هبة قلبه

🎀 بارت 3 🎀

💄 هــــبــــة قـلــبــــــه 💄
🥂بقلم لمياء الشادلي 🥂
✨ الفصل الأول: #لقلبي_رأي_آخر ✨

#بارت_3

لبست آخر قطعة من ملابسها جرات لافاليز ديالها وتمشات جهة لافابو غسلت يديها ، ورجعت ناحية طبلة الفطور ، جلست حداهم وحولت عيونها عند مها

هبة : ماما كبيلي أتاي

حركت راسها بابتسامة وهزات البراد خوات ليها النص في الكاس ومداتو ليها : هاكي ، جمعتي حوايجك ؟

هبة : اه جمعت اللي يكفيني، شحال انكلس بعدا ؟

رشيد هز حبة دغريبة دارها في فمو تلذذ بيها ونطق : معرفتش ابنتي غدي ترجعي معاهم ، حيت هما لا بد غدي يجيو يشوفو العائلة ومنين غدي يجيو عندنا يجيبوك معاهم

هبة حركت رأسها بالايجاب : صافي مشي مشكل ديت اللي كافيني

خديجة : يلاه كولي ابنتي دغيا باش ميمشيش عليك الطران

خدات طرف دالباكيط دهنت فيه الفرماج مع قطعات دالكاشير ، وقطعات بيديها كتدوز كل طريف مع جغمة داتاي

دقائق قليلة وتوجهت ناحية لافابو غسلت يديها ، مسحاتهم بالفوطة وجرات لافاليز ديالها

هبة : احم بابا صافي ساليت

رشيد حرك راسو بالايجاب هز سوارتو وخدا ليها لافاليز مخرجها للوطو ومخلي هبة مع مها

قربت منها سلمت عليها وابتسمت : انتوحشك .

خديجة توسعو عيونها بالابتسامة وبانت الحفرة دالزين المطبوعة في حنكها ، علامات الجمال مزال باينين في وجهها : يا الحمقة ديالي راك غير مسافرة عطلة قصيرة وغدي ترجعي ، مشي غادة لخر دنيا ولا مغديش ترجعي .

هبة : عرفت ولكن وخا هكاك كنتووحشك دغيا

جراتها من يديها وعنقاتها بحب : لهلا يخطيك عليا الحبيبة الدار بلا بيك كنحس بيها خاوية

حلات فمها مستعدة تجاوبها قاطعها صوت رشيد من الخلف : يلاه نمشيو دغيا اتبقاو تعانقو حتى يفوت الطران ؟

ابتسمت ابتسامة مزيفة وخرجت من تما تابعة باها ، دارت باي باي لمها اللي تبعاتهم لبرا ، وركبت القدام مع باها ، دارت السمطة وثواني قليلة انطلقت السيارة .

مدة ، ساعة، ساعتين ، ثلاثة ...  ، في هاد الوقت كانت توادعت مع باها وشدات طريق بساعات كثيرة ، دورت عيونها ناحية النافذة وابتسمت ابتسامة باهتة وهي كتشوف الطران دخل للمحطة الأخيرة وغدي يحبس فيها ، ألا وهي عروس الشمال.

تنهدت بصوت مسموع هزات صاكها وطلعت راسها للفوق ، الفاليز بعيدة عليها وثقيلة ، أمر مؤكد انها الى تجرأت تجرها غدي تهبط على راسها ، دورت عيونها يمين ويسار ، وحركت يديها ناحية الشاب اللي قدامها كتنادي ليه

هبة : خويا عفاك وخا تعاوني

رفع الشاب عيونو من هاتفه هز فاليزتو اللي كانت حدا ديالها ، ووجه يديه ناحية ديالها جرها وهبطها لعندها بسهولة .

الابتسامة ظهرت على وجهها مصاحباهم علامات الود : شكرا لهلا يخطيك

حرك راسو بالايجاب ونطق بابتسامة : هانيا الصغيورة

زيرت على صاكها بين يديها وجرات لافاليز مغادرة القطار ومحطته ككل

#يتبع....
آرائكن شهيراتي ❣️✨