The UnWanted Billionaire

CHAPTER 40

DAHAN-DAHANG binuksan ni Louisse ang kan'yang mga mata. Nagising siya dahil sa amoy ng mabangong aroma ng kape. Dis-orinted niyang inilibot ang tingin sa isang pamilyar na kuwarto. Ilang beses niya pang ipinikit at isinara ang kan'yang mga mata bago niya nabaling ang kan'yang tingin sa isang malaking frame. Litrato nila iyong dalawa ni Zairus.

Realization hits her. Hindi siya nagkakamali sa iniisip na nasa isla siya ni Zairus. Nang dahil do'n ay tuluyang nagising ang kan'yang diwa at sa buong durasyon ay nakatitig lamang siya sa malaking frame na iyon habang tumatakbo sa kan'yang isipan ang maraming katanungan. Paano siya napadpad sa kuwarto nito gayong nasa apartment lamang sila kagabi? Ni imposible rin na hindi siya magising sa byahe.

Tumayo na siya at mas lalo pang inilibot ang tingin sa kuwarto. Kumpara noon ay mas marami na ang mamahaling kasangkapan sa loob. Nang magawi ang tingin niya sa isang body size mirror ay laking gulat ni Louisse nang makitang polo shirt na ang kan'yang suot. Natitiyak niyang pagmamay-ari iyon ni Zairus dahil halos malaki iyon sa kan'ya, abot hanggang ibaba ng kan'yang tuhod.

Bigla ay may napagtanto siya. Hindi ba at iyon naman ang gusto niyang mangyari kaya siya nagpunta ng Manila? Gusto niyang makausap si Zairus patungkol kay Alexandros, kaya iyon na ang magandang chance para sa kan'ya. Pero isang bahagi ng isip niya ang nagsasabing hindi rin naman yata magandang timing iyon, lalo na't iniisip ni Zairus na anak niya sa ibang lalaki si Alexandros.

Si Alexandros... ang anak niya. Sila Suzy, Drake, Nana, Eya at Kris ay nasa kapahamakan. Hindi na niya muling nakausap pa si Drake kaya hindi niya tukoy kung ano na ang kalagayan ng mga ito.

Natigil lamang siya sa pag-iisip nang bumukas ang pinto at pumasok si Zairus. Ramdam niya ang pagrerebelde ng kan'yang puso nang makitang nakangiti pa ang lalaki. Kaya naman ay hindi niya na napigilan ang sarili at sinugod niya ito at pinaghahampas sa dibdib.

"Bakit mo ako dinala rito, Zairus? Nahihibang ka na ba?" Galit niyang tanong.

Pilit namang sinasalag nito ang bawat paghampas niya. "Teka nga, Louisse! Kumalma ka," anito sa mababang tono.

"Paano ako kakalma gayong kinidnap mo ako, ha? Hindi ka na nag-iisip nang maayos."

Natigil lamang siya nang tuluyan na nitong nahuli ang mga kamay niya at mabilis siyang niyakap. Nang mapagtanto ang ginawa nito ay buong puso siyang nagpumiglas mula sa pagkakayakap sa kan'ya ng lalaki. Hanggang sa matigil siya nang maramdamang hinaplos nito ang kan'yang buhok.

"Kumalma ka muna, Louisse. Hindi tayo niyan makakapag-usap kung patuloy kang aakto nang ganito."

May inis pa rin siyang nararamdaman para sa lalaki pero mas pinili niyang ikalma ang sarili. Maya-maya lang ay humiwalay na ito sa pagkakayakap sa kan'ya saka sinapo ang kan'yang pisngi. Pakiramdaman ni Louisse ay tila siya kandila sa oras na iyon na matutunaw dahil sa sa tinging ibinibigay nito sa kan'ya.

Hindi niya naihanda ang sarili sa sunod na hakbang nito. Naramdaman na lamang niya ang malambot nitong labi na nakalapat na sa kan'yang labi na kan'yang ikinagulat. Nang dahil do'n ay nanlaki ang kan'yang mga mata. Pero mas ikinagulat niya nang tila kusang gumalaw ang kan'yang kamay at malakas niyang naitulak si Zairus at kan'ya itong nasampal.

"Don't kiss me!" nagpupuyos sa galit ang kan'yang kalooban. "Wala kang permiso para halikan ako."

Imbes na magalit ito sa kan'yang ginawa ay ngumisi pa ang lalaki. "So, if I ask for permission, you will allow me?"

Nanlaki nanaman ang kan'yang mga mata. Ramdam niya rin ang pag-iinit ng kan'yang pisngi, pero dahil ayaw niyang mahalata nitong affected siya sa simple lamang nitong banat kaya muli niya itong hinampas sa dibdib na ikinatawa lamang nito.