الكل ايحضر للعرس مالتي وانة مثل الغصن الريحان المكسور مكتفية بالسكوت اليوم حنتي وباچر العرس البيت مخبوص من الصبح بيت خالة سليمة وصديقات مامة وصديقاتي هواي معارف ...
دخلت انسام اتحاول اتغير من مزاجي
- ها بشري ما خلصتي ادري انتي بلة مكياج حلوة.
- مشكورة انسام.
- كافي بلقيس يعني الى متى هيچ ايظل وضعج على فكرة اذا تعرسين بهذا شكلچ اسبوع واترجعين مطلگة .
- الله كريم.
- شنو الله كريم انتي فاهمة الموضوع غلط ما جاي اگلج اريد اطلع واتگليلي الله كريم جاي اگلچ غيري مزاجچ وباوعي للموضوع بصورة ايجابية.
- شنو الايجابيات الي اباوعهم ؟
- اكو هواي ايجابيات اولهم حمد نفسة خوش رجال وكلش ايحبچ ومستعد ايسوي اي شب علمودچ.
- باللة سكتي حمد مو حسبالچ ايحبني انتي ما اتعرفين هذول النماذج هذول فترة وايملون من المرة والدليل ازوج على مرتة .
- بشرفچ هاي هم تعتبريهة مرة هاي نسرة .
قاطعت كلامنة دخول امي الي گعدت بصف انسام على الجرباية صارت اگبالي اتباوعلي والابتسامة بوجهة وياهة دموع اشرت لانسام تطلع واسد الباب
واشرتلي اگعد يمهة ..
گمت وگعدت بصفهة لزمت ايدي
- ما اعرف الامهات بهل الوقت شنو اتگول لبناتهة جنت محتارة قبل لا ادخل للغرفة بس من شفتچ حسيت بفرحة اول مرة اجرب هل شعور تدرين بيوم حنتي چنت بحدي وياي خالتچ سليمة اثنينة ما نعرف شنو انسوي امي ماتت وانة بالمتوسطة چانت شخصيتي مثلچ بالضبط عنودية وراسي يابس واحياناً انانية مرات من اصيح عليچ ابوچ ايگلي ليش اصيحين عليهة وهية نسخة منچ ارد علية وانة مقهورة عليچ
اگلة ما اريدهة تتعب مثلي ..
بس الواضح راح اتعبين مثل امچ.
- يمة ما اريد ازوج الله ايخليچ.
- بلقيس انطي لنفسچ ولحمد فرصة لا اضلين متعلقة بالماضي حمد خوش انسان وهوة الوحيد الي يتحملچ .
- ايجوز تفكيرچ مقنع بس المشكلة بية انة ما جاي اقتنع بفكرت الزواج كلهة لا لحمد ولا الغيرة گوليلي شنو اسوي .
- مثل ما گتلچ يا امي اول شي الماضي انسي اعتبري صفحة وطويتهة وراح تبدين من جديد
ثاني شي شوفي الاشياء الحلوة برچلچ وحاولي تتقربيلة مثل ما هوة يتقربلچ بادلي الحب رجلچ مستعد ايعادي اهلة كلهم علمودچ كسبي لصالحچ احسن ما ينگلب عليچ.
- واذا ما گدرت احبه؟
- راح اتحبي صدگيني بس مو خلال اول ايام اتراوي الجحيم واتخلي ايكرهچ وايطلگچ وساعتهة اهل ابوچ راح ايدگولچ طبلة مربعة واتخليهم يحچون على تربيتچ بنتي انتي هناك راح اتعكسين صورتي لا اتخليني علچ بحلوگ اهل ابوچ..
چان كلام امي عبارة عن نصايح و صاية صح ارتاحيت اشوي من حچيت وياهة بس هم بعدني مو مقتنعة بشكل تام بهذا العرس ..
مثل ما گالت امي انة اعكس تربيتهة مراح اسوي شي اخليهم يحچون عليهة وراح انطي لروحي فرصة ولحمد هم ولحياتي الجديد كلام امي صح ..
هذي سلسلة افكاري خلال الحنتي الي چنت بس صافنة بيهة .
نمنة متأخرين على ما خلصو جهازي وتحضيرة واجت الحفافة حفتلي وجهي و سولولي جسمي چنت صافنة بوجه امي وهية تشرحلي ما اعرف شنو
YOU ARE READING
أنت إم الماضي
General Fictionمازال في قلبي رحيقُ لقائنا من ذاق طعمَ الحب..لا ينساه.. ماعاد يحملني حنيني للهوى لكنني أحيا..على ذكراهُ قلبي يعود إلي الطريق ولا يرى في العمر شيئاً..غير طيف صبانا أيام كان الدربُ مثل قلوبنا.. نمضى عليه..فلا يملُ خطانا ..
