My Future In Her Past (1st Book Of 'In Her Past' Series)

Isagani's Letter to Horatia

Mahal kong Horatia,

Hindi ko alam kung mababasa mo ang sulat na ito. Hindi nga ako sigurado kung totoo kang nangyari sa buhay ko o imahinasyon lamang kita. Ang alam ko lamang ay mahal kita at ang mga araw na nakasama kita ay ang pinakamasasayang araw sa buhay ko.

Noong namatay ka ay hindi ko lubos maisip kung paano pa ako mabubuhay. Para akong naputulan ng paa o braso dahil sa pagkawala mo. Hindi ko alam kung ano ang dapat kong gawin sa buhay ko.

Aaminin ko, ilang ulit akong sumubok na kitlin ang sarili ko. Sa mga panahong iyon ay parang iyon lamang ang mabuting solusyon sa pighati ko.

Ngunit naalala ko ang kasabikan mo sa pangarap ko. Inisip kong magagalit ka sa akin kung hindi ko man lamang subukang gawin ang pangarap na magkasama nating pinaglaban. Kaya naman nagsumikap ako sa pagtratrabaho. Nakatulong ang manang nakuha ko mula sa aking Papá. Bago siya namatay ay binigyan niya ako ng permiso na taniman ng kape ang lupain niya. Isang bagay na alam kong napakahirap gawin para sa aking Papá. Nilunok niya ang kaniyang pagiging mapagmataas at binigyan ako ng pagkakataon na masaikatuparan ang aking pangarap. Ika ni Papá ay isa ka sa naging dahilan kung bakit naging maluwag ang kaniyang kalooban sa pangarap ko.

Inaalala ko rin ang kalagayan mo. Hindi ko alam kung paano ako makakapunta sa iyo. Alam ng Diyos na buong buhay akong naghanap ng solusyon ngunit mukhang pinaghihiwalay talaga tayo ng tadhana, bebe ko.

Kaya naman sinigurado ko na kahit wala ako diyan ay panatag ang kalooban kong hindi ka maghihirap. Hindi ko man magampanan ang pagiging asawa sa iyo ay alam ng puso ko na maayos lamang ang kalagayan mo.

Mahal na mahal kita Horatia ngunit huwag mong iisipin na pinagbabawalan na kitang maging masaya. Tatanggapin ko kung magmamahal kang muli. Masakit man isipin na mapupunta ka sa piling ng iba ngunit susubukan kong kayanin. Karapatan mong sumaya at hindi ko nais na makahadlang sa kasiyahan na iyon.

Hindi man tayo magkita sa panahon ko o sa panahon mo, ipinagdadasal ko sa Diyos na sana sa susunod nating buhay ay magkapiling na tayong dalawa. Hahanapin at hahanapin kita Horatia. Kung hindi man tayo magkita sa susunod na buhay natin ay may mga kasunod pa namang buhay. Gugugulin ko ang lahat ng mga iyon upang makita at makasama ka.

Mahal na mahal kita, bebe ko.

Nagmamahal, Isagani