#للجميلات_حصراً

#للجميلات_حصراً ١٨

السلام عليكم
والكم مني كل الشكر والامتنان للتشجيع والتعليق والتصويت

#للجميلات_حصراً ١٨
#زينب_الموسوي

شذر

مع نبضات الامومه الاولى في داخلي ...ومع بداية الوهن والتعب
انتابني شعور الفرح المتزامن مع الخوف
الفرح بكون هالجنين ممكن يعطيني القوه والمعنى المفتقدتها بحياتي .. والخوف
من العائله راح ينولد ويصبح فرد منها
الخوف من ضعفي وصحتي
وعدم قدرتي على تحمل اعباء الحمل
اكتفيت بالفرح شعور اني
وتركت المخاوف لوقتها ...
ومع كل غثيان وتعب وجوع اقاومه ... بالانشغال عن التفكير

واصبحت مجبره على الاكل ..
ونجيب ادخل لقائمة طعامي
الي تتكون من عصير وبسكت
ادخل الفاكهه ..الي اصبح تناولها واجب

صارت ولادة رغد ... القابله الشاميه الي عرفتنا عليها نبع
بليلة الولاده كانت مسافره
طلعت اني ونجيب بالليل ندور على قابله عراقيه ... دگيت الباب طلعت مره كبيره سمينه اتفقت ويانا على السعر قبل لاتطلع ويانا
الساعه عشره بالليل نمشي بين الحواري ... وصلنا يم بيتنا اصريخ رغد اسمعه من الشارع ركضت عليها والقابله صاحت عليها
نامي على المندر خلي افحصج

عدت تلث ساعات ... وهيه بين الم وصريخ ... نجيب وگعت رجليه من الروحه يم باب الغرفه ... ورجعه يم شجره بنص الحوش
... واني اسخن المي . وبطريقي
يستوقفني نجيب يسالني عن الاخبار

: بعدها. نجيب متسمعها تصرخ

: لعد شوكت تجيب شمنتظرين
انشلع گلبي واني انتظر

: انشلع گلبك!.. الله يساعدها هيه لعد ...
وخر عن الباب وروح صلي وادعيلها

دخلت المي ... خليته قريب من القابله
وهيه تبدو زهگانه على رغد

: شنو هالنزاكه ... اگلج ادفعي ولاتصرخين .. ترى اعوفج اروح

رغد نايمه على افراش والوساده
والعرگ مغطي وجهها وشعرها
كانما مبلل ... ومن الدفع وجها وارم ... وتتوسل بيها
: خاله فدوه خلصيني راح اموت
: ادفعي واني اخلصج
لزمت ايدي حيل كادت تتكسر
من لزمتها وهيه تدفع بلا نفس
وتبجي .. واني ابجي
ضربتها القابله على رجلها حيل
وصاحت بيها ( افتحي رجليج لاتخنگين الطفل )
خوفت رغد ... وعاملتها بقسوه
وتصيحلها ( فاهيه ... ثوله .. ماشفت وحده فاهيه مثلج حتى متعرف تطلگ كل الشگر. فاهيات )
زودتها وصار لازم اسكتها
: اگلج خاله انتي قابله ماذونه لو حكم بمسابقة ملكه ااجمال وجاي ترشحيها
البنيه ازركت وانتي بس تتفرجين
صاحت بيه
: تعالي انتي جيبيها اذا تفتهمين ملحه

: يعني لا شگره عاجبتج ولا الملحه اجيبلج نجيب ابيض وتجيبيه

بعز الالامها رغد ضحكت وبجت
والقابله تخنزر علينا