا بالذهب الهندي
واختاريت. اسوارات وگلاده
ومحبس
وانطيته الكردت ... من لحظه الي اشتريت الذهب اتصورته لابسته وهيه سعيده وفرحانه
نسيت صورتها من تبتسم ماعادت تفرح ..، اني السبب
او هيه كئيبه بسبب الحمل
هذا الي تگوله من اسالها ...

بقت صورتها تطاردني ..، وتزيدني ندم على كلمه سمعتها مني
وصلت ثاني يوم ... الشقه فارغه
مموجوده بيها .. ولان تعرف موعد وصولي تاركه ورقه على الثلاجه
( عندي موعد يم الدكتوره )
بين مادخلت للحمام واكلت ..
ودخلت السرير واخذني النوم

وهيه الي گعدتني من وصلت
: جهاد جهاد اگعد
فزيت بخوف مو عوايدها تگعدني

: ها ندى صاير شي

: تگدر تاخذني للمستشفى .. الدكتوره حولتني اهناك ومااگدرت اسوق

گعدت على السرير تبجي بجزع

: ليش شنو عندج ولاده

: لا .. الدكتوره تشك الطفله ميته
تركت الفراش راسا
: شنو هالحجي
بدلت وهيه تشرحلي
: صار يومين مااحس بحركتها بطني

استعجلنا بالطلعه .. وبالسياقه واني اشوفها تبجي وتولول

: ياربي ليش هيج تعبي ثمن اشهر وتالي تموت وماافرح بيها
: گولي ياالله ان شاء الله مابيها شي
الى ان وصلنا روحي طلعت من هالگد مابجت
بالاستعلامات في بنت تساعد الي يدخلون المستشفى
انطتها ندى ورقه .. وكتبتلها اسم الدكتوره والطابق
وطلعنا بالمصعد ...
على غرفة ( الالترى ساوند او الايكو )
نامت على السرير .. ويمها بنت شابه والثانيه كبيره بالعمر ...
خلت جهاز على بطنها وانطتها
زر .. وفهمتها كل ميتحرك الطفل اضغطي ... وقيدت بطنها بمايشبه الحزام
وبدت نبضات ضعيفه ... سمعتها اني والدكتوره ابتسمت
وبعدها. صارت الضربات مثل الخيل تركض ... دمعت عيونها
واني دفعني الفضول اسال

: هذا صوت قلب الطفل ... ليش هالشكل قوي
جاوبت الدكتوره
: لان الصوت مكبر حتى نستطيع نسمعه

وبعدها ندى سالتها بدموع ام خايفه
: يعني الطفله عايشه
:عايشه لاتقلقين .. احيانا الطفل يسكن اذا الام تتعب او تجهد نفسها جسديا او نفسيا
ارتاحي حتى تستعدين للولاده

كلام الدكتوره فسر حالة ندى تعبانه نفسيا اكيد

طلعنا من المستشفى .. تمشي وايدها على بطنها .. وزياده الوزن لايگتلها ... ومخليها تبدو اعقل بشكل ام شابه
اخذت باديها وهيه تمشي .. وحتى اشيل الكابه عن وجهها
مازحتها
: تدرين صايره مثل البطه من تمشين
ماردت عليه
: ها متردين .. لازم منتظره اگلج اسف
فتحت باب السياره ودخلت گعدت قبل لاتسد الباب جاوبت

: ماكو داعي مصار شي

گعدت بمكاني ... وسقت السياره
وقدمت اعذاري

: اعرف الكلمه فقدت معناها .. وهالمره دست زايد ... لكن نجيب قهرني والقهر طلع بيج

وجهه على الزجاج للخارج وتحجي

: گتلك مصار شي والله صدگني
ماكو بعد شي يصدمني ...
وراح. اخلص عمري الهث واني ابرر وادافع عن نفسي اما من اتهام او شك او اهانه

: مقهوره لهذا الحد وتكولين مصار شي .. احجي عاتبيني

: وشنو الفايده قابل راح تتغير
نفس الشي
علاقتنا انبنت هالشكل انت تغلط وتعتذر واني اسكت واسامح

