السيد العقيد ♥️

الجزء 65 :(ذهاب من دون عودة) 💜

🌿بقلمي : هند حداوي 🌿

كلمتو ماتعاودش زوج مرات.. كيف انهى المكالمة طلع عند ياسمين.. لقاها فاقت..
-علي(بضحكة): صباح الخير النعاسة.. كيف كاتحسي مزيان دابا؟
شافيها لقا دموع عاود نازلين مع وجهها..
-علي(كايمسح ليها دموعها) : هشش.. صافي أياسمين.. ماعندك علاش تبكي.. كانت لحظة طيش.. نتي ماعندك بها علاقة..بعد المرات الإنسان كايولي يبان ليه كولشي ضدو.. دنيا كحلة.. رغم أنك ماكنتيش غا تخلاي عليها.. ولكن الله أعلم شنو كاليها راسها.. خاصك تبراي باش تحضربي للجنازة.. وراها مخليا ليك رسالة.. (جبد رسالة من جيبو ومدها ليها).. أنا برا..  الى حتاجيتيني عيطي عليا ❤..
شدات ديك الرسالة بين يديها.. ودموعها كايطيحو.. فزكاتها.. شماتها لقات فيها نفس لپاغفان لي كانت كاتستعمل دنيا.. ماحدها كاتشم فيه وهي كاتزيد فلفوليم ديال لبكا.. عاضة على ليزار باش مايتسمعوش شهقاتها.. بكات وبكات حتا حسات براسها غايتقسم على زوج.. كل ما كاتفكر معاملتها ليها كاتبغي تحماااق.. كاتذكر كيف كانت كاتعاود ليها على حياتها وانها ضحية كلاب جائعة..  ضالة.. إعاقة فكرية.. شنو ذنبها..  الى كانت أنثى؟..شنو ذنبها الى كانت ميسورة الحال؟..شنو ذنبها انهم يشوفو فيها بتلك النظرة الشرزاااء.. ؟؟!..  حتا كاتبغي تحلها وكاتراجع.. ماباغاش تشوف شي حاجة تصدمها.. اكثر ماهي مصدومة.. شي 15 دقيقة ديال التردد.. عاد تشجعات وحلاتها..
بسم الله الرحمن الرحيم.. والسلام عليكم ورحمة الله تعالى وبركاته.. مالقيتش شي بداية أفضل.. من هادي.. عارفة انه البدايات دائما ما كاتكون صعيبة بالنسبة ليا.. ولكن هاد الأيام الأخيرة اكتشفت انه حتى النهايات صعيبة.. صعيبة بزااف..
أصعب ما يمكن أن يكون في هذه الحياة أن تفارق من تحب دون أن تودعه، ودون أن تعلم بموعد رحيله💔.
كيف قلت ليك آخر مرة.. انه المحامي كاليا بقات ليك سيمانة وتخرجي من السجن.. سيمانة.. ونستنشق عبير الحرية.. سيمانة ونرجع لذاك العالم الموحش.. واخا السجن لا يقل عنه ظلم ولكن على الأقل كانقدر نتأقلم وندافع على راسي.. فكرت مزياان.. وحاولت نلقا جواب لسؤال طالما تبادر لذهني..هانا خرجت من لحبس..  شنو غاندير؟ فين غانمشي؟ لمن غانلجأ؟..وبكل أسف ادركت انه ماغانقدرش على المواجهة.. هاجس الرعب.. باقي مسيطر عليا الآن.. ماغانقدرش نعيش مع ذئاب بشرية.. ناس لي كانو عزاز عليا مشاو كاملين.. نتي الوحيدة لي كاينة ورغم ذلك خاصك تشوفي حياتك..صعيب تعيشي فغابة ونتي كائن ضعيف.. لا حول لك ولا قوة.. ربما كنت نقدر نتخلص من هاد الأفكار لو استأنست بالصلاة.. كيفما كنتي دايما كاتوصيني.. ولكن ختا هادي فشلت فيها.. ونتيجة التفريط وصلت لما  أنا عليه الآن..عارفة هاد الخطوة لي درت غالطة..  ومحرمة اصلا.. ولكن هي كانت بالنسبة ليا رحمة من العذاب النفسي لي كنت كانمر بيه.. رغم اني كنت كانتظاهر بالقوة الا.. ااني أكبر إنسانة ضعيفة على وجه الكرة الأرضية.. عارفاك بكاية وماغاتساليش من دموع.. ولكن من بعد غاتستأنسي..وماسمي الإنسان بالإنسان الا لأنه كثير النسيان ❤..كوني قوية.. وماتخليش اي واحد يهزمك.. وتهلاي ليا فسي لكولونيل.. عارفاك ولتي كاتبغيه.. غامن شوفاتك لي مفروشين.. 💙
أحبك ❤..
