يمه طاب كلبج بشوفة ابوي
برد افادج بجمارة ..
فرحت عيونج بشوفة اخوي ..
شلونكم غاد بدوني ؟
كعد مأمون على كبر اكبر يقرأ سورة يس .. ختم القراءة كبل لا يجون من الكبور غاد .. حجا ويا بطة وحط ايده على كبرها : مرت ٦ سنين على فركاكم بس كابوسكم ما فاركني حاضرني كل ليلة ، ابريني الذمة رايح اسس عائلة . ماخذت غريبة خذت التصون جهالج كبالي .. ادري فرحانتلنا وادري بكلبج الطيب ما يتمنى غير فرحتنا ... ام الاكبر شما اطول السنين حبج بكلبي زرعة ما تموت .
باس كبرها وشال الماي غسل اكبورهم اجن خواتها يبجن على كبرها ..
مشى سرحان لكبر ابوه وصاح : علي بوية تعال ليجاي اغسل كبر جدك
اجا علي ومروان يباوعون الكبور ويسألون ابوهم هذا منو وهو يعرفهم بالموتى وكف على كبر ملوك كاللها : ها يم ازناد ... تعاينين السميتي غريب شصار ؟
كليلي شفادتج الحيلة بالدنيا وبيش واجهتي ربج .. ما نشدج عني ما كالج شسوالج هالغريب ؟
مأمون : بوية ما باريها الذمة ؟
- لا والله بوية ما باريها .. نتواجه يم الكريم وكلمن ياخذ حكه .
غسل كبورهم .. عرض كدامه صورة جبيرة لسلطان وشاف كبرة .. تبسم بحسرة : كضيت عمرك يا سلطان ادور علو بالدنيا دست الجبير والزغيرة وطغيت حتى اعلى ابنك .. تاليتك يبن ادم بحفرة شما تعلى ... الله يعينك يسلطان اعلى ذنب جسام .
عاين لكبر جسام قرا الفاتحة وكاللهم : اغسلوا كبره واقروله الفاتحة .. خيرة الزلم هاذ .. هاذ المظلوم هاذ.. رجل عمتكم يستاهل .. غسلوه بويه واقروله الفاتحة ..
رد منهم ووكف كدام كبر ابو كاله : ها حجي كواك الله ... ادري ظالة بكلبك جثة اخوي بس ما طحت بيها اعذرني ... الف رحمة اعلى شيخ مطر .
صعدوا السيارات وهو شال ايده ويكللهم : الرحمة اعليكم يهلنا .
وطلعوا من الكبور
توجهوا للسماوة
جان زناد كتانيهم غاد عد القصر .. نظفوه وفرشوه .. عد ما وصل شيخ القصر وازلم جثيرة منتظرته ويا ما نزل نزل شيخ ال جلوب ... هتفت الزلم وهوس : هاااااا اشهد يالجدك ابيض تاريخه .. اشهد يل جدك
ودك رجلهم ودبجوا .. اشهد يالجدك ابيض تاريخة
رد الثاني واصاح : العشرين بجدك تتباهه بيومه .. العشرين بجدك .
ويقصد ثورة العشرين الشاركوا بيها اجداده .
وبقت الزلم تهوس وتدبج لشيخ السلف وهو يعاين لولده واحفاده وناسه .. بعد ما انولد غريب .. الله قدر وخلاه شيخهم وكرمه بكل هالخير والاولاد .
هو رافع ايده ويحييهم ومالي عينه بولده .
دخل للقصر ...
باوع على كتره .. حديقة القصر اول مكان يشوف هدوة بيه عد ما جانت تغني ..
باوع اعلى يسرته ديوان البيت ياما انظلم بهالمجان وياما اخذله حك بزود الله
دخل ازود .. هنا جان كل صبحية عادة الشيخ مطر يتريك ويا عائلته بالقصر وهو يجي متأخر من الشط وابوه يلوم بيه .
