أنت إم الماضي

35

- رجلج يقبل؟
- شوفي انتي اذا قبل گلي للنسوان الي تشتغل بالقصر انه استقبل جهالهم بالبيت عندي العصر لان محد عندي .
- تريدين تنسينه وتلهين روحج بسوالف ثانيه چ حسبالج تنسين ؟ گولي نسيتي بالنهار وبالليل من تنامين بحدچ شراح اسوين ؟
- الله كريم.
- فكري عدل ودانشي عگلج  وانه وياج .
- بعد گلبي عمه .
- اهلج يدرون بشي؟
- لا محد يدري بشي ما ناقصين مشاكل.
- زين اسوين .'.. اترخص هسة واذا تحتاجين شي مري علي  واوديلج فاطمه جيبلج غدة.
- عمه ما يحتاج انه اطبخ.
- بلغيس بالقصر خبصة لان قرب عرس منصور ما تجين وية النسوان ؟
- بعديني عن منصور.
- ما اضغط عليچ بس دانشي عگلج وترة منصور صدگ متحسف على الي سوا وچان ناوي يجيج ويعتذر منچ بس حمد ما قبل .. يلة انه اترخص هسة .
- الله وياج يمكن العصر امرلج حبوبة عمه سألي حمد علمود هاي السالفة

طلعت عمتي شلت الغراض عزلت ونظفت البيت وحميت مي وسبحت جاي امشط واندگ الباب .
لبست حجاب وفتحت الباب فاطمه جايبة غدة 

- گلبي ليش تعبتي روحج والله صرت احسن .
- خية البارحة جنتي مواته ما تعرفين تگعدين تحوسين تحوسين غاسله البيت بالشته هسة تردين تمرضين.
- لا طبت تعالي تغدي وياي .
- لا خية عدنه شغل وملتهين بالگصر بعرس منصور وخطار.
- الله يساعدكم
- من رخصتج

فشلة خل اروح اساعدهم صح اكرهة بس علمود عمتي .. جذابه تردين تشوفين حمد وتعرفين اذا صدگ مزوج خرب عمهة من حجت ولهسة احس نار گبت بيه وشك اكل عقلي معقوله يزوج علي حمد وليش ما يزوج اشو حته ما اجة وسأل علي مبينه السالفة والله اذا صدگ ما ابقة ويا يوم واحد اروح اتأكد بنفسي احسن
تغديت ورحت للقصر دخلت من باب المطبخ چانت النسوان يشتغلن من شافني استغربن وجودي كلهة تتحمدي السلامه كله علمود الفلاونزة سلمت ودخلت رحت لغرفت عمتي وفاطمه وخولة قبل ما ادخل اسمعهة تگلهن

- ما اريد بلغيس تعرف
- انشاء الله عمه.
- خولة مو تجفصين گباله يمكن تجي هية وتريد بس تقهريهة
- خولة: بالعباس ما احجي شي بس هية اول وتالي تعرف .
- عمتي : حمد يدري بيج .
- خولة : لا عمه حمد ما يعرف بيه حبلة.
عمتي : عود من يرد انه اگله .

سمعت هاي الحجايات خولة حامل  .. ياريتني ما دريت ياريتني ماجيت رجعت للبيت وانه فاصله من طلعت من المطبخ صار بوجهي حمد لزم ايدي بعصبيهة

- مو گايلج ما طلعين .

باوعتلة وعيني بعينه

- مبروك حمد .
- شنو؟!
- روح لامك وتعرف

وخرت ايدة ورجعت للبيت ارد الزم دموعي لحد ما اوصل ما اگدر بحدهن ينزلن انه رحت ادكتور بالبصرة گالتلي احتمال ظعيف يصير عندچ اطفال بعد وشبه المستحيل يعني مايصير عندي اطفال بعد شعور الامومه من چنت حامل چان شي كلش حلو من اتخيل روحي ام شي يونس طفل بيدي قطعه مني من روحي انحرمت من الامومه نحرمت من كلمه مامه