وردة يعقوب🌹مكتملة🌹

🌹الجزء 51🌹

❄🌺قصة : وردة يعقوب🌺❄

💎وردة نور ( نور الصدقي)💎
💎Ama Mery ( خديجة)💎

✨البارت : 51 ✨

داز النهار و وصلات العشية كولشي كان مقاد و مصاوب تا حاجة ما ناقصة تا هوما وجدو راسهم و لبسو حوايجهم أشمنك يا قفاطن و أشمنك يا تكاشط الأناقة و الجمال رمزهم هما... البنات تقادو و تمكيجو تا هما طلعو فنيونات و كانت معاهم تا سلوى و بنتها و سلمى قادات المايكاب لشمس صرعتها و بانت كبر من لاج ديالها بزاف مع المايكاب لبسوها تاهي و عاد تمو هابطين كيصليو على النبي و هاجر و الحاجة و عائشة كيكبرو و يقراو المعوذتين جو زوين بزاف الصراحة...

في الجيهة لاخرة فالجردة كانو الرجال مجموعين بالفوقيات و الجلالب و لي لابس الكلاس كل واحد و ستايلو و الطلبة كانو فطبلة الوسط و دايرين ليهم لي ميكرو و البيفان باش كولشي يسمع كيتسناو فيعقوب يجي باش يبداو ...

يعقوب لي كان غارق خدمة هاد الأيام باغي يحيد عليه كولشي باش يسافر هو ومرتو و يبقاو بوحدهم هو وياها الراس فالراس باش تزيد تولفو كتر و تفهم طبعو...وحتى داكشي ديال روسيا لي محبسوش تعياط محتاجينو تماك بزاف و لكن لي فراسو راه فراسو ميحيدو ليه تا حد ... شاف راسو تعطل وناض غادي بحالو لدار مسافة ديال طريق كيطير حتى فرانة قدام دار وهبط بتكضيرتو لمعهودة عاقدهم

زاد لجردة فين كاينين الرجال سلم عليهم باحترام و كلس حدا خوتو و هيبتو سابقاه كلهم كيشوفو كيفاش و قداش ولا شحال ما شافوه ولا راجل و سيد رجال كان فخر لباه و أي واحد كيشوفو كيترحم عليه حيت عرف أش ولد ولادو كاملين خرجو مربيين و قاريين و حققو ذاتهم من والو

أما لداخل عالم آخر لي ديجا شايف شمس مستغربش من جمالها لي غير مكيزيد يبان و لي عاد شافوها كي تبهضوا و تتعجبهم و دخل لخاطرهم بدون أي مجهود منها و عاد شوفات الغيرة و الحسد هادوك ديمن حاضرين واخة تكون عمرك أديتي شي حد .... العيالات مطلقوش الأغاني و مشطحوش احتراما للقرآن لي كيتتلى و واصل لعندهم كلهم كانو كيسمعوا و استغفروا الله و كاين لي بكا كاع من كترة ما قاسهم كلام الله...

داز الوقت بين الجموع و الضحك تا وصل ليل عاد بدا كيتسربا لعشا عند الرجال و العيالات فنفس الوقت الافتتاح بالدجاج محمر و الختام بالديسير كولشي كلا و كولشي شبع و بقا لخير داكشي متول و معروف على لالة عائشة التاويل و كل حاجة ديرها فبلاصتها

...........

ليلى كانت خرجات الجريدة تتفكر تا كيبان ليها سعيد غادي كيعرج يرجعو شوية و هي تضحك قاصداه تا وقفات وراه ناطقة

ليلى : ههه صافي وليتي عرج

سعيد : "ضار شاف فيها" هادي نتي

ليلى : أه أنا الصراحة عبر عليك و اللهيلا برد ليا قلبي هههه