ياما اجا ومكسور كلبه ورفض يكعد بهالمجان يتريك .. ويطر هالممر مغتاض لغرفته ويسأل ربه يمتى يطي مراده .
هنا غرفة الشيخ مطر والشيخة ملوك .. ياكا جانت سليمة تكرصه وتندسه وتهدده خاطر لا يوصلها ويكرب حجرة ابوه .
هنا جانت الخاتون كضت ايامها السود ...
هنا جانت امه تكعد
كلهم مشوا وظلت بس ذكرياتهم بهالقصر ...
اندار الهم : غرفة الشيخ مطر لا تكربونها .. وابدوا بتحضيرات العرس .
حضروا كلشي لباجر ..
ومشن يتفقن على صالون زين يمكيج نانة ووسن ..
وعلي وسجاد والولد يشتغلون بتحضيرات عرس مروان ومأمون ..
نصبوا جادر جبير وسووا امسية شعرية وجابو منشد ..وحجزوا بفنادق .. بس جانت الفنادق بعيدة عن البيت كالو كل واحد ياخذ عروسته ويروحلها بسيارته .
عزموا الناس وناسهم اجت من كل صوب
بنات ستار وابنه ولالة واهلها وال شمخي ..
كلهم حضروا العرس وسووها زفة وهوسة شكبرهاااا
والواهليه فوك الروس والجكليت صار سحك ..
مأمون تذكر ذكرى بعز هالفرحة بعرس ابوه عد ما دنك يشيل ياخذ جكليته وبطة خذتها منه وملخاها ... ابتسم ابتسامة حزن بنص عرسه .
نانة جانت بعز فرحاتها
ونور فرحان اكثر من امها ومخبلة امها جيف صارت عروسة ..
وكف سرحان و هو يعاين لولده كل واحد بيهم استقر وارتاح افاده منهم .. اندار لهدوة يكللها : ظل بس عليوي بعد ازوجنه وانام مرتاح
- ان شاءالله يوم السعد هاذ يوم الازوج عليوي
- وابو علي ؟
- اكصن راسه
- هههههههه هالراس ما يحلاله اعلى وسادتج يهدوة
عاين ورد حجه : تذكرين يوم الوعدج بهالمجاج وعد ؟
- شنهو ؟
- تضكرين يوم الكتلج انا وياج للشيب يهدوة .. غزانا الشيب وكلبي اعلى وعده وياج هدوة .....النهاية
☆☆☆☆☆☆☆
الاء : تصالحت ويا علاء .. وعشت حياتي وياه عادية بس جزت اطالبنه واطلب منه خليت كل همي جهالي .. وهو صار يحاول يعدل بيني وبينهم يوم يمي يوم هناك .. انتقل لبغداد شغله .. وغيرها سواها ٥ ايام هنا وخمس ايام يم مرته الثانية ..من بعدين اخذلها شقة ببسمايا وكعد بيها هو وجهالة ورد باع البيت الاني بيه واشترى شقة هم ابسمايا .. وعشنا هناك .. بس ما صارلي جهال منه .. كالو تابعة كالو سحر كالو ما كالو وعجزت اطباء يكلولي ما بيج شي والسادة يكلولي عمل ما ينفك .. عفتها على الله ومنتظرة الفرج من الله لحد هذا اليوم .
نانة : عشت ويا مأمون بالبيت اللي بزيونة .. مرتاحة الحمد لله بس مامون بسبب السكر ما يصير عنده اطفال بعد .. بكد ما احبه .. كلت للناس انو الخلل بيه اخاف الناس تشوفه بالعين الزغيرة لو يلوموه .. خليت اللوم عليه وتحملت سؤال الناس ومغثته .. وهو يستاهل .. صح ما عنده مشاعر ولحد هذا يومي ما كايلي كلمة احبج .. بس محترمني مقدرني ... رحنا عمرة سفرني تركيا ولبنان وعمان لإن راسي وراسة ما عندي جهال عوضني بخير الدنيا .. واني احس الله معوضني بنرجس وحيدر اني ربيتهم واحسهم جهالي صدك مو جهال اختي مكتفية بيهم من الدنيا ..
