وردة يعقوب🌹مكتملة🌹

🌹الجزء 92🌹

💎🌺 قصة : وردة يعقوب 🌺💎

🍂🍂بقلم : وردة نور "نور الصدقي "🍂🍂

🍁🍁 البارت : 92 🍁🍁

زادت طالعة لفوق وهي مدلية شفيفاتها باغية غير تبكي دخلات لبيت هزات سلة ديال لحوايج لي موسخين ديالها وديال يعقوب وتمات طالعة لسطح حلات لباب حطات سلة تحت ساقفة لي تما وحلات لبيت جبدات لمصبانة لبرا مع تيد هزات دراعية ديالها خشاتها في سليب مخليا سيقانها لبلقين باينين حتى لحد ركابيها وديك دراعية عزلات فورمتها كلها بدات تعزل في لحوايج وتحط في لماكينة جرات تيو كبات لماء عاد خدماتها دخلات لداك لبيت فكات شعرها وعودات جمعاتو لفوق باش ميبرزتهاش هزات بانيو صغير عمراتو بلماء وتيد ولاحت فيه لبروكسل ديال يعقوب كلهم جلسات على كرسي صغير في باب لبيت من لداخل على قبل شمش وبدات تصبن فيهم بليد حتى دوزاتهم كلهم وهزات سليبات ديالها تصبنهم حتى هما كتصبن وهي عاضة على شنوفتها باغية غير تبكي محملاتوش فاش مخلاهاش تخرج معاهم وجها ولا حممممررر حنيكاتها بغاو يطرطقو وعويناتها كيبريو بدموع مرة تنوض تشلل مرة تنشر وهي غادة جاية بحال شي فراشة

عند يعقوب
لي فاق بكري مخليها نااعسة خرج بلا فطور حدو كما ليه كارو على الريق مع كاس ديال لقهوة قااصح زاد لبنكرير مع نبوري عندو خدمة تما ولي كتخص خدمتو لي في طنجة كيخدم ويتقاتل باش يهز عائلتو ومرتو وميخصصهم من والو اما فلوس خدمتو ثانية ولي هي لمافيا مكيهز منهم ريال هو الأخير كيهرب سلاح و الممنوعات ولي كيدخل منهم زبابل ديال لفلوس ولكن عمرو دخل منهم ريال لدارو لي كيجيه في حقو مكيخليه في جيبو كلشي كيخرجو في نهارو لناس لي كيموتو بجوع ولي منهم عدااد كيصيفط لدول عارف ناسها فاش عايشين منهم إفريقيا عندو طروق خاصة بيه في كلشي

وصل لبنكرير وبضبط لمحال كبير ديال إصلاح السيارات طلع لمكتب لفوق وهو كيف لعادة عااقدهم كيخلع مخلي دراري لي خدامين عندو كيتفتفو ولي كان باقي شاد فيه نعاس توكض كلهم كيخافو منو قليل فين كيجي اما كلشي مراقبو عن بعد وكيوصلو كلشي هو فشكل معصب غير مع راسو هضرة جوج كيخدم يديه وهما شافوه شحال من مرة مع بعض لكليان لي كيبقاو يترطاو معاه ... عارفينو ماعندو خاطر وصاارم في كلشي إلا لخلاص مكياكل حد في رزقو خلاصهم كيوصلهم كامل مكمول وفي لوقت وخلصة مزياانة

جبد لبيسي وجبد طواسة لي كيوصلوه من طنجة كيخدم ويشوف اش دخل واش خرج شاد حسباتو كلهم مكيغفلش كي سلا خدمتو ودخل حسباتو نزل لتحت عندهم طوا كمام قاميجتو وشاف فواحد من لي خدامين عندو

يعقوب: بصوت مدعدع: هادي أش خاصها ؟

لولد شاف في طموبيل لي شير ليها : هادي المعلم فيها شي مشكل في لباتري على مقال مولاها حنا مزال مادرنا فيها يدينا

يعقوب حرك راسو مخنزر وزاد لطموبيل : جيب ليا لكونطاكت ديالها

دري زاد بزربة جاب ليه لكونطاكت عطاها ليه ومشا بحالو يكمل خدمتو مخلي يعقوب مع طموبيل كيصايب فيها حاني بنصو عليها جابد خيوطها كيقلب ويصايب بقى معاها حتى ريكلها دار ليها امارش وفعلا تصلحات بلاما يكمل فيها نص ساعة صحيحة هز فوطة كيمسح فيديه لي عاامرين بلاكريس وقاميجتو لكحلة فيها طبايع ديال لاكريس توسخ عروقو تجبدو كيبان بحال شي وحش سمع تليفونو كيصوني جبدو لقاها البرهوشة ديالو عرفها عاد فايقة جاوبها حتى سلا معاها زاد طالع لفوق هز لبيسي ديالو وسوارت طموبيل وهبض بحالو راجع لدار مكسيري صونا على مو يشوف يكما دارت لي فراسها ومشات معاهم قالت ليه بلي خلاوها في دار عاد رخف لغباشة شوية ...زاد مكمل طريقو موقف حتى لدار دخل بعجاتو بلاصة لوطو مع نزل بانت ليه خديجة حدا روبيني لي في جردة كتغسل في زرع