ထူးဆန်းသည်။
အချိန်များမှာ အလွန်တရာနှောင့်နှေးသွားဟန်ရှိပြီး
အရုဏသည် အကြောင်းမဲ့သပ်သပ်နှင့် ယုဂန်၏ လှုပ်ရှားမှုတိုင်းကို အသေးစိတ်သတိပြုမိနေသည်။မသိမသာလှုပ်ရှားနေသော မျက်ခွံနှင့် နူးညံ့လွန်းစွာတုန်လှုပ်သွားသော မျက်တောင်ဖျားလေးကအစ...
နားရွက်ပေါ်တင်နေသော ဆံစအချို့ဟာ ထွေးအိစွာကျဆင်းလာပြီး ပန်းရောင်ဖျော့သောပါးပြင်ကို ထိခတ်သွားသည်အဆုံး....
ဖျော့တော့သောလက်ပေါ်ရှိ စိမ်းပြာရောင်အကြောစိမ်းလေးများနှင့် ညင်သာလွန်းစွာ လှုပ်လီလှုပ်လဲ့ဖြစ်သွားသော လည်ဇလုပ် အထိ...အသေးစိတ်ဆန်လွန်းစွာ လှုပ်ရှားမှုတိုင်းကို အရုဏသည် အမှုမဲ့ငေးကြည့်မိနေသည်။ သူ၏ခေါင်းထဲတွင် တခြားအတွေးဟူ၍ တစ်စက်မှ မရှိတော့။ အာရုံတို့ဟာ ထိုမြင်ကွင်းအပေါ်ကိုသာ ဈာန်ဝင်စားလျက်ရှိပြီး စိတ်အစုံဟာ မျောလွင့်သွားသယောင်။
ထူးဆန်းသော နွေးထွေးဆွတ်ပျံ့သည့် ခံစားချက်မျိုးဖြစ်သည်။ တစ်ခါမှ မတွေ့ကြုံဖူး၊ မခံစားဖူးသော ရင်ထဲ၊ နှလုံးသားထဲမှ စူးနစ်ဝင်ရောက်သည့် စိမ်းသက်သောခံစားချက်မျိုးဖြစ်သည်။
ပတ်ဝန်းကျင်ဟာ အလွန်အမင်းတိတ်ဆိတ်ငြိမ်သက်နေ၏။ ညှင်းသဲ့သော လေ၏အသံမှတစ်ပါး တခြားသောအသံများမရှိ။ တိတ်ဆိတ်လွန်းသောကြောင့် သူသည် သူ၏ရင်ထဲမှ နူးညံ့လွန်းသောလှုပ်ခတ်မှု၏ အသံဖျော့ဖျော့ကိုပင် ကြားနေရသည်။
အစိမ်းရောင်မျက်ဝန်းများဟာ တွေ့မြင်နေရသော ကောင်လေး၏ပုံရိပ်မှ မခွာနိုင်။
သွယ်လျစွာ လှပသော အနှီသူ၏လက်ချောင်းများသည် စာအုပ်ထောင့်စွန်းကို ရွရွလေးကိုင်ထားသည်။ ဖြူဖျော့သော အနှီလက်ချောင်းထိပ်များတွင် မနုလွန်း ၊ မရင့်လွန်းသောပန်းနုရောင်ဖျော့ဖျော့ သန်းနေ၏။ နုအိအေးစက်မည်ဖြစ်သော ထိုလက်ချောင်းထိပ်လေးများသည် ပါးလွှာသော စက္ကူ၏ထောင့်စွန်းကို တို့ထိပြီး စာရွက်ကိုဖြည်းဖြည်းချင်း လှန်လိုက်၏။
မျက်တောင်တစ်ချက်ခတ်သွားသည်။
မထူလွန်း မပါးလွန်းသော နီစွေးစွေးနှုတ်ခမ်းသည် တင်းတင်းစေ့ထားရာမှ အတန်ငယ်ပွင့်ဟ,သွားသည်။
DU LIEST GERADE
The Everlasting One ( volume 1 )
FantasyStart Date : 4.9.2020 End Date : 24.11.2021 သူဟာ သာမန်တက္ကသိုလ်ကျောင်းသားတစ်ယောက်ပါ ။ မှော်စွမ်းအင်တွေ၊ parallel worldတွေကို ယုံကြည်တဲ့ကောင်လေးတစ်ယောက်ပေါ့။ တစ်နေ့မှာတော့ တခြားကမ္ဘာတစ်ခုကို သူရောက်ရှိသွားတဲ့အခါ...... ဟာ သာမန္တကၠသိုလ္ေက်ာင္းသားတစ္ေ...
Chapter : 26
Beginne am Anfang