احس سالفة الحمل وغصة الطفل حوبة شاهين الما كدرت احبه .. صح صارت مشاكل هواية بس هو جان يحبني واني اللي ما جنت مقدرة هالمحبة لإن ما عندي مشاعر وياه .. وظل من بعدي هواي يصيح ( منفوسة عمرج ما ترتاحين ) .
. بس الحمد لله مرتاح وما احس ناقصني شي بالدنيا .. تعينت ومشغولة بروحي لبس ومكياج واعتناء لإن ما عندي طفل .. واداري نرجس وحيدر .. ومامون روحي من الدنيا مداريته بمي عيوني واحمد الله على هالنعمة ..
. صح السكر ماله علاج بس اتمنى معجزة من الله تشافي مأمون .
وسن : تزوجت مروان ورجعت اعيش وياه بس هالمرة ابيت لوحدنا .. عمي انطاه فلوس فتح كوفي .. والكوفي زاد خيرله فتحله فرع ثاني بزيونه بشراكة ويا مامون وخير من الله عايشين .. بس اجذب اذا اكول تاب .. اول فترة وبعدين رجع لسوالفه .. بس كبرنا وجهالنا كبروا بعد مو مال ارد اتعارك وياه وازغره يعيون جهاله .. كمت اصم سمعي وحتى ما توصل تليفونه خاطر لا اشوف وانقهر
بس الحق لله .. ما مقصر علينا بأي شي
كريم وكلبه طيب ويحب جهالة ومداريهم ..وما مخلي شي بنفسنا ، عيبة بس النسوان .
ابنه من ابتهال ذبته عليه واتزوجت
جابه عندي عاش .. وباريته حاله حال جهالي
بس ظلت غصت ابني الفقدته بكلبي .. كاظم من اختفى .. طلع هارب لتركيا ومن تركيا طالع لاوربا .. اكتشفت هالشي بعد سنين .. بعد ما اخذ اقامة بوحدة من الدول الاوربية .. ما طالبت بابني بعد لإن مرت سنين واكيد استقرت احاوله وما يعرفني ليش اروح اخربط حياته خصوصا العيشة باوربا امان ع الطفل يعني مأمنه يعيش بخير ما ينظلم ويعيش بظلم مرت اب لو اهل النظام هناك صار على اللي يأذي طفل .. ورضيت بقسمتي ..
بسنة ٢٠١٦ حبلت بطفل من مروان وجبت ولد سماه عمي سرحان كرار على اسم الامام علي .. وعشنا بفضل الله بخير .
نوسة : عشت ويا امي سنين ودخل ابني كلية بس اشتغل ويا مروان وكضتله الشغل .. صار ابني وضعه خير من الله .. جمعنا اني وياه الفلس ع الفلس واشتريالنا قطعة وشوية شوية بنيتها لحد ما خلصتها ...
من خلص كلية كال : يمه اني احبن وحدة وياي بالكلية ورايد اخطبها لإني راح اتخرج وما اشوفها وما اريد اواعدها من ورا اهلها رايدها بالحلال
كتله .. شكو احلى من الحلال يمه
بعتلي جم قطعة ذهب من عدي .. على الجامعهن هو وبمساعدة امي و عمي سرحان زوجته بنية خوش بنية حبابة وتحبه وبت اصول .. وكعدنا اني وياه ومرته ابيتنا الجديد .. جنتي تموت عليه جن بنيتي مو جنتي واني هم حسبتها بتي لإن ما عندي بزر غير سجاد .. خلف اثنين بنات سماهن ريتاج و ريماس .. روحي من الدنية هن .
