أنت إم الماضي

3

- حسام: هذي اخت صاحبتج الصغيرة عرست وانتي بعدچ على گلبي.

- بلقيس: انا ماكلة بكدك لو گاعدة بيتك الله لا ايعوزني الك ما اريد اروح .

عفت الصينة وگمت

وسام: چنت اشاقة وياهة ونيتي اخذهة واروح بس ردت اضوجهة اشوي بس حسام كلش قهرهة

- وسام: انت شنو طينتك تدري بلقيس اضوج من هل طاري ليش تحجي بي .

- حسام: الناس اكلت وجوهنة اختكم ليش ما اتعرس وليش ما اتعرس شمتانية.

- سلطان: حسام انت ما ايحقلك تحجي وية اختك هيج ما دام خشمي ايشم الهوة فاهم واحك هوة علي اذا قهرت بلقيس مرة ثانية ليكون عقابك عسير فاهم لو اعيد.

- حسام: انشالله بوية.
- سلطان: يلة گوم اعتذر من اختك وراضيهة.

سمعنة صوت الباب اندگ

سلطان: حسام شوف منو بالباب.
- حسام : تأمر بوية .

حسام : اكلت طن ارزالة علمود بلقيس خانم والله ضايقتهة بالحجي ولازم اعتذر منهة ما اعرف ابوي ليش ينطيهة هلگد مجال طلعت ادردم وصحت بصوت

- منو ؟

وفتحت الباب اتبسمرت بمكاني من شفت حمد گدامي

- سلام عليكم اشلونك خوية حسام؟
- وعليكم السلام الحمد لله.
- ما اكو اتفضل ؟
- اعذرني اتفضل بس اخذ طريق .

دخلت فتحت باب الدوانية ودخلتة رحت صحت لبوي

- بوية حمد بن عزام عدنة .
- هلة بي بوية فاتن گومي حضري الغدة اكيد ما متغدي .
- فاتن : انشالله تأمر .
- وسام: سلامات شعدة جاينة؟!
- سلطان :اذا فشلتوني نفس ذيج المرة لا اتلومون الة روحكم مفهوم.
- وسام: انا طالع للمحل .
- حسام: انا وياك رايح.
- سلطان: هسة طلعت شطارتكم اعرفكم خياس ما اصير الكم جارة.
- وسام : بوية انا وحسام مبدلين من مساع انريد نطلع بعد هذا الحجي عليمن .
- حسام: اي والله .

عافنة وطب للدوانية.

فاتن: زين اسون بي والله متحنحن على اهله هل الايام وابشركم اذا اصالح وية اهلة ايروح للعمارة .
- حسام : لا يابة شنو اروح للعمارة لو اموت انا ما اطيق شوفتهم .
- فاتن : وسام روح شوف اختك بالكي تنزل وياي .

صعدت اشوف بلقيس لكيتهة اتنضف هية وانسام الفوگ .

وسام: امي اتگول تعالي وياي اجونة خطار.
بلقيس : انشالله ..انسام من اتخلصين الممر خلينة انرش السطح خاف انام بالليل خلي يبرد.
انسام: انشالله.

نزلت صار بوجهي حسام درت وجهي منه ضايجة.
هوة اقترب مني وباس راسي

- كلشي ولا زعل بلقيس اسف خوية اشاقة وياج ما ايصر يعني وبعدين احنة منو النة بالبيت غيرج بلياج انضيع انة ما اضوج من وجودچ بگد ما اريد اشوفچ مرتاحة وتدرين كل مرة تاليهة اتعرس وخاف ايفوتچ القطار وتتندمين بعدين .