سلام عليكم ..
—————
ابو بلقيس : شيخنة احنة بحماتك ترضاهة على وحدة من عشيرتك تنجبر على واحد من الحزب و انة رجال لا حول ولاقوة الي يا شيخ انة دخيل عندك .
شيخ عزام : اف من هذا الي يتجرة وايريد ياخذ وحدة من تبايع شيخ عزام ؟
- ابو بلقيس : يا شيخ انة راح احچيلك السالفة كلهة .
- شيخ عزام : انة اسمع سولف يا خوي .
- ابو بلقيس : انت تعرف اني وعائلتي گعدنة بالبصرة علمود دراست الاولاد والبنات وبقينة هناك عبن حصلنة رزق وهم الاولاد يكملون تعليم والحمد لله كملت بلقيس معهد وصارت معلمة اتروح بطريقهة وتجي واخوتهة بعدهم يدرسون واثناء الدوام طلبو من بلقيس الانتماء للحزب ال.... وهية رفضت هذا الطلب هذا الشي غاض المديرة وقدمت بيهة شكوة للقادة ومن اجة الضابط بالاول حجة بهداوة واحنة فرحنة لچن بعدهة هل الخسيس ظل يتتبع بنيتي وين ما تروح و اخر شي اجة قبل چم يوم طلب يدهة وگال الكم مهلة اسبوع اجهزوهة و البت ما تريدة ...
- شيخ عزام وهوة يشرب الچاي : يا خوي ليش ما گلتولة البت مخطوبة لبن عمهة وفضوهة.
ابو بلقيس: هم گلت البت مخطوبة ما فاتتني هل سالفة رد علي انة اخذهة واشوف الي يوگف بوجهي .
- شيخ عزام: ايخسة خلي هل موضوع علي سالفتة سهلة افة عليك انت ابن عمي .
- تسلم يابو حمد ماخيبت ضني .
- لجن اكو شي دوخني يا خوي ليش ما ترجع للعمارة وتعوف البصرة وهل المعمعة .
- ما اگدر الولاد اتعلمو على حياة المدينة وكلهم متعلمين وخاصلة بلقيس رافضة فكرة الرجعة للعمارة ولا تنسة اهلي اهم رافضين عائلتي خير شر.
- يا خوي الموضوع صارلة سنين لابد انسة ...و انت ما ناوي ازوجهة لبتك؟!اشوفهة چبيرة يا خوي؟!
- هية ما تقبل وترفض كل واحد يتقدملهة انة ما اجبرهة على شي .
- الله كريم هل الردي اليوم يجي ؟
- اي هيچ گال
- لا اتضوج انت وهدي بنتك ومريتك وخلني انام اشوي ياخوي .
- ما اعرف اشلون اشكرك يا شيخ والله لو ما ضكت بية الدنية ما جان تعبتك وجبتك من العمارة لهنا .
- افة شني انت غريب بس انت الله ايهديك امبعد الاولاد عنة و حتة حچيهم مهوش مثلنة عبن هذا كلة من ورة عشگ بنت الولاية... يا خوي اشحلاتهة بنت عمك لو قابل بيهة .
- واني تعبت يالة اخذت عشگي وضحيتي بالغالي والنفيس و عفت الديرة كلهة لخوتي لانهم مارضو بيهة.
- والله يا خوي انت مهبول ( مسودن) عايف حلالك وگاعك وگاعد اهنا .
- حقگ يا شيخ عبنك ما عاشگ من صدگ .
- شني نسيت ترة ام حمد اخذتهة عن عشگ ونهيت عليهة واخذتهة غصب على اولاد عمي .
-چا ليش وگفت ضدي من ردت اخذ ام بلقيس .
- شكلك ياخوي ما ناسي الماضي .
- خلي روحك مكاني تنسة وانت منبوذ من اهلك ومحروم من كلشي واخوتي الي اصغر مني يشورون على امي وهية اتنفذ وابوي لمن راد ايموت ودة علية وحارميني من حلالي بس ربك ما يگطع الحمد لله گدرت الم روحي بالبصرة وكونت عائلة مستورة ومرت السنين بعدين عرفو قيمتي من صار ديون ابوي بيد الزعاطيط ورغم كلشي ما رادو لا بزري ..اااااه ياخوي شنسة وشنسة الغربة الي اني بيهة لو انسة البروة مالة ابوي وذبتي جرش وية غير عشيرتي انعم الله عليك من صرت شيخ ولغيت البروة .
الماضي ما ينسي ياخوي اعوفك اتنام.
YOU ARE READING
أنت إم الماضي
General Fictionمازال في قلبي رحيقُ لقائنا من ذاق طعمَ الحب..لا ينساه.. ماعاد يحملني حنيني للهوى لكنني أحيا..على ذكراهُ قلبي يعود إلي الطريق ولا يرى في العمر شيئاً..غير طيف صبانا أيام كان الدربُ مثل قلوبنا.. نمضى عليه..فلا يملُ خطانا ..
