هبة قلبه

🎀 بارت 37 🎀

💄هــــبــــة قـلــبــــــه 💄
🥂بقلم لمياء الشادلي 🥂
✨ الفصل الأول: #لقلبي_رأي_آخر ✨

#بارت_37

هبة رجعت راسها اللور ونطقت كتعوج في شفايفها : من هنا لتما يحن الله .

حفصة ضغطت على شفايفها : نخاف هاد الخرجة ترجع علينا بالندم .

هبة رفعت حاجبها : دبا نتي باغة تلاقاي صاحبك ؟

حفصة حركت رأسها بالايجاب كتبتاسم بتوتر

هبة : إذن توكلي على الله.

وقفو كيدورو عيونهم على جنابهم لايكون شي حد سمعهم ، تنهدو براحة وهما كيشوفو ايوب جالس بعيد عليهم وداير الكاسك كيتموسق ، هزو الكراسا دخلوهم ،  وتوجهو لغرفتهم كيبلانيو ، في هاد الخرجة ديال اليوم .

داز وقت طويل وجا وقت الغدا ، تغداو مجموعين ، شي مكيهضر مع شي ، فقط النساء كيسولو على أحوال هبة وواش الضرسة مبقاتش كتحرقها .

الوقت كيمر بسرعة ، سمعو صوت نداء إحسان باسمهم ، خرجو بسرعة ، ناحيتها ، ووقفو قدامها.

حفصة : انمشيو دبا ؟

إحسان : وي يلاه معانا نتوما غدي تمشيو في لوطو دماجد ، والباقي ايمشيو مع عمي خالد

حركو رأسهم بالايجاب وخرجو كيجريو ويتسابقو لوطو كانت رونج روڤر آخر مخرج ، ركبت هبة اللور ودورت عيونها مقربة عند حفصة اللي جالسة حداها

هبة : نموت ونعرف فاش خدام ماجد .

حفصة رفعت حاجبها مصدومة : وايلي كفاش معارفاش خدمة خالو ماجد المرض هذي كلشي كيعرفها .

هبة حركت رأسها بالنفي :والله معرفت ، هذي مكانوش كيدويو عليها العائلة باش نعرفها

حفصة ابتسمت :خالو ماجد راه جراج دماغ في أمريكا ، معرفتش داكشي بالضبط ختك مكلخة ، مهم كيفتح ليهم داك الراس اللي عندهم خخخخ

هبة ميقت فيها : لاش صالحة نتي لاش اللي متجيبيش المعلومات هما هذوك

حفصة حولت عيونها بعدم رضى: اوا سيري سوليه راسك علاش مصدعة ليا انا مخي .

مدة قليلة من الوقت طلع ماجد واحسان ، وعمران طلع حدا هبة ، كسيرا بسرعة ، كيسوق بطريقة ماهرة ، وطول الطريق هبة حاضياه وكتنهد في نفسها .

هاد الحب شي نهار غدي يقتلها كل نهار كيكمل عليها ويخليها تزيد تعلق بيه ، تصرفاته ، كلامه ، ميمكنش يخليو بنت بحال هبة وبشخصيتها متميلش ليه .

شخصيته جذابة لأبعد الحدود ، بدون التحدث على جماله ، اللي مختافاش ولو شوية مع تقدم سنه .

ثواني ، ودقائق الواحدة تلو الأخرى توقفت السيارة ، باركاها ماجد في الباركينغ ونزلو مجموعين ، كيدورو عيونهم ، منتاظرين سيارة خالد .

حفصة زيرت على رجليها بعدما غمزتها هبة ، وخسرت ملامحها مصطانعة التوتر ، دورت عيونها جهة ماجد ونطقت بصوت عالي : خالووووو ماجد

ماجد دور عيونو جهتها وهز حاجبو منتاظرها تنطق

حفصة : بغيت نمشي للطواليط عفاك .

ماجد عقد حواجبو بإستغراب : سيري

هبة ابتسمت ونطقت موجهة كلامها ليه : حتى انا غدي نمشي معاها .

حرك راسو بالايجاب ، بينما البنات لقاو نظرات على بعضياتهم وتمشاو بسرعة قدامهم ، فورما وصلو القنت قلبو الطريق بسرعة كيجريو ، محاولين ما أمكن ، يوصلو للطريق بسرعة ، ويقطعو لجهة المرسى .

مدة قليلة وهما كيجريو ، توقفو قدام الطريق ، تمشاو جهة ممر الراجلين وقطعو بسرعة .

حفصة قشعت معاذ جهة المرسى تمشات جهتو كتجري ، فور وصولها قدامو تلاحت عليه معنقاه كتبتاسم : توحشتك بزاااف

معاذ عوج عنقو جهتها ونطق بابتسامة : حتى انا الزين ديالي .

بعد حوارات طويلة ، كانت هبة كتشوف في طريق وتنتابه للغادي والجاي عاطياهم حريتهم ، ومباغاش تقرب ليهم ، او تدخل فشي حاجة مكتهمهاش .

حسات بالوقت تعطل دورت عيونها جهتهم فورما وسعاتهم بصدمة وهي كتشوفهم مطابقين شفايف بعضهم ، وكيقبلو بعضياتهم بشكل علني قدام المارة .

اول مرة تشوف هاد المنظر بالمباشر مشهد كانت كتحضر عليه فقط بالمسلسلات هاهي اليوم كتشوفو قدامها ، عطاتهم وقت يبعدو ، وقربت ناحيتهم كتحنحن .

حفصة دورت عيونها كتشوف فيها رافعة حاجبها ، هبة دارت ليها إشارة بيديها ان الوقت مشى .

حفصة فهمت راسها، ودعت معاذ اللي كان رافع حاجبو في في هبة ، وجراتها من يديها كيجريو راجعين جهة العائلة .

هبة دورت عيونها شافتو عطاهم بالظهر وهبطت على حفصة لراسها : واش نتي ق  بة ولا شنو واش دغيا عطيتيه فمك محلولة نتي ولا حم ارة ؟

حفصة ابتسمت مقربة ليها ونطقت بحب : هاااح كنبغيه

هبة رفعت حاجبها ونطقت باستهزاء : تبغيك جنية ياربي .

دورت عيونها باغة تقطع الطريق ، سمعات صوت التليفون كيصوني ، مكانتش نمرة مقيدة عندها ، جاوبات وحطات التليفون في يديها ، فورما سمعت صوتو القوي والصارخ بعصبية مدورة عيونها بفزع جهة حفصة : فيييييينكم .

#يتبع......
آرائكن شهيراتي ❤️✨