بسنة ال٢٠١٧ .. اخوي اجا لبغداد وسجاد استقبله تعجب بالحال الصرت بي .. جيف هم بعدهم على فكرهم وكال : اذا انت وابنج خير عليمن ما تشيلين ابوي وياي ترا تعبنا وعلاجه كاسر ظهري .
كتله : جيبه ليجاي واني اداريه شعدي
ما صدك جاب ابوي وحطاه بركبتي .. صح مؤذي ويصيح هواي ويغلط على مرت سجاد بس هي حبابة تكلي : ماما واذا صيح لتتضايقين هو رجال مريض والمريض الله يعلم بنفسيته شلونهة حتى يأذي الناس
كتلها: الله يرضى عليج يماما ويجازيج
وظالين اني وياها نتعاون على ابوي .. صارت بيه كورونا ووصل للموت بس طاب ورجع احسن الحمد لله بس هالطكة العنده سابينا سبي .. من لما انفقد بحرب ايران صار شبه مسودن تصرفاته ما يتحملها عقل .. بس اكول اب والله ما يضيع اجر احد .
وعشنا بفضل الله .
هدوة : عشت ابيتي بعد ما طلعوا الولد .. ظليت راسي وراس نوسة وعليوي وسرحان .. لحد ما ستار راد حصته من بيت اهلي .. باعو البيت
وعباس ومؤيد اشتروا بيت بالتجاوز .. اتزوجوا اثنينهم وامهم وياهم وصاروا عدهم فروخ والحمد لله عايشين
وبنات المرحوم عاشن عدي .. ضميت حصتهن عد سراحان يشتغل بيهن ويزيد عليهن كل شهر لحد ما بسنة ٢٠١٨ .. اشتريتلهن بيت وسجلته باسمهن اثنينهن كلتهلن عمة اليوم انا موجود ما ادري باجر عكبة شيصر امنت حلالجن واجرته وكل شهر الجن ارويتب منه واظلن عايشات وياي وانا اشيلن كل حملجن .
وشايله وصية امي لليوم ما عايفتهم ومعيشتهن عدي
... وكلها تهون الا مصيبة عليوي هالولد معاند ما يتزوج ... طاحت وذرة الساني اريدنه يعرس ما يرضى يكلي يمه ما اريد المرة .. خب كتله يمه خل ازوجنك ريحانة هم بت خالك وهم امن عليها
يكلي يمه لا .. ما اريدن عرس
شد هالنجمات وشاف رويحته من صار ضابط كل نسوان الدنيا ما يعجبنه ظال مكضيها تسخت .. وما رايد عرس عجزنا انا وابوه نقنعه وما يرضى .
بس انا بخير ما طوله بخير ..وعايش بنعمة .
كرمنا الله بحجة انا وسرحان وحجينا بيت الله كبل كرونا بسنة .
بس الجدامي مو بخير .. رجلية كل ما جالهن يتعبن اكثر ووزني يزيد اكثر .. صرت لا اكدر اكوم ولا اكدر اكعد .. بس كعدة وامراض الدنيا بيه ..
وعايشة على الادوية والله الشافي .
هاي قصتي وهاي قصة اهلي ..
ان شاءالله ما تعبيناكم .. وهمومنا اخفيفة اعليكم
انا جدتكم هدية اودعنكم بالله واهل البيت .. والخاتمة يم بت ماجد .
زينب : وهنا اوصل لختام هالقصة
عشت وياها سنة ونص .. جنت بحال وصرت بحال والي وياها كومة ذكريات موجعه ومفرحة بكل بارت كتبته بهاي الرواية .. اعتذر عن التقصير .. والتقيكم برواية جديدة ان شاءالله.
اتمنى تحجولي ذكرياتكم ويا هالقصة خلال هالسنة ونص العشناها بالرواية .
خلصت رحلتنا وانتهت قصتنا ...
مع السلامة
#زينب_ماجد
البارت الاخير ٢
Zacznij od początku
