هبة قلبه

🎀 بارت 17 🎀

💄هــــبــــة قـلــبــــــه 💄
🥂بقلم لمياء الشادلي 🥂
✨ الفصل الأول: #لقلبي_رأي_آخر ✨

#بارت_17

حل عيونو بعصبية ، خشا يديه في جيبو جبد تليفون ، سجل نمرة ياسر وربط الاتصال ، كيتنهد بعصبية ، وعيونو كتدور عليهم .

مدة مكاملاش ثواني ، قطع ، ودوز يديه على شعرو ، وجه ليهم نظراتو ونطق بنبرة عصبية : ومحاولتوش زعما تمنعوه ، عارفينو مريض في ك رو اللي قالهالو راسو كيديرها .

حسام ضغط على فمو ونطق بأسف : حنا مكناش عارفين ، بانو لينا مقلقين ، وهبة غير معصبة ، بغينا نضحكو معاها ونحيدو ليها الميكاب اللي نوض الصداع

ماجد رفع حاجبو: كتقصد بغيتو تعصبوها؟ مسمعتش ليا انا وغدي تسمع ليكم نتوما ؟

يسرى : صافي ماجد عفاك اخويا متزيدش علينا خليهم يجيو ونشوفو حالتها .

ابراهيم حرك راسو بالايجاب وتقدم جهتو : متخافوش مغدي يوقع ليها ، هي فاقت ، داها غير باش تغرز الضربة اللي عندها في راسها .

الجملة الأولى كأنها دازت بسرعة من وذنو ومستقبلهاش عقلو ، باش يقدر يترجمها ليه ، كون الجملة الأخيرة شكلت صراعات في الداخل ديالو.

زير على الهاتف ديالو بين يديه ورجع اللور جلس على الفوطوي حاط يديه على راسو .

إحسان ضغطت على شفايفها من حالتهم ، قربت جهتو وتكات على كتفو منادياه باسمو : ماجد

ماجد حل عيونو ودورها ناحيتها كينتاظر كلامها ، فهمت نظراته بللت حلقها ونطقت بتوتر خايفة تغلط في كلامها معاه وهو في عز عصبيتو : احم سمعني ، انا عارفة هبة عزيزة عليك بزاااف وكتعتابرها بحال بنتك ، وزيد عليها مباغيش تخاسر مع خديجة ، ولكن هادشي راه مكتاب ، وانا عارف هبة قوية هادشي مغديش يغلبها .

تكا على الفوتوي ونطق مغمض عيونو ببرود : نتي مكتعرفيش هبة ، نفسيتها متأثرة في هاد المرحلة من عمرها ، واي حاجة وقعات ليها ، تقدر تأزمها ، هبة اكثر من بنتي وكنفهمها اكثر من باها .

إحسان : انا عندي احساس غدي تولي بيخير ، وغدي يرجع كلشي كيف كان وتدوز عطلتها كيفما بغات خاص غير نتا تهدن ، حشومة عليك شوف ولدك كيفاش مخبع خايف منك .

حل عيونو ورفع راسو موجه نظراتو ناحية ولدو ، اللي كان مخبع مور حفصة وكيطل عليهم ، تنهد ونطق مخاطبو : أجي لعندي .

عمران عوج عنقو ونطق بتساؤل : ومغديش تضربني ؟

ماجد ابتسم ومد ليه يديه : أجي اولدي عارفني عمرني حطيت عليك يدي ؟ اذن مغديش نديرها اليوم

عمران خرج لسانو كيدوزو على شفايفو : ولكن دبا نتا معصب بزاااف ، وعمرك كنتي هكا ، اذن تقدر تديرها.

ماجد فيكسا عيونو عليه ونطق بنبرة آمرة : أجي لهنا .

تخلع من نبرتو بعد على حفصة وقرب ليه ، فورما وقف قدامو ، حس بيد ماجد جراتو وزيرت عليه في حظنو .

مدة ، ثانية ، دقيقة ، تليها ساعة ، بل وصلت لساعات ، فرانة ياسر قدام الموبل ، دور راسو جهتها ، كتبان صفرة ومهدودة ، زير على فمو ، بقات فيه بسبب تصرع منو كانت غدي تضيع شبابها وتنتقل لدار البقاء .

حيد السمطة ، حل الباب ونزل من لوطو ، توجه لجهتها حل ليها الباب ، وجرها هزها بين يديه .

مصدرت منها والا كلمة ، من غير تصرف بسيط ، واللي كان عبارة على حظنها لعنقو ، وراسها اللي تحط على صدرو .

#يتبع......
آرائكن شهيراتي ❤️✨