هالمره اذيتها زايده عن الحد
والغريب .. ان عند وصولنا الشقه .. غيرت ثيابها .. بفستان قصير واسع فضفاض ... وتزينت
وجلست بجانبي اتابع مسلسل فكاهي امريكي اسمه ( گولدن گيرز ) عن اربع نساء يائسات
وتضحك وتحجيلي المواقف الي دتصير ... واكثر من هذا تمددت
وراسها على حجري ..،
يمكن هذا الي يوصفونه بالهدوء يسبق العاصفه
: بطه حبيبتي .. جايبلج هديه
اعتذار للي گلته عنج

رفعت راسها باوعتني ممصدكه

: انتي تجيبلي هديه. شعجب

: لان ندمان على الي گلته ..
تجين ويايه تشوفيها
: يله كومني
بالغرفه انطيتها العلبه ... ولبستها الكلاده
: انتي احلى من الگلاده
راحت للمرايا شافتها على رگبتها وعجبتها ولبست الاسوارات والمحبس واخذت صور بالكاميرا
هيه طبعها تصور وتدز للسهير
وسهير تدز صورها
وشكرتني تلث مرات ونامت وهيه لابستهم ...
مرت يومين احنا بصلح يشوبه الحذر
الفجر دگ التلفون .. الوقت هذا بس العراق يتصلون بينا
شلت السماعه امي تبجي وتصيح بصوت خلاني انهار

: يمه جهاد مشوهه ورجليك معوقه ومتگول ... يمه صدك محروك. وگوه تمشي للشغل
حاجيني يمه
العقل طار مني واريد اسيطر على نفسي الكلام تفجر غضب

: منو گلج هالحجي يمه

: هذي صورك اليوم وصلت .. وشافها ابوك واخوانك .. يمه محتاج عمليه وماعندك فلوس
يمه احنا بخير ونعمه لاتدز بعد اي شي

باوعت ندى واگفه بالركن خايفه جاوبت امي وهديتها

: يمه معليج بهذا الحجي ترى تاليف نسوان .. الخير عندي فايض عن حاجتي وعملياتي تدفعها الدوله ..، وللموت مااتخلى عنج وعن اخواني والي ميعجبها ممجبوره تعيش ويايه

: يمه احلف بالله الحجي بالرساله مو صدك
: يمه هذا مو حجي هذا خرابيط نسوان ..، ندى دزت الرساله ..،
الج تتصور تمنعني ادزلكم فلوس بهذي الطريقه
: لايمه الي دزت الصور شذر مو ندى

ماصدگت حجيها اكيد ندى كتبت باسم شذر

: يمه شذر متسويها لان مالها مصلحه هذا تخطيط ندى

انگطعت المكالمه لان حاجزين دقيقتين

ندى كانت تسمع وهيه واگفه بالصاله. ومدنگه راسها ... والدموع تنزل

: على شنو تبجين .. على حركة گلب ام توديلها صور ابنها محروگ ... تريدين اسوي تجميل ليش شكلي مخرعج ملعب نفسج

مخليه عينها بعيني وتبجي بلا مترد
. احجي ليش ساكته ... على الميز يمي علبة فيتامين . هيه تستخدمها ... شلتها وشمرتها بيها
دارت وجهها وصرخت ( اه ) وتطشرت الحبوب ..،
بكل مكان
: اطلعي برى روحي ل اخوج الدايح عيشي عنده خليه يزوجج
واحد على مزاجج
اني ماافيدج ...
بدمعه مماتنگطع جاوبتني

: اذا طلعت بعد ماارجع
: ولجهنم .. انتي والي ابطنج
فدوه تروحن لدمعه وحده من عين امي
اطلعي برى مااريد اشوفج

طلع كل غضب تلث سنين متحمله بيه تضرب على نفسها
ورجلها تضرب الارض وتصرخ

: واني مااريد اشوفك . لك موتتني ..، الله ياخذني واخلص منك
دخلت للغرفه لبست ملابسها
وشالها واخذت مفتاح السياره .. وطلعت الساعه ٣ وربع الفجر

