أنت إم الماضي

34

حمد : بلقيس ياروحي ليش ساكته؟
- بلقيس: سلامتك يمته يجي منصور؟
- منصور هنا.
- ههههههههه مو على اساس ما يجي وانت عشتو مفكر بيه لحد ما تحجي وياي وعلى اساس يهمك خاطري .
- اذا ما يهمني خاطرج ليش رحت لعمي سلطان .
- حمد بلة لف ودورن انت چنت مخطط لكلشي من البداية وديتني لبيت اهلي علمود محد يگر على راسك وتخلص مني ورجعت اخوك وبعدين رجعتني كافي جذب وتضحك علي وهسة روح يم اخوك لان اذا تبقة الحجي ما راح يعجبك .
- مشكور سويتيني جذاب وخوش حجي تحجي من وراي يم اهلج .
- جذبت بشي ؟؟ ! ترة ادري بيك تسمع واگف وحجيت متعمدة اسمعك وانصح اختي تبعد عن اخوك وانه ما چذبت انت كلشي گلتة طلع جذب وما وعدتني بشي وفيته كل حجيك چذب مصفط .
- هيج صارت بلقيس.
- گتلك عوفني بحدي لان حجي الباقي يجرح اكثر .
- رايح عود مو هسة اتفاهم وياج بعدين يصير الحساب .
- لا بعدين ولا قبلين خليك هناك يم اخوك وخل بالك روحة لذاك البيت ما اروح  ولا راح اسلم على منصور ولا احد يجيبة الي ولا اقبل يسلم علي ..حمد اذا احد جابة الي افشلة وافشل اخوك وافشلك انت وانت تعرفني اذا قفلت لا احترم چبير ولا صغير .
- شوفي ولج بلقيس زوتيهة انطيتج هواي اكبر من حجمچ اشو انثبري بيتج ورگعت وجهج ما ارد اشوفهة واذا تعبتبين باب البيت اله اكسر رجليلج وزقنبوت اجيبلج لبابج وقسم بالله يا بلقيس اذا تردين شي كتبي ورقة وخلي بمكان المسواگ .
- كلشي ما اريد منك
- اسوين فضل

عافني وطلع هاي اول مرة هيج حمد يحجي وياي يابه احس شي بصدري ينعصر شمر الغراض برة وراح دخلتهم وقفلت الباب بقه هيج وضعي انه وحمد شهر محد يحجي ويه الثاني وحته شوف ما اشوفهة ومنبه محد يوصل لباب بيتي بس هوة يسوگ ويعوف المسواگ باب  ويروح گلبي طاگ علي ارد بس اشوفه ماكو ما توقعته هيج بالبداية چنت معصبه منه ومقهورة ومعصبه ودردم بيني وبين روحي واگول هسة يجي وهسة يعتذر بس حمد ماكو حيل اذاني هجرة الي بقيت بحدي ولان بحدي يوم اطبخ ويوم لا وبس نايمه طبيت بحالة اكتأب  احنه بشهر 11 الجو بارد وخلص الغاز صارلة يومين مطلعته القنينه برة وما بدلهة يعني ما يگول هاي شتاكل شتشرب الواضح نساني حته مسواگ ما جايب صارلة سبوع .. سبح ما سابحة احس روحي وصخة وردت اسبح وما عندي حل غير اسبح بمي بارد سبحت ونمت من البرد وتغطيت بطانيتن گعدت ثاني يوم احس جسمي ذبلان وعندي كحة رحت للمطبخ كلشي ما بي بس ماي شربت مي ورجعت على فراشي لان بردانه نمت احس روحي بغيبوبة وجهي يطلع منه نار وميته برد چان تفكيري بس راح اموت بحدي ومحد يدري بيه بدت الهلاوس براسي نمت  وما ادري بالوقت افز وارجع انام اسمع الباب يندگ گمت غسلت وجهي ما اريد احد يحس بضعفي ويگولون من عافة تمرضت فتحت الباب
واشوفلك عمه ام حمد بوجي
دخلت وانه وراهة اسح بروحي سح ما اعرف صارلي شگد نايمه

- شلونچ بلغيس؟
- حمدلله

گعدت على القنفه بحدي  وبالگوة مفتحة عيوني صوتي مبحوح