#للجميلات_حصراً

#للجميلات_حصراً  ٤
#زينب_الموسوي
الرابع

سهير
مااعتبر نفسي خائنه ... لعدة اسباب ... منها ان جمال المراءه هديه من الله قابله للكسر مع تقدم العمر .. والتعب .. والصبر

و مره قريت بكتاب ان جمال المراءه ثروه تخصها  الها فقط ... والها كل الحق بحماية هالثروه ... واني هذا الي سويته
اخترت العز ..، والدلال ... رغم الغصه الماليه گلبي .... فضلت الراحه  والسفر  والمستقبل الواعد  رغم  ملامة  وخصام نجيب الي  عارض خطوبتي من مازن وبهذي السرعه  ... ورغم اتهام زميلاتي اليه  بالتخطيط  المسبق  واتهامي باني كنت اواعد الاثنين بنفس الوقت ...،
صارت خطوبتي ..... من مازن
الحضور اقتصر على اخواتي فقط امي مقبلت تخبر  الجيران
بالخطوبه  مهاين عليها زعل ام جهاد منها ... وخايفه احد من الجيران يوصل حجايه عن علاقتي بجهاد امام مازن واهله

واتفقت ويايه  على حل

: بس تخلص خطوبتج. اروح ل ام جهاد واعتذر منها .. واحلفها متطلع حجايه  منها  عليج

: ياحجايه يمه  خطوبه ومصارت
لاهوه ابن عمي ولا ابن خالي

اردد عبارات مامقتنعه بيهم .. واعترض على اي لوم من نجيب وندى ونجوى بالصوت العالي

واني نفسي خايفه .. ومحمله نفسي فوگ طاقتها من جرم  بحق نفسي ... ويمكن اكثر وقت  ايقنت  تاثير  جهاد. على مشاعري   هوه وقت خطوبتي لمازن ..
ورضيت   لنفسي  بزغللة مشاعري وتخديرها .. بالاندماج  ويه مازن بطلعات .. وملابس راقيه مستورده من  الخليج .. مكياج وعطور  .. وذهب 

اخرست ضميري وتجاهلت  استغاثة گلبي كل مااطلع واشوف بابهم .. كل مالبس واتعطر  واتمنى الي يشوفني بالملابس جهاد مو مازن

واوعز الگلبي بكلمة ( انجبي  تكفيني  ارجع للواقع  واتمسك باختياري )

تحملت حجي  نجيب
الي رفض يحضر العرس
وترك البيت بيوم عرسي  وهوه يگلي

: اختاريتي خطأ   وكسرتي كلمه انطيتها لصديقي  ..، اتحملي الجاي

الجاي خايفه منه واحس كل الي اسويه مسيره ..، وكاني  مسلوبه الاراده ..، يمكن اغراني العز
ولمعة الذهب الي حملوني بيه
بيوم الخطوبه ... او عدد البدلات والثياب الي ملت الجنط
... غرفة النوم. من افخم معارض الاثاث بالمنصور ... والستائر  الملكيه ... والعطور والمكياج

اشياء ماديه غيرت ميزان الحكم بداخل نفسي ... ومالت كفة العقل  واختارت الراحه للابد ... ومستقبل خالي من الكفاح مع رجال  يحاول يشق طريقه نحو مستقبل وعليه اتحمل 

اعترف الضحيه جهاد وگلبي ...
لكن  الدنيا  مراح توگف ... والحب شعور  ممكن يتجدد. مع شخص ثاني

بهذي العبارات وغيرها اقنعت نفسي  ... ولبست بدلتي البيضه ونزلت على الدرج ... واخواتي ندى ونجوى رافعت مؤخرة البدله الطويله ... وحبست دموعي   وتركت  ل اخواتي مهمة اذراف الدموع واني اسمع صوت الهورنات  بوصول سيارات الزفه ..،، دققت بوجه امي في تلك اللحظه وكاني اطلب النجده ... الانقاذ من طمعي ...وجشعي
نظرة امي ردت عليه فات الاوان
الهول تحول مكان لتجمع اهل العريس ..، واحبابه
رگص ... وفرقه طبل نزلت بالباب تدگ مع دگات گلبي المتسارعه ...  انتبهت ندى انسحبت من المكان وصعدت الدرج وبقت عيني تتبعها
حسيت ايد مسكت ايدي  وصوت غريب على  احلامي
صوت مازن  ... التفت على يساري گاعد  ومبتسم ...
رديت بابتسامه  باهته ... هاليوم عشته بخيالي  وتصورته ورسمت كل دقيقه بيه  ولالحظه تخيلت  ابدل فارس احلامي
بشخص اشتراني  باراده مني