بضربتها للباب الخارجي صحيت على نفسي .. گعدت افكر وين تروح بهاليل ...
بين اطلع وراها وبين صوت امي وحركة گلبها الحسيتها من التلفون
ضربت راسي بخشبة القنفه ... اريد افكر صح ومااعرف شاسوي ... فتحت الشباك اشوفها يمكن كاعده بالسياره ..، سيارتها مو بمكانها
اخذت المفتاح وطلعت وراها
توجهت لشقة نجيب سيارتها ماموجوده ...بعدها لشقه شذر
مالها وجود
بقيت افتر بالشوارع ... والباركات .. والحدايق .. ماحصلت اثر الها ... بقيت افتر للسبعه الصبح
رجعت للشقه يمكن تكون رجعت ... انتبهت جنطتها مماخذتها يعني ماعدها فلوس ولا كردت ...
اخاف انتحرت ...
وبهالتفكير والقلق دكت شذر التلفون جاوبت خايفد

: ها شذر مشفتي ندى

تحجي بصوت ناصي

: ندى عندي اجتي قبل ساعه ونامت ردت اطمنك عليها

ماعندي حجي او خلگ اناقش
: الحمد لله ... اروح انام اني همين

: جهاد اني الي دزيت الرساله وداعة جهالي واني الي كتبتها

: ومنين جبتي الصوره
: طلبتها منها بصراحه وهيه گالت ماعندي بس صورتين من العرس
: يعني هيه عدها علم انتي راح تكتبين الرساله وتودين الصوره

: اي عدها علم .. شكو بيها شكيت ل امي حالتك .. اذا امنا متشيل همنا منو يشيله

: حرام عليجن اثنينجن هاي ام ومفارگه ابنها وتشوف صوره بهذي الحاله شيصير بيها

: جهاد خلي امي واخواني يشوفوك انت ساكت عن علاجك ..، فكر من يصير عندك طفل ويسالك بابا ليش انت تختلف عن الباقيين شتجاوبه

: هسه مو وكت فلسفتج اريد انام تعبان
سديت التلفون وارفض اعترف اني غلطان
وعبث حاولت انام ... حجي شذر
طير النوم ..، واجهني مع نفسي
الى متى متحمل هالتشوهه ؟
والي متاكد هوه السبب في عصبيتي الي دتطلع على لندى
غير الم رجليه الي متجاهله ومااجل العمليه

———————-

ندى
بقيت عند شذر ايام ..
بيها اجلت دراستي الثاني سمستر بتعليم رياض الاطفال لحد اجيب ...
الصراع مع جهاد نفسه ومااتمل بيوم يتغير .. بالعكس ديزيد .. وهالمره انتهى بطردي
وغير الجمله الي موتني بيها
( انتي والي بطنج فدوه تروحين لامي ) هالكلمه خلتني اعرف مالي اي قدر عنده ..، والدليل مستعد يفديني ل امه .. طيب يگدر يتحمل اگول اله
( فدوه تروح ل امي ) هيه امه وعزيزه عليه ليش يفديني اني
ليش مو هوه .،،
هالتحليل صار مثل عذاب للنفس اعيده كل مره واتقاتل مع نفسي حتى انساه وميفيد

عرفت من شذر تارك الشغل بالشاحنات ... وديراجع على رجليه ..، وكلفتها تروح تجيب ملابسي وجهاز الطفل اوراقي
وشذر نقلتلي من رجعت .. ان انطاها الاوراق بلا حتى ميسال عني

: ولايسال شسويله ياريت يطلگني
فرشت بالارض مفرش گعدنا عليه بالليل نتفرج تلفزيون وبين مالااطفال ينامون ...
وفتحنا گلوبنا لبعض وبكل مابيها من شجن واذيه

: تدرين اني اول ماوصلت حسيت اكو مشكله بينكم

: گولي مشاكل يمعوده
خلي احجيلج وصلت لهنا تفاجات بشكله ..، ولگيت صعوبه اتمم زواجنا ردت وقت اتعود على الشكل الجديد
بس هوه اصر يتمم زواجنا غصب بالضرب والقوه .. كرهت الزواج ونفسي وكلشي حواليه

شفتها مستنكره الحجي
: شنو ممصدگه

: لا بس اتصورت الجميلات ليلة عرسهن تختلف عن الباقيات يعني يتدللن .. ويسمعن غزل
وغيرها
: اني مشفت من جهاد الا الاهانات لدرجه مجرد يحجي الزم گلبي بايدي واحضر نفسي للاهانه
الليل اخذنا لذكريات زواجنا
وسالتها عن زواجها

