وردة يعقوب🌹مكتملة🌹

🌹الجزء 30🌹

❄🌺قصة : وردة يعقوب🌺❄

🦋البارت : 30 🦋

العرس 🎶🎶🎶🎶🎶

دنيا عمرات ولقاعة تبنات قدام الدار
كلشي عارف اليلة العرس في الدوار ديال بنت هاجر ومن لا يعرفها شمس لي كيتعطى بيها المثال ديال الجمال تما

كانت أجواء العرس المغربي فدار وفي الدوار لي كلنا عارفينها خصوصا في البادية كتلقا كولشي داير يدو كولشي كيعاون باشما قدر كلشي فرحان الفرحة و النشاط ولعيلات لي خيطات شي قفطان لبساه لي عندها شي بيجامة جديدة لابساها بداو التحضيرات لهاد الليلة لي الناس فرحانين ليها ومن طبيعة الحال كيف كينين لي فرحانين كينين لي لعكس

دراري معاونين وصل التريتور بالماطرييل ديالو فرشو الزرابي فالقاعة فالاحمر والابيض و بداو كيحطو الطوابل و الكراسة فجنب ليمن و ليسر دارو طوابل دزاج دائرين عليهم كيسان وقراعي دزاج ديال الماء و كراسة بيضين كلشي كان متيول وغزااال

فلكاراج ديال جيران لي ملاصقين معاهم كانوا الطيابات و البرامي و الكاميلات لكبار لي كيطيب فيهم العشا ها دجاج محمر و اللحم بالبرقوق أما البساطل ديجا واجدين و مغطيين باش يبقاو سخان
جيران حالين ليهم باب دارهم عندهم هاجر عزيزة كيشوفوها داخلة سوق راسها ومرأة مزيانة الدار عند مصطفى ماتقدش هادشي كلو صغيرة فقتارح عليهم لجار لكراج ديالو لي كان كبييير

ياسين و هشام و فيصل طلعو لبني ملال زوقو الطوموبيلات و جابو معاهم النكافة و الكوافورة بغاو باش يربحوا لوقت و بلا ما يبقاو يتنقلوا غادين جايين وبيكب من وراهم هازة المطيريال ديال النكافة والعمارية ولبرزة

داو شمس ومعاها البنات ملاك ووصال وتوجهوا لدار الحاجة تماك فين أيقاودوا لعروسة

النكافة قادت الكوشة فين أتجلس العروسة بالابيض وذهبي في القاعة هي اللولة دارتها فالوسط تشوف منو كولشي و كولشي يشوفها كانت البرزة مزوقة بالورد غزاالة

جابو دراري الطيافر لدار الحاجة حطهم حتى يقرب الوقت ويديوهم بدقايقية فيهم دهاز داكشي لي شراو ليها حوايج و روايح و مجوهرات و الحنة فرزيزات مشبكين بالاخضر وذهبي و الفواكه الجافة و التمر معمر و التواب و سبابط و شرابل اما الملابسة الداخيلة محطهمش هادوك داكشي كيبقى مستور ...حطو ذهب لي شرا ليها ما ناقصة حتى حاجة كلشي يحمر الوجه وغير لحاجة لمزيانة ولغالية
ظلام بدا يطيح والناس لبعاد بداو يجيو قبل طيح عليهم ظلمة اما لقراب راهم يوجدو فحالتهم ها تكاشط ها لقفاطن ها لي تكحل لعين وتسوك لفم وتمشط سالف وتعكر بعكر 24 ساعة

وصلات الفرقة المسيقية بمطيريالهم ومعاهم الشيخات وجدوا دوزانهم حتى هوما و قادوا البيفان وشيخات دخلو لداخل يبدلو ويصايبو حالتهم كانت فرقة من خنيفرة مكاين غالمزون وطروفة والصوت البااح ديال جبالة