وردة يعقوب🌹مكتملة🌹

🌹الجزء 26🌹

🌺قصة : وردة يعقوب🌺
💎BY : وردة نور 💎

✨البارت : 26✨

صالة حامي فيها طرح
بدات النقاشة كتنقش لشمس و لعيلات بداو تيشخدو الطرح و البنات تحزمو و ناضو يشطحو و لي عندها شي سالف سايرا كتحير بيه كين لي نايضة باش تعجب شي وحدة و تزوجها لدها ها مت جدارمي هامت الاستاد ها خت لعسكري ها خالت لمهندس و كاينة لي باغة غير تنشط وتبرد لهوايش و كينين دوك لحلقومات لي مزاحمين تاهما كالك كيشطحوا

ملاك كتشطح محيحة وتصفق وضحك شافت في لمراكشية وهضرات بجهد فاش سكتو باش يبداو أغنية جديدة
ملاك : خاااالتي لمراكشية ربي ربي غني عليا حميمتك راني نستاهل من صباح وانا نحير معاك و نلوز وخا مسلوة لا كر لا صدر ولايني لجمجمة حاضرة
لمراكشية بضحكة مرزنة : وبصوت قاصح كيتردد صداه : وأاانا واناااا نبغي سمر لون
ويااوملاك يازينت لبنات
واااصوت ياريح وعائشة والدة لمليح
لعيلات : ياصوت ياريح وعائشة والدة لمليح
بقاو هكاك كلي مرة تقول ليها شي وحدة غني على بنتي غني على ولدي جدارمي
لمراكشية: واااجدارمي واااجدارمي يالفردي وسلاح
وسالبة سااالبة وسالباني يابنت مي وخاطري هاني

وصال : حميمتك المراكشية شي نويضة على لقراية
لمراكشية: يااموك مووك يااموك ياضرب شيشة وصباح منك

شمس بدات كتطلق و بدا كيعجبها لجو ها شطيح ها لغنا و هي غي ضحك فمها مسداتوش مخليا غمزاتها محفرين فخدودها لمزنكين و الحشمة حاضرة
دراري منين سلاو البنات بقاو مجمعين فدار
الحاجة
هشام : اااحح فيا لهوايش الإخوان و الله مكرهت نخضر العونيات و نبرد على قلبي بالشطيح حنا معليناش الله و لا شنو راه لفرزيات هادو شي يشطح شي يضرب على قلبو
فيصل: شوف ما يبرد جوف أصاحبي
ياسين: و زهواني مع راسك كوراك كاع بنات الدوار لايح عليهم صنارة زين صراحة غامشتت هنا
فيصل : تشاا ألا أصاحبي أنا كنمشي آ عند لي طالبين عليها صحابات عطيني نعطيك تدوز ساعتهم و نبدل اما بنات ناس غا شوية ديال لبسالة وصافي الله يهديني
أنوار : قيل عليك بنات الناس و كون راجل بغيتي معامن قصد لحلال

سي يعقوب عاد دخل الدار نهار كلو من هادي لديك كيقاد كاع أمور العرس باش مرتو متنقصها تا حاجة و كيقاد أمور شركتو فنفس الوقت أما أمور المافية مأجلهم دابة باغي يرتاح
دخل لداخل لقا خديجة عاد خارجة من لكوزينة بإبتسامة بشوشة
خديجة: على سلامتك اولدي ومبروك مادرتي
يعقوب: حرك راسو بشوية : يحفظك
خديجة: نحط ليك تاكل اولدي وجت ليك طاجين لي كيعجبك
يعقوب: خليه حتا نزل ونسخنو علاش مامشيتيش نتي معاهم
خديجة: عائشة قالتها ليا ولايني مجاتش نمشي ونخليك فدار اولدي شكون يضيب ويجمع
يعقوب: انا نهضر مع داك لبرهوش يجي صباح يديك
خديجة: ولكن
يعقوب: بصوت قاصح : قلت لي عندي
خديجة: سكتات كادعي ليه فخاطرها وخا قاصح وفمو مبري منو ولكن ميفوت حد