#للجميلات_حصراً

#للجميلات_حصرا ٤٢

تعديل جذري

#للجميلات_حصراً. ٤٢
#زينب_الموسوي

استئصال ورم خبيث معشعش
في حياتك .. اكيد يترك ندوب ..
ويحتاج وقت .. واذا كان هالورم
اثاره طالت اعز ناسك .. اطفالك
فاكيد العلاج يجب ان يكون من الجذور .. ...
كم يوم اعاني من الذكريات .. واتصور وجوده .. ادخل اعد الجاي اخلي كوبين .. واتذكر هو ماموجود .. افكر شاطبخ واول شي يجي بالي الاكل اليحبه
تجي الكهرباء الوطني .. واگوم استعجل حتى اكوي هدومه

مو فقط الحب نفتقده .. كذلك الالم والخوف والوجع
يعني قلع السن بعد عناء تبقى تفتقد مكانه الفارغ ..وتتحسسه بلسانك .. ويمكن تتحسفه او لا
بعد فتره ترتاح ..
اخذت فترتي وانصب اهتمامي على بناتي ..
مازالوا غير مستوعبين غياب ابوهم خاصة منى تسال عليه

(شوكت يجي بابا ) مالجئت للكذب او املها بانتظار او ادعي واولول مثل ماتذكر امي

جمعتهن تلاثتهن بجلسه صراح وحجينا بديت اني

: اعرف تفتقدن بابا وماانكر اني هم افتقده لكن مااريد ارجع للضعف بعد مااعشت القوه
جهاد كزوج اليه انتهى من حياتي .. اما كاب فيبقى ابوكم
هو يحدد هالدور كيف يكون
بعد متخلص المشاكل بينا ..
تحبون تروحون تزوروه تاخذكم شكريه لبيت جدكم .. وارجعوا

افتهمت من صمتهن .. يحوي امنيه يتمنن هو الي يسال عليهن ..،ويطيب خاطرهن عن اخر موقف صار ...

حبت نور تسالني عن كلام سمعناه عن زواج ابوه من بنت خالته ايناس
نقلت الكلام شكريه

: ماما صدوك بابا راح يتزوج ؟
بهذا عمرها صعب تفتهم ان زواجه ميعني ان ميحبهم
وضحت الها هالشي ...

: حتى لو صدوك هذا من حقه

هزت راسها بانكسار ( اي من حقه لازم يصير عنده ولد )

: ماما نور. كل واحد اله هدف من الزواج وبابا اذا صار عنده ولد مو معناها يكرهكم

وگفت وضربت ايدها على الميز
( بلي يكرهنا .. الي يترك ام وتلث بنات معناها ..يكرهم  )

تعددت حواراتي وياها .. ومحاولاتي باقناعها ان جهاد يحبهن ..
لكن هباء ..

اخذت قراري بالرحيل من العراق .. والاسباب كثيره ..
منها اني واهله جيران .. والحجي رايح جاي تسمعه بناتي وينقهرن .. وزواجه بالنهايه يجعلهن يكرهن ابوهن ..

وسبب الاخر ماعندي احد اهنا صفيت غريبه  حتى نجوى اختارت تبتعد عني وعن سهير حتى تبقى محايده رغم ان عمامي گدروا يبرئون سهير من المكالمات وادعوا ان صفحة اليوگن اني موالها انما جهاد مزورها حتى يخرب سمعتها

والسبب الاخير تشجيع نجيب لسفري ..خاصة بعد ان 

اخذت حقي من شهيد الباع سيارته .. وذهب زوجته .. وحتى غرفة نومه
اما جهاد ف كمل نص قيمة الفصل لعمامي
مقابل يعترف براءة سهير وبقى اصراره على التراجع على الطلاك  ..
ورسائله الي توصلني بايد شكريه شفهي
اصفن على عباراته ( ضايع من غيرج .. )
(يرضيج اداوم بملابس وسخه )
( اذا خايفه من عمامج اخذج ل امريكا )
( ندى انتي كلبج ياما تحملني ليش هسه قسيتي )