هبة قلبه

🎀 بارت 5 🎀

💄هــــبــــة قـلــبــــــه 💄
🥂بقلم لمياء الشادلي 🥂
✨ الفصل الأول: #لقلبي_رأي_آخر ✨

#بارت_5

ياسر : اوا اهبة غدي تفرحينا هاد العام بشي نقطة زوينة ؟

رفعت حاجبها كتفكر بطريقتها المعتادة ونطقت موجهة ليه كلامها بأمل : كنتمنى تكون على حساب مجهودي ، وميضيعونيش في التصحيح .

طلع عيونو ناحيتها بابتسامة مستمتع بكلامها الرزين والغير المناسب مع سنها : حتى انا غدي نواعدك ، إلى جبتي فوق 17 في الجهوي احسن حفلة تدار ليك في احسن ريسطو على حسابي

نطقت حفصة بصوت عالي مقاطعاه : ياك اخالي وانا اللي كنت كنرغبك على الايفون الجديد مبغيتيش تشريه ليا

ياسر : عارفك كتطيري ابنت ختي ، الى شديتيه غير غدي تديري بيه شي مصيبة

عوجت فمها باستهزاء منو وجبدت من جيبها ايفون آخر ما خرج كتوريه ليه : ها هو بلا جميلك .

رفع حاجبو بإستغراب ووجه ليها سؤالو : شكون عطاه ليك الطيارة ؟ الواليدة نتي اللي جبتيه ليها ؟

نجية وجهت ليهم نظراتهم بابتسامة مولفة على نقاشاتهم الدائمة ونطقت بإجابة على سؤالو : جابو ليها ماجد فاش جا .

اسم مكون من 4 دالحروف كان كفيل يخلي قلبها يتهز فورما تذكر ، رفعت راسها ناحيتهم وطلقت وذنيها كتستقطب صوتهم بحماس .

ياسر : كفاش جا ؟ فين جا ؟ وفقاش ؟

حفصة : خالو ماجد جا للمغرب البارح وداز للسعيدية حنا طلاقيناه في المطار هنا في طنجة وهو مابغاش يجي معانا دبا دا مراتو ومشى .

ياسر : وانا لا خبار مكيقولي والو ؟

نجية : علاش بعدا نتا كتسول باش تعرف ؟ حاضي غير الزهو مكتفكر لا في عائلة ولا طاسيلة .

إحساس الفرحة ممزووج بالغيرة اجتاح روحها العطشانة لشوفتو ، ست سنوات دازت كاملة وفي كل دقيقة وثانية كيزور ذاكرتها اللي أصلا منساتوش ، كل يوم كتلومو وتبرأ ذاتها ، لو لا حنانه وتعاملو الخاص ناحيتها مكانتش تبغيه وتطيح فيه ، دورت عيونها جهتهم ، كل واحد كتمنحو دقيقة من النظر ، فرد بفرد ظاهر على وجوههم علامات الأمل والفرحة ، لهاد الدرجة طابع بلاصتو في جميع القلوب ؟؟ سن صغيرة قلب محطم ، وفكر مشغول ، بعد هاد الكم الهائل من الوقت غدي تولي تجمعهم نفس البلاصة ومشي نفس الظروف ، كلها وحياتو ، الاختلاف مطبوع على علاقتهم المحطمة قبل البناء ، الزمان داز كعاصفة خطفت أشياء ثمينة ، وطلقت غبار على قلوب ضعيفة .

قاطع تفكيرها الطويل المدى صوت ياسر المنادي باسمها دورت عيونها ناحيتو ونطقت باستفسار : وي ؟

ياسر : مالك ساهية راك غدي تجيبي مزيان كوني هانيا ، يلاه دوزي نخرجكم فين تبغيو تمشيو ؟

حفصة نقزت بفرحة : البلايا عفاك  

قاطعها أيمن أخ حفصة : لا اخالو بغينا نمشيو للمارينا ، البلايا توسخت وعامرة .

ياسر : ونتي اهبة

هبة هزات كتافها بلا مبالاة: اللي بغيتو معنديش مشكل

ياسر : ندوزو عند صحابي ونمشيو كاملين لأصيلة اش بان ليكم

حفصة: هاااح عليك اخالو كنحماق عليك .

نجية : إكرام نوضي ابنتي نشوفو اش نوجدو بينما جاو هما

جمعو مستلزماتهم ، ولبسو الدراري حوايجهم ، حط ياسر كلشي في الكوفر وركب هو وحفصة القدام بينما أمين وهبة اللور ، طلقو موسيقى مجهدة وكسيرا بسرعة ، كيتسابقو مع باقي السيارات بين شوارع طنجة .

مدة ساعة ، ساعتين ، 3 دالسوايع ، إلى أربع ساعات ، فرانة ياسر قدام الموبل بعدما استمتعو بوقتهم مع بعضهم .

هبطت هبة من لوطو دورت عيونها على الشارع قدامهم الضام لأفخم السيارات هزات حاجبها بإستغراب ، وجهت نظراتها لياسر اللي توسعت ابتسامته على وجهه وحول نظراته للمنزل باين عليه الفرحة

تقدمت جهته ضامة يديها جهة صدرها وباين على وجهها علامات الإستغراب ، بللت حلقها ونطقت باسمه : ياسر

دور وجهه ناحيتها ورفع حاجبو : وي ؟

هبة : واش جاو عندكم الضياف ديالمن هاد الطوموبيلات ؟

ياسر حرك راسو بالنفي ونطق بابتسامة : لا مشي الضياف ماجد اللي جا هو وولاد عمتي ، ديما عزيز عليه يفاجأنا .

زوج جمل كانو كافيين يخليو نبضات قلبها يتسارعو بطريقة همجية كأنها وسط سباق نتيجتو محسومة بخسارتها .

#يتبع ✨
#آرائكن_شهيراتي ❤️