هبة قلبه

🎀 بارت 35 🎀

💄هــــبــــة قـلــبــــــه 💄
🥂بقلم لمياء الشادلي 🥂
✨ الفصل الأول: #لقلبي_رأي_آخر ✨

#بارت_35

يديها تطلقو وجسدها تهد ، قربت ليه وتلاحت على صدرو متكية عليه، مزيرة على التيشورط ديالو بيديها ودموعها كيهبطو بشكل متوالي

زيرت عليه اكثر ونطقت بصوت باكي : الضرسة كتضرني بزاااف ، بغيت شي حاجة تحبس ليا حريقها غدي نحماق ، حتى ماما مكايناش اللي تعاوني كانت ديما كتعطيني دواها وحتى الى مكانش في الدار تصاوب العشوب بيديها .

رفع عيونو للفوق عاد طلع معاه البلان وفهم سبب بكاؤها ، بقات فيها ومحملش راسو يحكم عليها قبل ميعرف اللي ضارها ، حط يديه على شعرها ضامها ليه كيدوزو بحنان ، ودور راسو جهة إحسان اللي نطقت مقربة ليهم عاطفة على حال هبة .

إحسان : صافي اهبة سكتي من البكى انا عندي الدوا هانا انطلع نجيبو ليك ومغديش تبقى تضرك غير سكتي .

حركت راسها بالايجاب كتنتاظرها ، بينما إحسان تمشات كتجري طالعة لبيتها تقلب على المسكن .

باقي أفراد العائلة بعدما عرفو الحل في يد إحسان ، رجعو لبيتهم يكملو نعاسهم وماجد جر عليه الغطى مخلي هبة حاطة راسها على صدرو ومتكية عليه كتبكي في صمت .

هز يديه كيدوزها على شعرها بحنان ، الحركة اللي كانت كتحماق عليها وهي صغيرة ، وكتساهم في سرعة نومها بشكل كبير.

رفع راسو للفوق حاط راسو على الحيط ونطق بنبرة هادئة : كليتي شي حاجة اليوم باردة ضراتك في الضرسة ؟

حركت رأسها بالايجاب وهي مزيرة على التيشورط ديالو وكتستنشق ريحتو اللي توحشاتها ومن سنين ما حظات بهاد اللحظة : خديت من الگلاص في المول فاش خرجت مع ياسر

ماجد تنهد ونطق بنبرة قاصحة : منين عارفة ضرستك كتضرك علاش كتاكلي داكشي اللي كيآذيها ، وأش ديك الحالة درتي راسك قبيلة بحال المجنونة واش جهلتي ، وجهك كامل قبشتيه .

هبة حنات راسها فعلا كتحس بروحها زادت فيه ومكانش خاصها تدير داك الحالة كاملة ، ولكن داك الحريق ميحس بيه غير اللي مجربو ، كيعطيها نيشان للراس ، خصوصا في نفسيتها هي المخربة أبدا واش تصبر عليه ، كان لا بد تعبر على اللي كتحس بيه ولا 100٪ مفيهاش كانت غدي توصل للحماق

تنهدت بصوت مسموع الحريق متمكن منها ونطقت بصوت ثقيل : الحريق اللي خلاني ندير هكاك وكان لا بد نبرد على راسي .

رفع راسها لعندو كيشوف في وجهها ، مد يديه كيدوز صباعو على خدودها ببطء ورفع عيونو كيشوف في عيونها : وجهك كامل خسرتيه ، علمتك كلشي إلا الصبر أجوهرتي .

حطات يديها على يديه ونطقت مفيكسية عيونها على عيونو لأول مرة : علاش علمتيني نبغي ومعلمتينيش نكره

لحظات من الزمن وعيونهم متقابلين مع بعضهم ، بعدها عليه ، قاد ليها بلاصتها ووقف متوجه جهة الباب ، حلو بانت ليه إحسان جاية ناحيتهم بالمسكن خداه من عندها ، حطو حدا راس هبة وخرج .

تنهدت بصوت مسموع وهي كتسمع خطواتو مغادرين المكان ، هزات الدوا ، خدات حبة منو دوباتها في الما شرباتها ورجعت تكات كتمنى من الضرسة تهدن .

داز وقت طويل ، وأخيرا عيونها تحلو ببطء مشاهدة المكان ، البيت خاوي وصوت السيارات مجهد نابع من النافذة حداها .

لاحت عليها الغطى وتوقفت بسرعة لبسات صندالتها وتمشات جهة الطواليط ، غسلت وجهها وحكات سنانها ، رجعت لبيتها لبست تيشورط ابيض مع سروال تجين ، وجاكيط دالكوير في الموطاغد من الفوق .

تمشات جهة طبلة الفطور جلست حداهم ، وفطرت بصمت حانية راسها مكتسمع حتى حاجة من الكلام اللي كيتنطق بيناتهم .

خرجت مع حفصة وأمين لقدام الموبل جلسو قدام الباب ، وخداو البنات راحتهم، حفصة كتهضر في التليفون وهبة حانية راسها طالعة هابطة في الأنسطا .

#يتبع........
آرائكن شهيراتي ❤️✨
التتمة بعد 15 دقيقة ، كنكتب ونحط ليكم كنحاول نحط هاد النهار بزاف