: .. وانتي احجي عن زواجج من نجيب

ضحكت وردت
: ميختلف هوايه عن عرسج ضرب وخنك بالمخده

: هههه هم اني انضربت بالمخده

صرنا نضحك على مأسينا بصوت مرتفع

: يامحاسن الصدف الظاهر المخده علامة الزواج الفاشل

: وج عيني همزين گلتيلي اذا بنتي اتزوجت راح امنع المخده تدخل غرفه النوم

: هههه واني هم امنعها لحد يوم السابع

واستمر الضحك وعيونه دمعت ومددنا رجلينا من الضحك
الي ممكن يكون ضحك على واقع ارتضينا بيه وتركنا محاولات تغييره

:فعلا صدمتيني ندى اعتقدت الجميلات عدهن حظ

: الحظ ماله علاقه بالجمال .. وانما تابع لقرارات الانسان الخطا يتبعه خطا

سرحت. بخيالها وهيه تحضن اطفالها

: اني اتصور ان بيوم من الايام كلشي بحياتي راح يتغير ويصير احسن .. مدام ممسويه خطا وصابره على قضاء الله وقدره

: حتى اني احلم بهذا اليوم الي ربنا يكافئنا على صبرنا

: ان شاء الله هاليوم قريب

مع هالامنيه خلص يومنا ..، واحنا ننتظر هاليوم السعيد
الي اتصورته بيوم الولاده
الي حسيت المها من العصر .. واتصلت شذر بجهاد خبرته
ورد عليها
: من تريد تروح للمستشفى اتصلي بيه اجي اخذها ...

الالم ازداد الساعه تسعه بالليل
صارت الالم تجي موجه وتروح موجه ..، وشذر تگلي تمشي

: هوه اني بيه حيل امشي
وساعه الا ربع اني اتمشى
وابجي

: خلص شذر بعد مابيها حيل
اتصلي بجهاد خلي يجي

ارتبكت مجرد تسمع صياحي ... واتصلت بجهاد ترجف
: جهاد ندى راح تجيب تعال هسه
اجى بعد عشر دقايق وياه ام حسن
شذر بقت بالبيت ويه الاطفال
صعدتني ام حسن بالسياره
لازم ايدي ... وتگلي لاتصرخين
ربج يسهل ...
وصلنا المستشفى ... خلوني بسديه ودفعوني لغرفه .. اجتي دكتورتي الامريكيه فحصتني
وخبرت جهاد ان الولاده تكون الصبح
وشرحتله ان في دكتور نسائيه
راح يشرف على ولادتي واذا صارت الولاده يولدني
سمع حجيها تحول الى قنبله وانفجرت بالمستشفى
ميقبل يسمع الدكتوره وصوته يعلى بالغرفه

: انتي دكتورتها تسع اشهر تراجع عندج ... انتي تولديها
ومستحيل دكتور يفحص زوجتي ويولدها

وهيه تجاوبه باعصاب بارده

: عزيزي المستشفى غير ملزمه بتوفير دكتوره بساعه الولاده
وانت مو من حقك تمنعها هيه الي تولد مو انت
ترك الدكتوره وگلي
: كومي اطلعي
: وين اروح جهاد لخاطر الله كل نسوان الولايه يجيبن بهذا المستشفى
: واني مااريدج تجيبين .. موتي احسن

الدكتوره افتهمت من عصبيته يريد يطلعني وعاندت وياه واتصلت بالامن يطردوه
وام حسن تتوسل بيه يسكت

: جهاد خويه شجاك مرتك تموت هيج .،،

وهو معاند وحتى عيونه مغمضهن ويرجف عصبيه

: مااخلي دكتور يولدها هيه دكتورتها هيه تولدها لعد بس تعرف تاخذ فلوس من التامين

اشتد النقاش وخفت لايضرب الدكتوره

حجيت وياها اني
: دكتوره اعمليلي عمليه قيصريه
هوه سكت وبين عليه الارتياح من القرار .. وهيه سالتني
: ليش انتي ممكن تجيبن طبيعي