كيف قرات آخر جملة ضحكات.. وسط دموعها.. اه يا دنيا.. تعذبتي بزااف فحياتك.. الحياة ماكاتكونش منصفة.. فكاع الأحيان.. يا ريت لو اخبرتيني بداكشي لي كاتحسي بيه..  يا ريت لو خويتي عليا قلبك وقلتي ليا على مخاوفك لربما كنا نلقاو الحل مجموعين.. دايما كانلقاو ناس لي قلبهم زوين..  اكثر فئة كاتعاني من الخيبات والخذلان..
بعدما فرغات جل طاقتها فدمووع.. لقات بانه ماقدراتش تساعدها وهي على قيد الحياة.. ولكن تقدر توصل ليها بعض الرحمات وهي ميتة..  جمعات لوقفة.. واخا باقا كاتحس براسها عيانة.. دخلات للمرحاض.. توضات..  وخرجات دارت عليها زيفها.. حيت اصلا كانت لابسة كسوة مستورة.. مامبينة لا فصالة لا والو.. فرشات واحد صلاية صغيرة كانت تماك.. وصلات صلاة ترحم على دنيا.. طلبات من الله يغفر ليها.. ويجعل مثواها الجنة.. ويجعل قبرها روضة من رياض الجنة.. خاصة فاش كاتسجد..  كايسبقوها دموعها.. وماكاتقدرش تتكلم فقط كاتشهق..
-ياسمين(كاتبكي..): اللهم أنت أعلم بما أسره في نفسي.. اللهم إرحمها يا رب واجعل مثواها الجنة.. يارب انت الرحيم بعبادك.. يا ربي رحمها..  اللهم ثبتها عند السؤال.. اللهم ثبتها عند السؤال.. اللهم ثبتها عند السؤال.. اللهم اجعلها من أهل الجنة.. (كاتشهق) .. يا ربي أنت أدرى وأعلم.. اللهم إرحمها..اللهم اجعلها في روضة وبستان في نعيم دائم.. ودار خلد تحت ظلك يا رحمن.. اللهمّ إنّها نَزَلت بك وأنت خير منزولٍ به، وأصبحت فقيرة إلى رحمتك، وأنت غنيٌّ عن عذابها.. اللهمّ أبدلها داراً خيراً من دارها، وأهلاً خيراً من أهلها، وأدخلها الجنّة، وأعذها من عذاب القبر، ومن عذاب النّار. اللهمّ عاملها بما أنت أهله، ولا تعاملها بما هي أهله..سالات صلاتها.. ولسانها كايدعي لدنيا بالرحمة والمغفرة..
فمجتمعنا دايما ماكانشوفو فداك الشخص لي نتاحر بأنه غادي نيشان لجهنم.. الإنتحار محرم.. والله هو لي عطاك ديك الروح وهو أحق بأنه ياخذها..  ماعندش شي واحد الحق انه يوضع حد لحياتو قبل مايقرر الخالق هادشي. هادشي صحيح فعلا.. ولكن مانساوش انه بعض الناس كايعيشو معاناة نفسية.. صباح وعشية.. فحين انه نتا نايم وماعلابالش..عايش دنيا بطول ولعرض.. كاين شخص اخر ماكاينعسش.. ماكايشوفش نهار زوين.. عندو ليلو بحال نهارو.. فكثير من الأحيان كانلقاو ناس كايضحكو عادي..  دايما ناشطين.. كايبان ليك عايش مرتاح.. كاتكول سعداتو.. لربما تغير منو على الراحة لي كاتشوفوو عايش فيها.. ولكن حتى واحد نهار كاتجيك خبارو انه.. مات..كيفاش ؟ كاتصدم.. داك سيد لي ديما ضاحك ناشط.. انتحر.. مايمكنش.. هنا كايبان ليك الفرق.. وكاتعتارف انه ليس كل مايلمع ذهبا.. خاصنا نتعلمو نقدرو الناس شويا.. وحتا الى كان داك السيد انتحر.. الله أدرى بحالتو..  والمعاناة لي كان عايش فيها..  لذا يكفي الترحم بلا هدرة زايدة..
