သူ မသိသောအခြားတစ်ဖက်၌ ( Part - 24 )
〰〰〰〰〰
"ညီမလေး CEOကိုပေးပေးပါနော် အတွင်းရေးမှူးရုံးခန်းက အစီရင်ခံစာပါလို့"
ဦးရဲ့အတွင်းရေးမှူးမမက ဖွေးလက်ထဲကို စက္ကူအိတ်တစ်လုံးပေးပြီး ပြန်ထွက်သွား၍ ဖွေး laptopကိုခဏထားခဲ့ကာ တံခါးခေါက်လိုက်သည်။
ဖွေးရဲ့နေရာက ဦးရဲ့ရုံးခန်းအနားမှာဖြစ်ပြီး ဘာမှလည်းထွေထွေထူးထူးလုပ်စရာမရှိဘဲ ဦးအလုပ်ကိစ္စနှင့်အပြင်သွားမှသာ ဖွေးမှာအလုပ်ရှိ၏။
တခြားအချိန်တွေဆို ဦးကြည့်ခိုင်းသော စာရင်းတွေလောက်သာ ကြည့်ပေးရသည်။
"ဝင်ခဲ့"
ဖွေး တံခါးဖွင့်လိုက်တော့ အထဲမှာဦးရဲလည်းရှိနေပြီး ဦးက ဘာကိုစိတ်ဆိုးနေသည်မသိဘဲ သျှင့်ကိုဆူနေဟန်ရှိသည်။
ဖွေး အားလုံးကိုဝေ့ကြည့်မိပေမယ့် စာအိတ်ကိုပေးဖို့သာ လိုရင်းဖြစ်နေ၍ ဦးဆီကိုပဲ တည့်တည့်လျှောက်သွားလိုက်သည်။
"အတွင်းရေးမှူးရုံးခန်းက အစီရင်ခံစာပါ"
စိတ်ဆိုးနေပုံရသည့်ဦးက ကိုယ်တိုင်ထမယူဘဲ ဦးရဲကိုမေးဆတ်ပြလိုက်၍ ဦးရဲက ဖွေးလက်ထဲကစာအိတ်ကို လှမ်းယူသည်။
စာအိတ်ကိုအနီးကပ်မြင်တော့ ဦးရဲက ခေါင်းညိတ်ပြသည့်အခါ အရေးကြီးကိစ္စဖြစ်ပုံရ၍ ဦးက ဖွေးကိုရော၊ သျှင့်ကိုပါ အပြင်ပြန်ထွက်ဖို့ပြော၏။
"နောက်တစ်ခါ အခုထက်ပိုဂရုစိုက် ပြည့်သျှင်"
"ဟုတ်ကဲ့ ဖေဖေ"
အခန်းအပြင်ရောက်သည်အထိ သျှင် မျက်နှာမကောင်းတာမို့ သူလိုလူလည်းအဆူခံရသလားဟု ဖွေးသိချင်သွားပြီး ပခုံးနှင့်တိုက်ပစ်လိုက်သည်။
သူသည် ခါတိုင်းလိုတောင် မျက်မှောင်မကုတ်နိုင်တော့ဘဲ စိတ်ညစ်နေသလို အနည်းငယ်ညှိုးနွမ်းနေတော့လည်း ဖွေး မနေတတ်ပြန်…
"ဦးက ဆူနေတာလား ဘာဖြစ်လို့လဲ"
"အလုပ်လုပ်တဲ့နေရာမှာ မှားသွားလို့ပေါ့ ဖေဖေကမဆူပါဘူး ကိုယ့်တာဝန်ကိုယ်မကျေသလိုပဲမို့ စိတ်မကောင်းဖြစ်မိတာ"
"မျက်နှာကြီးအဲ့လောက်စူပုတ်မနေပါနဲ့ ကိုကိုရယ် တခြားသူဌေးသားတွေ clubတက်၊ ပျော်ပါးနေချိန်မှာ မောင်ပြည့်သျှင်လေးကတော့ အလုပ်ကြိုးစားနေတာကိုက ဖေဖေဦးမင်းခမ်းနားအတွက် ကျေနပ်စရာကြီးပါ"
YOU ARE READING
သူ မသိသောအခြားတစ်ဖက်၌
Romanceနင် ငါနဲ့ပဲနေရမယ်၊ နင့်ကိုငါပဲပိုင်ရမယ်••• ငါ မသိတဲ့နင့်ရဲ့တခြားတစ်ဖက်မှာ ဘာတွေပဲရှိနေ ရှိနေ ငါမသိချင်ဘူး..... ငါသိတာက နင်က ငါ့အပိုင်ပဲ Start Date - 21 April 2022 End Date - 22 May 2022