دموعي سالت من الطرفين
والالم ينتقل من ضهري لبطني

توسلت بيها

: مااريد طبيعي نفسي متتقبل دكتور موجود بساعه الولاده

رق گلبها عليه .. وحولتني للعمليات
من حضرت الممرضات تاخذني
اجى يمي مااعرف عطف عليه ام خوف
: ندى لاتخافين ان شاء الله سهله
: ان شاء الله اموت واخلص من عذابك ماخليت اليه مناسبه حلوه اتذكرها ..، روح للشقه واتركني لحالي
دفعوني عنه ..، وعدوني للعمليه
البنج كان موضعي .. من البطن واسفل مجرد سرى مفعوله اختفى الم الطلگ ..
بقت عيني على الاضويه الكبيره موجوده بالاعلى الي يستخدمها الاطباء بالعمليلت مسلطه على راسي .. واني اشوفهم يفتحون بطني ..
ويطلع الدم ..، دقايق ويمكن اقل شفت بنتي بالصوره .،
اخذوها قريب مني وغطسوها بحوض صغير للمي صرخت
وبعدها خلوها على صدري
ضميتها اليه .. وخدها شهد اول دمعه وگعت مني عليها ... اخذوها الممرضات مني .. والدگتوره خيطت الجرح بخيوط تجميليه .. تركوني ارتاح
عشر دقايق .. اجتي ممرضه غيرت ثيابي وداست على رجليه بايدها
وابتسمت وهيه تگلي

( مبروك )
جاوبتها شكرا
.. وبعدها نقلوني لغرفه ثانيه .. ام حسن وجهاد
كاعدين. بيها الممرضات رفعوني من الفراش كل وحده طرف وخلوني على السرير

وگفت ام حسن باستني
وبعدها جهاد راد يبوسني بخدي ميلت وجهي للجهه الثانيه ..، باسني بگصتي وسالني
على( الطفله وين) ؟
: بغرفه ثانيه مع الاطفال تگدر تروح تشوفها
طلع من الغرفه حتى يشوفها .. ماعندي احساس يحبها .. حجايته وهوه يفديها ل امه بعدها مناسيتها ... بعد عشر دقايق جابتها الممرضه وهوه وياها .. شالها وبوسها .. وملى اوراقها وصار اسمها نور
طول ماهوه مگابلني اعرف اباله حجي ويمنعه وجود ام حسن
لذلك طلب منها يرجعها للبيت
وبعدين يرجعلي
اخذت بنتي بحضني .. ودققت ملامحها .. بعدها معقوجه .. وشعر ماعدها ..ممبينه تشبه منو ...لكن شكلها حلو
وبلا سبب اشتغلت الكابه عندي
واريد ابجي وانام وجوعانه
ودموعي امسحها وترجع تنزل ...نمت جوعانه ..،
ومن صحيت جهاد موجود
جايب ورد وبالونات واكل اشكال

مافرحت بيها .. الحجي خانكني واذا اسكت تتفجر عمليتي من القهر وحجيت ودموعي تسبقني

: الظاهر غلطان بالغرفه ماتعودت منك ورد ... ومن هسه اگلك لاتگول اسف واعتذر
وللموت ماانسى حجايتك وخليها ابالك ... اني وبنتي منروح فدوه ل احد
ومن گتلي اطلعي ..، طلعت وطلعتك من گلبي لابد ... وبعد مترجع حتى لو تعيش ويايه الف سنه

ردوده بارده بلا احساس مثله

: اعصابج ... انتي طالعه من عمليه

: اي والفضل الك ... خليت نيشان ابطني

تحرك جاب ميز صغير وهو يفتح الاكل ويخليه على الميز ويبتسم

: لعد تريدين رجال يولدج

: خطيه يغار عليه ... لعد منو طردني الفجر

قرب الاكل مني
: كافي تعاتبين واكلي حتى تستعيدين صحتج ... وبعدين تعاركي براحتج

استلمت الاكل افرغ قهري وكأبتي بيه

————————
في متابعات يسالون عن سبب ضهور التجاعيد والترهلات عند رغد مع ان عمرها بالثلاثينات
الجواب
رغد تشرب الخمر وهذا يسبب توسع في الشرايين
وتوسع الجلد
مع استخدام حبوب المانع الي يحبس السوائل داخل الجسم
والحمل سبب زياده في وزنها
لذلك تبدي الترهلات بعد فقدان الوزن
وفي سبب اخر نعرفه بالبارتات القادمه
الي راح تشهد تطورات كبيره وغير متوقعه 🙃🙃🙃

: