The UnWanted Billionaire

CHAPTER 47

RAMDAM ni Louisse na nagsisimula nang manlamig ang kan'yang kamay ngunit gano'n naman ang pag-iinit ng kan'yang batok. Nilulukob na ng kaba ang kan'yang buong pagkatao, habang pinagmamasdan si Zairus mula sa screen na nakikipaglaban sa mga armadong lalaki, kasama nito ang pinsang si Ezekhiel.

Hindi na niya nagawang mapakali nang sa unang pagkakataon ay natamaan ng suntok si Zairus sa mukha, hindi nito nagawang naiwasan iyon nang may biglang sumulpot sa tagiliran nito at pinatamaan ito ro'n.

Hindi pa sana mapapansin ni Louisse na nasusugatan na niya ang sarili dala ng pagbaon niya ng kuko sa palapulsuhan kung hindi niya lamang naramdamang may mainit na kamay ang mahigpit na humawak sa kan'yang kamay. Nang lingunin niya si Tonyo ay nababanaag niya ang sari-saring emosyon sa mga mata nito. Nagawa ring alanganing ngumiti ng lalaki na sa pakiramdam ni Louisse ay ginawa nito para pagaanin ang kan'yang kalooban. Nang dahil sa inakto ni Tonyo ay tila nagbalik ang kababatang minsan niyang nakasama sa ampunan.

Naibalik lang niyang muli ang atensiyon sa monitor nang marinig ang hiyawan ng mga lalaki. Nakita niyang sunod-sunod na suntok ang ibinigay ng kalaban ni Zairus pero nagagawa nitong ilagan iyon at nang makakuha ng tyempo ay ito namang ang nagpaulan nang mabibilis na suntok na nakapagpatumba sa kalaban. Nang dahil doon ay nabuhayan ang kan'yang kalooban, pero gano'n naman ang pangngingitngit sa galit na nararamdaman ng mga tauhan ni Reese.

"Nakatyamba lang 'yan. Tingnan niyo at mapapatumba rin 'yang Montell na 'yan. Kapag nangyari iyon ay buong buhay ko siyang pagtatawanan," komento pa ng isa sa mga ito.

Segundo, minuto at oras na ang lumipas. Ang kaninang tahimik na kuwartong kinalalagyan nila ay napuno ng hiyawan ng mga lalaking nanunuod pa rin magpa-hanggang sa oras na mga iyon. Hindi na magawang muling panoorin ni Louisse si Zairus dahil sa lagay nito. Putok na ang labi nito, pati ang kilay at gilid ng mukha nito ay nagdurugo na. Makikita mo rin ang pagod sa mata ng mag-pinsan pero parehong determinadong maipanalo ang laban.

Iyuyuko na sana ni Louisse ang ulo para maiwasang tingnan si Zairus mula sa screen nang bigla itong mapatumba ng kalaban. Isang oras na siyang nakatayo kaya nang masaksihan niya ang senaryong iyon ay ramdam niyang tila bibigay na ang kan'yang tuhod, nasapo niya rin ang bibig dulot ng pagkabigla.

"Zairus," she couldn't do nothing but to desperately call his name, especially that she can hear how Zairus groan in pain.

Naikuyom niya ang kamao at hindi napigilan ang sarili na lalong maging emosyonal, kulang na lamang ay lumuhod siya roon at magmakaawang itigil na ang labanan. Pero maisip lamang niyang gagawin 'yon ay naririnig niya na sa likuran ng kan'yang isipan na lalo lamang maghihiyawan sa tuwa ang mga lalaking kasama nila sa silid. Kaya wala siyang ibang nagawa kung hindi ang manalangin na sana ay magawang makatayong muli ni Zairus, lalo na't kitang-kita niya mula sa monitor na nagmamadaling nakikipaglaban si Ezekhiel para lang mapuntahan ang pinsan.

Gano'n na lamang ang paghihinagpis ng puso niya nang muling may sumipa sa tagiliran ni Zairus at nagawa na ring mapatumba ng mga ito si Ezekhiel. Parehong lugmok na sa sahig ang mga ito. Nang nawawalan na ng pag-asa si Louisse ay tila pinakinggan ang kan'yang panalangin nang masalag ni Zairus ang sipa ng kalaban at hinila nito ang paa ng lalaki hanggang sa mapatumba at magkapalit silang dalawa ng posisyon, nakaibabaw na rito si Zairus at pinaulanan nang magkakasunod na suntok. Nagawa na ring makabawi at makabangon ni Ezekhiel.

Nang makatayong muli si Zairus ay tumingin ito sa camera na tila alam nitong nanunuod siya nang makita niyang bumuka ang bibig nito at sinambit na, "Wait for me." Pinigilan lang ni Louisse ang sariling lumapit sa monitor para lang hawakan ang imahe ni Zairus mula ro'n.

Hindi na namalayan ni Louisse ang oras lalo na't nagpatuloy muli ang labanan. Ni hindi na niya rin mabilang kung ilang kalaban na ang napatumba ng magpinsan. Hanggang sa isa na lamang ang natira sa mga ito pero mukhang naduwag ang lalaki dahil sa nakitang mga kasamahang napatumba na nila Zairus. Lihim na lang na natawa ni Louisse nang tumakbo ang lalaki papalabas ng warehouse ngunit may humabol dito na sa hinuha niya ay isa sa mga kasamahan nila Zairus, saka ro'n na namatay ang monitor at nawala na sa paningin niya si Zairus.