جلسات فوق سرير وهي باقا كاتدعي.. مرة سرا مرة جهرا.. حتا دخل عندها علي.. وهو كايحاول يكتاشف كيف بقات.. ولكن بان ليه انه كاين تحسن.. واخا عينيها حمريين ومنفوخيين.. من لبكا..
-علي(بحنية): كيف بقيتي؟ رتاحيتي شوية؟
-ياسمين(بوجه شااحب) : الحمد لله.. واش نقدرو نمشيو دابا باش نحضرو للجنازة؟
-علي(بقات فيه) : اه واخا..  ياله دابا نيت.. ياك بعدا كاتحسي براسك مزياان..
-ياسمين: اه..
خرجو من لاكلينيك بعدما خلص.. دون مايتلاقاو بغالي ولا رقية.. اتجهو نيشان للمقبرة.. لقاوهوم ياله دفنوها وراجعين بحالهوم.. طلب منها تسنا شوية بينما غادرو..  عاد دخلو.. خلى ليها مساااحة..  باش تقدر تفرغ فيها داكشي لي مخبياه داخليا.. بدات عاوتاني كاتبكي.. وبانت ليه بحال الى كاتعاتبها..شاف واحد لفقيه تماك وعطاه شي بركة.. باش يقرا عليها ماتيسر من القرآن الكريم.. بقا حداها حتا سالات على خاطر خاطرها.. وطلبات منو هي براسها يمشيو فحالهوم.. وافق.. داها نيشان لدار.. رغم انه كان باغي يدوز للسجن باش يتفاهم مع الحارسة.. ولكن كال انه ياسمين باقا عيانة.. مايقدرش يخليها بوحدها..
دازت سيمانة.. ياسمين ولات شوية.. ارتاحت من الكوابيس لي ديما كانت كاترافقها ملي انتاحرات دنيا.. وحتى سي علي رجعات ايامو روتينية.. بعض المرات كايمشيو يزورو الخالة خديجة.. لي باقا داخلة فغيبوبة.. ورقية خايفة عليها بزاااف.. ولكن غالي.. معاها ومامخليها محتاجة لحتا حاجة.. ولكن فهاد ليومين الأخيرة..  ولات العلاقة مابين ياسمين وعلي متوترة شوية..
فلاش باك..
علي..من بعد مامشا للسجن عند ديك الحارسة.. وتفاهم معاها.. رجع لدار..  وكان كايتكلم فتيليفون..
-علي(لمراد) : المهم غا خرجوها..تكفيها يومين فالسجن الإنفرادي.. نو انا درت ليها هاكاك.. باش مرة اخرة تعلم تهدر فاش نسولها اشنو كاين.. الامر ومافيه انه ماعجباتنيش الطريقة باش كالتها لياسمين.. كون تسببات ليها فشي حاجة الله يحفظ.. الحمد لله ملي خرجات سالمة.. ياله الله يعاون..
كيف دار لقا ياسمين موراه..
-ياسمين(مغوبشة): علاش عاقبتيها؟
-علي: هاداك ماشي عقاب مجرد انذار باش مرة اخرة تعلم كيف تعامل..
-ياسمين: ولكن هي مادارت والو حشومة عليك.. انت قلبك قاسي..
-علي(خنزر فيها) : هادشي ماشي شغلك ومن الأحسن تدخلي سوق راسك..
من بعد هاد لكلمات لي قال ليها .. مشات للبيت ليكان عاطيها وهي ماحاملاش راسها.. وماحملاتوش اكثر حيث ظلم ديك الحارسة وهي مادارت والو.. اليوم نادت معولة باش تمشي فحالها.. لبوس تشد.. وكولشي غادي مزيان.. اذن هي شنو باقا كادير هنا.. شنو محلها من الإعراب؟..خلات لحوايج ماجمعات والو.. اصلا هو لي شاريهم بفلوسو.. لبسات كسوة.. طويلة موردة.. زرقة وغوز.. وفولار غوز.. مع صنيديلة بيضة.. وساك طويل ازرق.. وخرجات.. كان لحد.. وعلي جالس فوق لفوتوي.. كايخدم فشي حاجة.. غا شافها وخنزر..